كنت أظن.. كنت أظن.. وقد خاب ظني
دخلت القسم وبديت شغلي لكن ابدا ما مركزه ، قلبي واجعني وكل ما اتذكر كلام سمر قلبي بوجعني زيادة
طلبت من زميلي جون يكتب التقرير براهو الكان المفروض نكتبو انا وهو مع بعض عن حالة واحد من المرضي ، لاني بالجد ما كنت قادره اركز خصوصا كمان بعدما جطت في ولد الناس الصباح بدون سبب ، بقيت حاسه انني ممكن اكرر الموقف دا تاني مع اي زول حيناقشني تاني في اي حاجه لاني أساسا مولعه.. جون ياحليلو لما شاف منظري وافق طوالي مع انو علاقتي بيهو ما قويه..
طلعت من المستشفي وكالعاده ماعارفه امشي علي وين ، ياحليل مهند الكنت لما اكون في حاله ذي دي اول حاجه بفكر اعملها اني اضرب ليهو ، هسي اضرب ليهو عشان اقول ليهو شنو ..
اقرب حته لقيت فيها مقاعد في وشي قعدت فيها.. حاسه اني ذي في حلم ، ومرات بقول لا دا اكيد مقلب من سمر ، وممكن كمان يكونوا متفقين هي ومهند مع بعض ، لكن كل ما اتذكر شكل واسلوب سمر معاي ، بقول ما اظن لانو نهائي ما كان وش ولا اسلوب زول بهظر ، حتي مهند من اخر مقلب عملوا فيني وانا بكيت حلف تاني ما يعمل فيني مقلب مؤثر ، وحتي لو عملوا فيني مقلب بكون لحظي وبنتهي ما بستمر لحدي الان . حقيقي اتمنيت انو يكون مقلب ولكن كنت اظن وقد خاب ظني
لو كان الموقف دا حصل لي مع واحده غير سمر ، ما كان اتاثرت قدر دا ، لكن يجي من سمر بالذات دي كانت صدمتي..
مر علي شريط ذكرياتي مع سمر من اول لحظه شفتها فيها لحدي اخر لحظه ، سمر صديقة طفولتي ومع مرور الايام بقت اختي اتشاركنا في المدرسه وفي البيت وفي العيله نهائي اهلنا ماكان بفرقونا عن بعض ، اتشاركنا من اصغر تفاصيل حياتنا ل اكبرها ، ولو هي ما كانت مقرره انها ماعايزه تقرا بره السودان كانت هسي بتكون مشاركني حياتي في لندن
دا كلو كوم ووقفتها معاي في وفاه اهلي دا كوم تاني براهو ، سمر ما فارقتني نهائي، دي كان بتنوم جنبي في السرير ، دي الكانت بتمسح لي دموعي اول ما تنزل ، اتذكر ليها شنو ولا شنو ماحصل غلطت في حقي ابدا كل شي بينا كان احلي ما يكون ، وعمري ما حسيت بيها غير انها اختي وتومتي كمان لاننا كنا لاصقين في بعض لدرجة حتي تصرفاتنا بقت متشابهه ، اول مره احس ب اختلاف بيني وبين سمر المره دي لاني لو كنت انا الفي مكان سمر ماكنت ممكن افكر ذي ماهي فكرت فيني كدا نهائي ، لكن حتي لو سمر جرحتني مره ، ماممكن انسي ليها الفات دا كلو ، لانو ما بتنسي واقل حاجه ممكن اعملها ليها اني انفذ ليها رغبتها في الابتعاد عن حياتها.. ايوه بالابتعاد عن حياتها لانو سمر لما قالت لي خلي علاقتك بمهند علاقة زماله كانت عارفه انو دا مستحيل يحصل لانو انا ومهند علاقتنا ما تنفع ترجع تبقي زماله بعدما بقت قوية كدا ، و مافي ولا اي تصرف او سبب منطقي ممكن اقولو لمهند عشان علاقتنا تبقي في حدود الزماله ، يا نكون اخوان للابد يا اخسروا للابد
