مريم

الجزء 24

(الاصدقاء... عائله اخري انجبتهم الايام)

ابتدا يوم جديد وابتدت معاهو الجوطه تاني .. باب الغرفه بدق.. دق مستمر، اكيد عرفتوها ايليف مافي غيرها.. اول ما فتحت الباب نطت في حضني.. سلمنا علي بعض.. وطوالي مشت نطت في السرير رقدت

انا : بالمناسبه افتكر انو انتي رحلتي الغرفه القصادي، وتنسي تاني الضيق العاملاهو لي

ايليف : بتخيل ليك يا مريم الغرفه القصادك دي بس عشان امشي اغير هدومي من غير ما تعب ،و انزل واطلع

انا : اوووف يحلني منك الحله بله

ايليف : شنو؟

انا : دا كلام سوداني يعني الغرفه غرفتك

ايليف : تعالي اقعدي ياخ والله مشتاقه ليك موووت...طبعا الحي بتاعنا كلو بقي بعرفك ذي ماعارفاهم عاملين لي قومه وقعده، دكتور ايليف دكتوره ايليف ومن مشيت ملمومين فيني، وانا احكي و اوري فيهم الصور لما عرفوك تركيه قالوا لازم تجي معاي في الاجازه الجايا.. وماما قالت لي السنه الجايا لو مريم ماجات معاك، انتي ماتجي، يرضيك انا اتشرد

انا : ايليف انتي عارفه اني بحب اهلك قدر شنو بس تركيا دي اعفيني منها

ايليف: انتي ليه متخيله انو تركيا دي عباره عن عيله احمد اوغلو بس.. انتي عارفه انو نحن وهم من عالمين مختلفين تماما.. ديل حتي ممكن يكونوا ماحصل سمعوا بالحي بتاعنا يعني اطمئني لو ما انتي فتشتيهم براك ، هم ماحيعرفوك عليك الله يامريم فكري في الموضوع

في الاثناء دي الجرس ضرب اكيد دي راني المهذبه، ماذي ايليف بتدق وما بتقيف الا لما افتح ليها.. تاني بدأت جوطه السلام والاحضان والشمارات مع راني

مهند اتصل علي قال لي خلونا المساء نتلمي مصطفي وصل هسي واتلاقي مع احمد في المطار يعني ما ناقص الا نميش.. قلت ليهو نميش جاء مع راني في نفس الطياره وصلوا قبل شويه.. نسقنا للطلعه بليل

بعد غياب شهر ونص اتلمينا تاني ، ورجعت الشله ذي ما كانت والعلاقات بقت اقوي.. حتي نميش واحمد الكانو رايقين هسي بقوا خطرين عديل .. مهند قال لي زول غيرك خرب الاولاد ديل مافي.. قلت ليهو اي والله انا بديت وانت تميت الناقصه وقعدنا نضحك اتبادلنا الهدايا اي زول جايب معاهو هدايا من تراث بلدو

راني : كدي روقوا وانتبهوا معاي .. انا خطوبتي كان مفروض تكون في الاجازه الفاتت ، واجلتها مخصوص عشانكم ، عايزاكم كلكم تحضروها، عشان كدا حددناها في اجازه الكريسميس، عشان حتكون في اجازه 10 ايام ، ومن بكره تجيبوا جوازاتكم صاحب بابا شغال في السفاره حيعمل ليكم الفيزا، ومن هسي خليكم عارفين بابا حيقطع لينا كلنا التذاكر مشيه وجيه، والعشره ايام دي حنقعدنا في بيتنا يعني ما دايره اي نقاش في الموضوع ولو رفضتو انا ح اجلي الخطوبه ، وبراكم عارفين بابا صعب ممكن يحميني الجامعه.. سكتت الناس بكلامها دا ومافي زول اعترض خصوصنا كلنا عارفين وضع ناس راني كيف وانو الرحله دي بالنسبه ل ابوها ولا حاجه.