مرت الأيام والسنه التانيه علي مشارف الانتهاء.. مرت سريعه وما حسينا بيها احتمال لاننا بقينا فعلا عيله واحده 👬👭 حتي العلاقات علي مستوي الأسر بقيت قويه انا عملت قروب في الواتس واضفتا فيهو افراد أسرة كل واحد فينا ،طبعا انا ضفت عمو عمر وأسرته لانهم حاليا فعلا هم أسرتي الحقيقية ♡
علاقتي ب احمد صلاح بقت ممتازه، اي نعم ما بنتلاقي لكن طوالي متواصلين في الواتس 📱 . اما حسام تواصلي بيهو كان محدود ومن خلال الايميلات بتاعت الجمعيه البترجمها ليهو 💻
جاء شهر رمضان نفس الجرسه بتاعت السنه الفاتت ونفس اللمه ونفس الطقوس .. في ايام رمضان الاولي...
انا : يامهند عايز اعزم احمد صلاح يجي يوم يفطر معانا
مهند: طوالي احمد زول حبوب لكن ماظريفه اعزمي حسام معاهو
انا : عرفت من متين لحسام ما بعزمو ولا شي ابو نفسيات دا احتمال كدايسو تقوم علي ويجي يركب لينا وش 😬
مهند: ههههه اقسم بالله انتي بت كلبه الولد دا زول راقي جدا بس انتي المادايره تنسي ليهو سخافتو الفي بيتهم 😈
انا : سخافتو الفي بيتهم وافتراءهو يوم الكوره 😏
مهند : كعبه كعبه كعبه اريتك ما اختي 😂 .. فنيتو بالقلم.. وضربت ل احمد
انا: الووو رمضان كريم يا سجم
احمد : الله اكرم.. اللهم اني صايم بطريقتك نبذيني وجرحي صيامك
انا : ماتخاف سجم دي كلمة اسلامية
احمد : ما جاده انتي ياخ 😂
انا : اسمع عازماك بكره تعال افطر معانا انا والشله 😍
احمد : ياسلام ياخ واخيرا حلاقي باقي الشله لكن خلي بعد بكره ، بكره معزومين وما ممكن نعتذر بعد دا ما ظريفه خلي نجيكم بعد بكره بمزاج 😋
انا : دقيقه انت بتتكلم عنك انت ومنو 😏 انا قلت ليك عازماك ما عازماكم
احمد : مريم اكيد بتستهبلي بتكلم عني وعن حسام كيف يعني اقول لحسام مريم عازماني فطور واطلع اخليهو وانتي بتعرفي ذي ما بتعرفيني 😳
انا : انتي صحبي وهو لا.. المشكله وين يعني 😏
احمد : بالمناسبه يامريم حسام دا نهائي ما بصوره الانتي خاتها ليهو والظروف المره بيها هي الخلتو يبقي كدا..ما من حقي احكي ليك ظروفو لانو دي حاجه خاصه بيهو لكن كل الحقولو ليك حسام دا ارجل بني ادم انا عرفتو علي وش الدنيا
انا : وانا ماسالتك من ظروفوا ولا بهمني اعرفها وعلي العموم خلاص كلمو معاك
احمد : لا ما ح اكلمو يامريم لو عايزه تعزميهو اعزمي براك وبعدما يرد ليك وريني قال ليك شنو ؟.ارسل ليك رقمو ولاعندك
