مر شهر علي وفاة اهلي..اثقل ايام مرت علي في حياتي.. طريقه حياتي اختلفت من البت المجنونه الماعندها غير الضحك والفرفشه للبت المصدومه من الحياة وبقي جواي في احاسيس متناقضه.
لي اسبوع انا وماما وزينب حايمين مع عمو عثمان تحويل ملكيه وتواثيق وحاجات تانية اول مره اسمع بيها واماكن اول مره اخشها وكل كوم وموضوع الامضاء دا كوم تاني لازم الامضاء تكون متشابهه �� متشابهه شنو وانا اول مره امضي � ، ماما زينب بس بتضحك فيني وعمو عثمان اخر ما اتوصل ليهو اداني نوت قال لي تقعدي بس تكتبي الامضاء بتاعتك دي لما تملي النوت دي �.. والله يا اخوانا كلامو صح انا بعد يومين بقيت بمضي وانا مغمضه عيوني، صحي التكرار بعلم الشطار � موضوع الامضاء دا كان اظرف شي في الموضوع.
خلصنا الحمدلله من جوطه الحاجات دي وعمو عثمان ودانا ورانا بيت الرياض شفتو من بره بس، بيت جميل شديد وشكلو الشركه المؤجره مهتمه بيهو عمو عثمان قال لي صاحب الشركه دا انا بعرفو معرفه شخصية وانا جبتو ياجر من امك بدفع بالدولار وملتزم بدفع الايجار..
مشينا بيت الطائف موقعو حلو لكن من بره باين عليهو قديم ولما دخلنا جوه، البيت كبير شديد لكن البيت دا غريب هو 3 طوابق لكن من جوه ما مقسم ك غرف وهول وكدا الطابق كامل كلو قطعه واحده... عمو عثمان قال لي البيت دا كان موجر لشركه من ملاكو القدام، والبيت لما اجرتو الشركه ما كان تامي الشركه التمو لاسيادو مقابل الايجار عشان كدا الشركه اكتفت تعملو من جوه ب برتشن خشب وشالوه لما عقدهم انتهي خلصنا جولتنا ورجعنا البيت.
تاني يوم الصباح اساسا متعودين انا وسمر بنمشي شقتنا نقعد فيها لحدي قبل المغرب.قلت لسمر انا عندي موضوع بفكر فيهو الليل كلو، قبل ما نمشي الشقه عندي مشوار خلينا نمشيهو الاول.. مشينا بيت الطائف عملت جوله حولو ومشيت الشوارع الوراهو ،عملت سيرفي للمنطقه الفيها البيت دا، سمر طبعا مافاهمه حاجه قالت لي خلاص دايره تعمل لي فيها بزنس اومن المهم سكتها بسندوتش وكبايه عصير اصلو دا راس مالها �
المساء اساسا كل يوم ناس عمو عمر بتلمو في شاي المغرب مع اني ما بشرب شاي لكن بحب لمتم دي بتذكرني بلمتنا انا واهلي.
