شكل حياتنا من ما نحن نزلنا المستشفي كلكم بقيتو عارفينو ، اننا بنتلاقي كلنا في الداخلية بعدما نخلص لانو اساسا نحن الجامعه بقينا مابنمشيها
الا يكون في امتحان او جايبين بروف من بره عاملين محاضره للدفعه كلها حتي نلاقي ناس مهند في الجامعة ، غير كدا ياهو المعتاد بتاعنا نتلاقي في حديقة الداخلية نتونس ونستنا وما ندر نتلاقي تاني بليل الا
لو حصل حاجه ،او لو ما اتلاقينا بعد المستشفي والويكند ثابت انو بنقضيهو مع بعض وبنبرمج بره الداخلية
لينا 3 ايام ما لاقينا مهند ، لانو سمر بقت ما بترضي تجي من الشقه تلاقينا في الداخليه كلنا ..بقي مهند اول ما يطلع من الجامعه يمشي طوالي لسمر ويطلعوا براهم.. مهند بخش قروب الشله في الواتس بسلم وبسال من الناس ،والناس بتسلم عادي ومافي زول بالغلط ساي علق ليهو علي غيابو ولا شاغلوا لانو بقوا عارفين علاقه سمر ومهند ، وانو مهند مع سمر والناس دي بطبيعتها مافيهم زول بخش في خصوصيات التاني الا الزول يدخل الناس في خصوصياتو براهو..
اكتر ناس ممكن يشاغلوا مهند ، انا ومصطفي ، وبطبيعه الحال مصطفي هو اكتر زول بلاقي مهند لانهم ساكنين مع بعض وفي الجامعه مع بعض ف مافي سبب يخلي يشاغلوا، وانا اساسا بقيت في وضع ما مفروض افتح خشمي بكلمه..
انا بعدما ارجع من المستشفى بلاقي سمر طلعت ، ولما ترجع بتونس معها ونسه عاديه وما قعد اجيب ليها سيره مهند اصلا ، وجات مره شايله اكياس ولا سالتها ديل شنو ولا هي قالت لي.. الكلام دا لو كان حصل قبل نقاش سمر معاي كان الوضع اختلف ، كان الونسه والكواريك اشتغلت اول ما سمر جات وكان سالتها مشيتو وين وقلعت منها الاكياس وشفت الحاجات وقستها كمان لكن سمر قدرت تحرمني حتي من الاحاسيس و التصرفات البين الاخوات او الصحبات. 😔
الليله اليوم الرابع ما نلاقي مهند برضو طلعوا هو وسمر براهم ، بعد ساعتين فجاءه سمر ضربت لي وقالت لي تعالي لينا نحن في الكافية الفي نهاية الشارع..
ما تفرحوا ذي انا 😀 ، لانو انا طوالي بالي مشي لانو سمر عايزه تقول لي نحن كنا عاملين فيك مقلب لكن كنت اظن واظن وقد خاب ظني 😢
مشيت سلمت عليهم وقعدت، سمر قالت لي في نقاش بينا انا ومهند وعايزاك تحكمي بينا ، لانو مهند ما اقتنع ب راي..
طبعا استغربت فيها كيف انتي البتقولي لي ابعدي من علاقتنا جايا هسي تدخليني في نقاش بينكم 😯 ياخ انا بسببك سلمت علي مهند سلام بارد جدا بالرغم من انو لي 3 ايام ما شوفتو وفارق معاي جدا عشان بس انتي ما تتحسسي وتتهميني في خوتي ليكم..المهم قلت ليهم احكوا
مهند : انا عايز نتلاقي مع الشله ذي ما بنتلاقي اصلا، لانهم ما غرباء علي سمر وهم معتبرنها منهم وفيهم ، ونطلع انا و سمر يوم بعد يوم برانا او مرتين في الاسبوع
