عم الصمت لمسافه بعدما عمو عمر كفت سمر وطلعوا ..مهند وعمو عبد الرحمن وشوشهم ما بتتقابل .. انا الليله حقيقي اتفاجات في سمر تاني ما كنت قايلاها بالغباء دا لدرجه انها تتكلم مع عمو عبدالرحمن بالاسلوب الغير محترم دا و تحرج ابوها قدام الناس .. كدا مش خسرت مهند وبس حتي عمو عمر ما حيرحمها بعد العملتوا دا ، والله اكتر زول حنيت عليهو عمو عمر لانو اتصدم في سمر وهو ما بستاهل انها تكون بتو .. قطع الصمت دا عمو عثمان
عمو عثمان : ياريت يا اخوانا ننسي الحصل دا ونواصل يلا يا عبد الرحمن وقع علي العقد وانتي يا مريم اكيد ما ح تكسري كلام ابوك عمر
انا : اكيد طبعا .. و وقعت وعمو عبد الرحمن وقع وطوالي قبل علي مهند
عمو عبدالرحمن: بالله دي البت الكنت عايز تضحي بمستقبلك عشانها .. البت الما احترمت ابوك ولا احترمت البت البتقول ليها اختي وقالت عنها انها غريبه، ولا حتي احترمت ابوها قدامنا وابوها قال انو ما عرف يربي يا ربي تكون عايز تعرسها عشان تربيها انت .. ما ح تناقش معاك عن علاقتك بيها ح انتظر و اشوف ولدي المحترم حيتصرف كيف
انا : غلط سمر ذي ما انت عايز يا عمو عبدالرحمن ، لكن ما تغلط في حق عمو عمر 😔 لانو هو من زعلو بس قال انو ما عرف يربي لكن والله بعرف يربي احسن تربية و محمد ولدو الناس بتحلف ب احترامه و انا ذاتي اعتبر اتربيت علي يدو.. وتصرف سمر دا تصرف عدم وعي منها ، ما عدم تربيه
عمو عبدالرحمن : احسن ما نتناقش يا مريم.. عمر علي عيني وراسي لكن بتو بقي عندي فيها رأي تاني .. وطلع.. وعمو عثمان والمحامي طلعوا ب وراهو وبقينا انا ومهند في المكتب برانا ومهند بس قاعد يحمر لي وابا يفتح خشموا دا معاي .. في الاثناء دي ضرب لي حسام .. مصطفي واحمد كانوا باتين معاهو من امبارح ، وانا ومهند اتفقنا معاهم انو نتلاقي نتغداء هنا في الفندق بعد الاجتماع
انا : دا حسام بكونوا تحت خليني اقول ليهو الاجتماع ح يطول ويقعدوا يتغدوا براهم
مهند: شال تلفوني ورد علي حسام .. يا حسام انتو وصلتوا
حسام : ايوا في الباركن
مهند: ادخلوا وقول لمصطفي واحمد مهند قال ليكم امشوا العبوا بلياردو لحدي ما نخلص ، وانت اسال في الرسيبشن من مكتب عم عمر وتعال
حسام: خير مالكم في حاجه؟
مهند : تعال وانت تعرف
بعد دقايق جاء حسام داخل ولما شاف وش مهند استغرب
مهند: اقعد هنا يا حسام وجاوبني سوال من راجل للراجل من غير اي كذب ولا تعمل حساب زول .. مريم لما جات لندن ، نزلت ترينق فعلا ولا قالت ليك قول لي كدا ؟؟؟.. طبعا انا نططت عيوني انا ما شفت زول ذكي ذي مهند وبربط الاحداث ذيو
