الليله لي يومين من ما جيت لندن ما طلعت من الفندق، بس قاعده انا ودفتري وصورنا وذكرياتي.. اتذكرت اخر نصائح بابا لي.. بابا دائما كان بقول لي يامريم الانسان حياتو عباره عن مراحل، وعشان تستمتعي باي مرحله من مراحل عمرك، اهم حاجه انك تعيشي اي مرحله في وقتها بالطول والعرض، لانو في حاجات عندها وقت معين لو جيتي عملتيها في وقت ما وقتها بتبقي ماعندها معني ذي ما انك تعمليها في وقتها.. وكل ماتكبري طريقه تفكيرك بتتغير في حاجات انتي بتكوني شايفاها مهمه ومابتقدري تستغني عنها ، ونفس الحاجات دي بعد سنه ممكن تشوفيها تافه وماعندها معني، يعني الزول كل ما يكبر أولوياتو واهتماماتو بتتغير، عشان كدا اياك تحكمي علي زول اصغر منك بأنو تفكيرو تافه.. اتعلمي انك ماتخافي وجربي اي حاجه عشان تتعلمي الا الحرام طبعا، وخلي مقياسك للصح والغلط خوفك من ربنا ما خوفك من الناس.. عشان تكوني ناجحه في حياتك العلمية والعمليه خليك زوله طموحه ومثابره وارادتك قويه، وأتذكري انو مافي نجاح بالساهل .. واياك والعنصريه والتكبر والغرور واعرفي انو في الدنيا دي مهما كان مستواك الاجتماعي والتعليمي مافي زول احسن من زول الا بقوه الايمان والتقوي.. عيشي دينيتك واستمتعي بيها قدر ماتقدري لكن بالمقابل اعملي ل اخرتك قدر القدرتي تعملي في دينيتك واكتر..ساعدي الناس قدر ماتقدري ومن غير مقابل لانك لمن تحتاجي للمساعده حتلقي ربنا سخر ليك زول يساعدك.. دي كان اخر نصائح نصحها لي بابا ، لكن قبلها كانت في نصائح كتير منو هو وماما وان شاءالله حاستفيد منها. �
الليله ماشه الجامعه متذكرين الانترفيو العملو لي اونلاين الليله مفروض امشي اعمل واحد تاني فيس تو فيس ، وبالمره ح اشوف الداخليه عشان ما اتصدم فيها، وكمان لازم اعمل شوبينق لانو ماعندي حاجه.
وصلت الجامعه.. جامعه كبيره شديد ونظيفه جدا ياخ انظف من ضميري.. � من جوه منسقه تنسيق ماعادي مباني جميله، حديقه اجمل، كافيهات ، ملاعب .. مافي ناس كتار لانو الجامعه موجزه.. دخلت عملت الانترفيو عادي مافيهو شي بسالوك اسئله بحاولو يعرفو بيها سلوك ونفسياتك وطولة بالك كيف، تقيم ماعندو علاقه بالاكاديميات ، تقيم بحت عن شخصيتك عشان يعرفوك هل انتي تصلحي تكوني طبيبه. ياخ الناس دي ناس راقيه والله.
خلصت الانترفيو..وقابلتني المشرفه بتاعت السكن شرحت لي الداخليه فيها شنو ونظامها كيف وانها في نفس الجامعه بس بالجهه الخلفيه..وادتني كرت الداخليه عباره عن بطاقه ممغنطه نازله فيها بياناتي بتاعت الجامعه بالاضافه لرقم الغرفه وقالت لي الطالب الجدد بنبدا نستقبلهم في الداخليه من قبل اسبوع من بدايه الدراسه، والداخليه طول السنه فاتحه لانو ف ناس ما بسافروا اجازات.. لما شفت النظافه والنظام الفي الجامعه جليت فكره امشي اشوف الداخلية، قلت يابت خلي الحركات هي الجامعه انظف من الفندق الخمسه نجوم الانتي نازله فيهو..