انا: ياعمو عمر انا عايزه اعمل صدقة جارية لي اهلي ولي
عمو عمر: بابتسامه قال لي ياسلام عليك دا كلام ممتاز قال لي انتي عارفه سبب ارباحنا المتزايد انا وابوك شنو..؟.. انو الارباح دي كنا بنقسمها ثلث ل ابوك وثلث لي وثلث بتطلع ل الاعمال الخيريه قال لي الزول ما بحب يتكلم عن الحاجات دي لكن والله يا مريم العملو امك وابوك اصلو ماهين وانا مبسوط انك طالعه زيهم
انا:بس خلاص موضوع تقسيم الارباح دي يستمر ذي ماهو لكن انا في بالي حاجه تانية. انا عايزه اعمل جامع
عمو عمر: الموضوع ما هين وعايز تجهيزات كتيره لكن مالو انا معاك حابد افتش المكان
انا: المكان جاهز ومبني كمان لما شفتهم مندهشين هو وماما زينب قلت ليهم انا قاصده بيت الطائف. البيت دا انا الليل كلو بفكر فيهو والصباح مشيت عمل سيرفي للمنطقه اولا هو فاتح علي ناصيتين واللصقو شركه ومحل تجاري والوراهو كلها بيوت ومافي جامع قريب جنبو وكمان البيت مساعد لانو من جوه مامقسم يعني صيانه بسيطه والبيت بزبط. لقيت فجاءه عمو عمر دموعو جاريه
عمو عمر: والله يامريم بس كأنو ابوك محمد البتكلم نفس طريقه كلامو وتفكيرو ماكان بقول حاجه الا بعدما يفكر فيها كويس ويفتش عنها.انا بكره بمشي اللجنه الشعبيه بتاعت الحي واتكلم معاهم
فعلا دا الحصل عمو عمر تاني يوم مشي اللجنه الشعبية وحكي ليهم القصه ناس اللجنه رحبوا بالفكره جدا لانو فعلا مافي جامع قريب وانهم ماكان عارفين يحلو المشكله كيف لانو ميدان الحله صغير شديد ومابنفع يتبني فيهو وباقي البيوت كلها مسكونه والبيت دا مناسب لانو علي شارع رئيسي في المنطقه. عمو عمر جاء مبسوط وشايل اوراق من اللجنه بحوجتهم لجامع وقال لي من بكره عمك عثمان حيمشي يعمل كل التصاريح والحاجات المطلوبه وانا حجيب المهندس البنتعامل معاهو عشان يمسك الشغل بتاع الصيانه وبناء المنبر ومتكفل بكل المصاريف
انا: والله ياعمو عمر انا ماعارفه اشكرك كيف لكن انا عندي اعتراض بسيط اولا موضوع المصاريف دا انا الحادفعوا كلو انت عارف انو حسابات ماما في البنوك كلها بقت باسمي والقروش الفيها ماهينه دي اقل حاجه انا اعملها عشانهم ، وانت استمر في اعمالكم الخيريه بحساب الشركه ذي ماكنت بتعملو انت وبابا
عمو عمر: كل يوم بتخليني افتخر بيك اكتر
انا: وفي حاجه تانيه انا عارفه الشغل بقي كلو في راسك بعد وفاه ماما وبابا عشان كدا موضوع الجامع دا انا وماما زينب الحنتابعو مع عمو عثمان والمهندس.
الليله تم شهر ونص من ما انا امتحنت..النتيجه بتاعتي الليله لكن نهائي مامتحمسه ليها ذي زمان تجي ذي ماتجي.. عمو عمر وماما زينب شغالين بالموضوع اكتر مني عمو عمر مامشي الشغل عديل اصر يمشي المدرسه معانا وصلنا المدرسه لقينا الهيصه والزغاريت ومن ما دخلت مديره المدرسه جات حضتني مبروووك يا مريم رفعتي راسنا .. انا يا اخوانا جبت اعلي نسبه علي مستوي السودان والثالثه علي مستوي بريطانيا الكل ببارك وبهني فيني وانا بس ببكي مافي حاجه في بالي غير ماما وبابا ما اتمنيت حاجه غير انهم كانو يكونوا في ويحضروا اللحظه دي.. قلت لعمو عمر خلينا بس نمشي المقابر .مشينا جوا ينزلوا معاي قلت ليهم عايزه امشي براي ماما زينب قالت ليهو خليها ياعمر
اول مره امشي اقيف في قبر ماما وبابا واكون ماقادره اتكلم بس دموعي جاريه بعد مسافه جوا عمو عمر وماما زينب شالوا الفاتحه وساقوني وطلعنا
في البيت سمر ومحمد ماخلو لي شي وتاني يوم عمو عمر ضبح وعزم ناس المدرسه انا بالجد الناس ديل ما بقدر اجازيهم مهما عملت ليهم.. ناس وفين ومخلصين بالطريقة دي لي أصدقائهم حتي بعدما ماتو صعب يتلقوا بالهين..
الأوفياء أناس ثابتون على مبدأ الحق وهم كالجبال مهما طال الزمان بهم لا يتغيرون..�
يتبع....
