الله أكبر .. الله أكبر .. لا اله الا الله
الله اكبر .. الله أكبر.. ولله الحمد
الله اكبر كبيرا.. والحمدلله كثيرا.. وسبحان الله بكره واصيلا
(كل عام وانتم واحبابكم بخير.. كل عام وانتم الي الله اقرب )
يامريم قومي يلا عشان نحصل صلاة العيد.. انا حاضر يا ماما واتقلب بالناحية التانية.. بعد شويه يجوا التيمان ينطوا فيني قومي يا مريم ياخ بابا منتظرك عشان نمشي الصلاة واتلاوقو فيني لحدي ما اقوم البس ونمشي صلاه العيد اسره مع بعضينا.. بعدما نرجع بنقيف جنب باب الشارع وما بندخل الا بعدما بابا يطلع القروش من جيبو ويدينا عيدية العيد..
يا الله.. استغفر الله العظيم ..يامريم فووووقي خلاص اهلك تاني مافي،لسه بقنع في روحي، ماقادره استوعب اني تاني ما ح اشوفهم.. رجعت اتغطيت و واصلت بكائي.. تلفوني ضرب في لحظات دي.. وما قادره ارد من البكاء.. لقيتو مهند فتحت الخط..
مهند : الو يامريم .. يابت يا مريم.. اكيد بتبكي.. يامريم قدامك 10 دقايق وتنزلي لي تحت منتظرك نمشي صلاه العيد مع بعض والله لو ما نزلتي بعد 10 دقايق ح اجي اجرك من غرفتك.. وقفل الخط
عارفاهو مجنون وممكن يعملها جريت استحميت في 5 دقايق ولبست عبايتي ونزلت
مهند : كل سنه وانتي طيبه
انا : وانت طيب
مهند : هسي ح اسكت لحدي ما نصلي وتهدي.. لكن بعد الصلاه عندي معاك كلام تاني.
مشينا الصلاه منظر يرد الروح مسلمين من مختلف الجنسيات بكميات.. انتهت الصلاه كل الناس بتسلم علي بعض وبتبارك العيد
لاقينا مصطفي واحمد ونميش سلمنا علي بعض. مهند قال ليهم علي مواعيدنا ذي ما اتفقنا بنجيكم بعد ساعتين جنب الداخليه
مهند: يامريم عندك ساعتين تصحي جوز اللوز.. وتجهزوا.. انا عامل ليكم باربيكيو علي البحر
انا : وليه ما اتكلمت من بدري
مهند : عشان ما تشالقي وتتعبي نفسك وتعملي انتي.. كفايه تعب رمضان التعبتو عشانا
انا : اوكي.. هم للحوامه بجهزوا في ثواني..وصلنا جنب باب الداخليه..
مهند : كل سنه وانتي طيبه تاني يا سجم دخل يدو في جيبو وطلع لي واحد جنيه استرليني وضحك، هاك دي عيديه العيد.. عاينت ليهو وبكيت
انا : الذكرك شنو بالعيديه دي
مهند : ماممكن انسي حاجه انتي حكيتها لي.. بعدين انتي يا مريم ليه دايره تشيلي هم الناس ومادايره الناس تشيل همك.. ليه بتبسطي كل الحواليك في عز وجعك.. ما تضغطي علي نفسك قدر دا حتي لو نحن شايفنك ملاك لكن انتي بشر في النهاية..الليله لو ما كنت نزلتك بالغصب كان تكوني قافله علي الاوضه وعامله نايمه في حين انك بتبكي.. انا عن نفسي يا مريم لو ما شاركتك في وقت حزنك، ماعايز اشاركك في وقت فرحك. مالك سكتي..
