لسة بيناتنا المسافة والعيون
واللهفة والخوف والسكون
ورنة الحزن البخافها
تعدي بالفرحة وتفوت
وأبكي بالحسرة وأموت
الأماني الفي السفر
قبل الزمن كايسة المواني
يوم تجيبني عليك بصدق
إنو مره الحظ طراني
واحتواني معاك شجن
عذبني قبلك ولسه منك جاي تاني
تمشي وين الخطوة عنك
ما الزمن بالحب بلاك وابتلاني
بعدما قفلت من نانا سريع سريع قفلت شنطتي ورتبت البيت وطلعت ماشه ل طنط سعاد افطر فسيخ 😋 كلمتها من قبل يومين وجهزت لي واحد شايلاهو معاي 😋
دخلت لقيتهم قاعدين في الصينيه منتظريني و مهند بنقنق علي تأخيري ما اشتغلت بيهو طبعا .. اكلنا بمزاج و قاعدين بنتونس وقائد الونسه عمو عبدالرحمن ياخ من سمع انو مهند و سمر خلو بعض داير يطير من الفرحه .. و علي قول مهند بيتبسم براهو لما خايفين عليهو 😂 ..
بعد الفسيخ دا لازم الزول ياخد ليهو رقده كمان ونسه مع طنط سعاد الحاله اني عامله مستعجله لسه عايزه امشي المقابر اودع اهلي .. لكن البخليك تتونسي منو جاني مهند طاير قال لي قومي يا شابه شريكك منتظرك في الصالون عمو عبدالرحمن كمان طوالي مشيت معاهو لما دخلت لقيتو دا حسام 😏
حسام : تعالي يا مريم عايز اتكلم معاكم انتو و مهند لاني عارف انكم حتكونوا زعلانين مني وليكم حق حسب الانتو سمعتو و شفتو .. لكن خلوني احكي ليكم الشفتو والحسيتو انا .. عشان تعرفوا اني انا لي حق يحصل لي كدا امبارح
انا: نحن ما زعلانين منك زعلانين عليك وعلي البتعملو في نفسك
حسام: طيب اقعدي واسمعيني لانك انتي اكتر زول بتحسي بي .. امبارح اول مره ادخل بيت ناس رامي من بعد الحادث ، حتي يوم البكاء امهم لاقيتها بره.. من ما دخلت وشفت البيت صاني قلبي وجعني واتذكرت ونستنا وضحكنا الكان جايط البيت دا ، وكل ما اقبل علي حته بتذكر ذكري حلوه قضيتها فيهو مع رامي و ريم .. البيت دا انا عشت فيهو احلي ايامي ، اول حاجه دخلنا الصالون ل ابوهم واتصدمت بمنظروا .. ابوهم جاتو جلطه ليها سنين وانا ماعارف الراجل دا سلم علي سلام والبكاء البكاهو بهز اي بني ادم .. انا والله في اللحظه ديك كرهت نفسي وكرهت اهلي لاني كنت بسال منهم طوالي وبقولوا لي كويسين ومافي زول جاب لي سيره مرضو والحصل ليهو ولا حتي حبوبه وجدو الهم جيرانهم
انا :😭😭😭 الجلطه اثرت عليهو شديد بتحرك يعني ؟؟؟
حسام : ايوا بتحرك ، لكن بقي عندو شلل في يد واحده وفي بدايه مرضو قعد قريب سنه من الشغل وبقي شغالين ليهو علاج طبيعي ، الراجل دا مهندس وكلو نشاط وحيويه والمنظر الشفتو اثر فيني وزعلت لاني ما وقفت معاهو في مرضو بسبب اهلي الماكلموني وخصوصا انو نهائي ما عمل لي حركات العملت لي امهم وبحبني جدا غير انو وقفتي جنبو كان ممكن تطلعني من الحاله الانا كنت عايشه
