الساعه 6 جانا عمو عمر عشان يرجعنا انا وسمر من المدرسه انا في الطريق بضرب لناس بابا عشان اشوفهم رجعوا ولا لا وبلقي تلفوناتهم مغلقه وبقيت مقلقه
عمو عمر: يامريم هم في البحر الشبكه بتكون كعبه عشان كدا ماتقلقي
انا: هم قالو كلها 3 ساعات وبرجعوا يعني مفروض يكونو وصلو البيت او في الطريق
عمو عمر اصر اني امشي معاهم البيت لحدي ما يتاكد من انو ناس باب رجعوا وصلنا بيت ناس عمو عمر وانا وسمر طلعنا غرفه سمر..وبعد لحظات سمعنا صوت جوطه جرينا نزلنا لقينا عمو عمر بقول لا حوله ولاقوه الا بالله ومنهار وماما زينب بتبكي انا بقيت ما مستوعبه في شنو وخلاص الدنيا ظلمت في وشي اساسا قلبي كان مقبوض من الصباح وحاسه باحساس مامفهوم ..
عمو عمر : يا مريم ناس ابوك عملو حادث ونحن ماشين عليهم وانا ذاتي ما عارف اي تفاصيل بقيت مصدومه وحسيت بنفسي اتشليت يالله تكلوني وركبنا كلنا العربية واتحركنا.. عمو عمر شغال تلفونات عشان يعرف الحادث وين اتصل عليهو عمو يوسف وقال ليهو تعال في شارع النيل وصلنا شارع النيل ولقينا الدنيا والعالمين ملمومه اسعاف وشرطه جريت نزلت من العربيه عشان اعرف في شنو شفت عمو يوسف وعلي ولدو بسال فيهم مافي زول داير يرد علي .. جوني عمو عمر وماما زينب بقوا حاضنني وببكوا وعمو عمر بقول لي قالوا المركب الكان فيهو ناس ابوك غرقت ومافي زول نجاه.. انا تاني ما حسيت بشي صحيت لقيت نفسي في المستشفي وجنبي ماما زينب وسمر بقيت بصرخ ومافي زول قادر علي.. و عمو عمر حما الدكتور يديني مهدي تاني ..بقي بس حاضني ويقرأ لي في قران قال لي لازم تبقي قويه عشان تشوفي امك وابوك واخوانك قبل الدفن احمدي ربك انهم اتلقوا في ناس لحدي هسي ما لاقين جثثهم الكلام دا بقي ذي الحلم بالنسبه لي وما قادره استوعبوا ساقوني ومشيت البيت...بكي وكواريك وناس كتيره وانا لسه ماقادره استوعب اول زول جاء علي حبوبتي حضتني وبقت تبكي اول مره اشوفها حزينه كدا دا كلو وانا لسه مامصدقه بعد شويه سمعت اصوات عربيات الاسعاف ماما زينب مسكتني وحمتني اطلع من الاوضه بقيت بس بسمع في بكاء الناس وانا لسه ما مصدقه وماعارفه بره الحاصل شنو بعد مسافه جاء عمو يوسف قال ليهم نادوا مريم خلوها تجي تودع اهلها.. ماما زينب بقت سايقني وعمو يوسف سايق حبوبه دخلوني الصالون والمنظر الشفتو ما اتمني زول يشوفوا 4 جثث معقوله ديل ماما وبابا معقول ديل اخواني يالله يارب ثبتني عمو عمر قاعد بقرا في قران قام جاء وبقي يقول لي ديل شهداء اوعك تبكي مسكني مع ماما زينب وفتح اول جثه يالله دا بابا حبيبي بعدما شفتو خلاص حيلي برد وبقيت ما قادره اقيف..ماما زينب فتحت الجثه التانيه وبقت حاضنه الجثه وبتبكي عرفت انو دي ماما ...قوموا ماما زينب وطلعوها بره عمو عمر جر لي كرسي وقعدني جنب ماما بقيت بس حاضنها يالله معقوله اكون حاضنه ماما وهي ما تحضني معقوله ياحبيبتي ياصديقة عمري انا تاني ما ح اشوفك يالله ياربي انا عمري ما افترقت عنهم ليه ما اخدتني معاهم ..موقف لايحسد عليهو احد واحساس مافي اي كلام بقدر يوصلو ليكم.. وللمره التاني اصحي والقي نفسي في المستشفي موصلين لي درب وسمر راقده جنب بقيت بحاول اتذكر، اتذكرت منظر الجثث واخر حاجه كنت حاضنه ماما.. فكيت الدرب وبقيت بصرخ سمر صحت بصواريخي و جرت نادت الدكتور وجات بوراهو ماما زينب..
ماما زينب: ماممكن يامريم تكوني كدا لو استمريتي كدا مافي حل غير يدوك حقنه منومه تاني خلي ايمانك قوي ، هسي هم محتاجين لينا ندعي ليهم،و انتي اكتر واحده هم محتاجين لدعاك.رجعوني البيت وجابو لي شيخه قران بقت بتقرا لي حتي انا فعلا رقت حبه وبقيت ببكي مع الناس
الليله تاني يوم للبكاء لكن الناس بتتونس وبتضحك وبتاكل والمستلمه البيت خالتو مني ولا حتي حاولت تصتنع الحزن قدامي انا بقيت ما طايقه زول بس قاعده في الاوضه معاي ماما زينب وسمر وصحباتي بمشوا وبجوني حبوبه تعبت ورقدوها في المستشفي..
الليله الخامسه، ماما زينب جابت شيخه تعمل ختمه قران اصلو ما فارقتن هي وسمر حبوبه طلعوها لكن بقت ما بتتكلم مع زول بس ماسكه سبحتها وبتبكي.
حادث ناس بابا دا كان حدث هز كل الخرطوم لانو المركب دي اتوفي فيها كمية من الدكاتره الكانو مشهورين ب انسانيتهم وحبهم لمساعده الغير عشان كدا الحدث دا اتداولتو كل وسائل الاعلام جو كتير من الصحفيين عشان يقابلونا ويكتبوا تفاصيل عن حياة ماما وبابا الموضوع دا ضايقني جدا لانو ما كان عندي رغبة اتكلم عن حاجه والوجع الجواي مكفيني وزايد.. الحسم الموضوع دا عمو عمر بعد كل الصحافه عننا
اما ناس عمو يوسف بقوا قاعدين رسمي وشعبي هو واولادو، بعد اسبوع البيت بقي يفضي شويه شويه ..عمو يوسف واولادو وخالتو مني في ضحكهم وونستهم ذي كأنهم الناس الماتو ديل ما شافوهم قبل كدا..انا كنت بس بعاين ليهم وما هاميني البعملو فيهو دا خلاص بطني طمت منهم.. ماما زينب كلو يوم بتجي تمر علي وسمر شبه قاعده معاي بترجع بيتهم بس تنوم وبتجيني من الصباح.. انا بس قافله علي الاوضه وماطايقه اشوف زول، عمو عمر وماما زينب ودوني المقابر كم مره..
بعد 15 يوم عمو يوسف قال لي انتي بقي ماعندك غيرنا وانا ح اعقد ليك علي علي ولدي ..عشان مافي زول يتكلم والناس تعرف انو عندك ظهر وسند..انا طبعا اتصدمت وعرفت دا انو دا اكيد تخطيط خالتو مني خلاص وصلوني الحد، حاولت امسك اعصابي قلت ليهو لو انطبقت السماء مع الارض انا مابعرس ولدك ولا انتظرتو ذاتو يرد علي، جريت شلت مفتاح شقتنا وطلعت
يتبع.....
