ابتدا صباح جديد كالعادة اتجمعنا كلنا في الفطور 🍹 🧀 بعد دقايق جات ساره ؛ ما سلمت علي زول في يدو ، واكتفت بكلمه هاااي للجميع، ووقفت قدام مصطفي ، مصطفي لاحظ ليها واتذكر انو قاعد جنب مهند طوالي قام ليها وقعدت جنب مهند ، راني المابتعلق علقت قالت لي ماكان تقعد في اي كرسي وخلاص ما صح منها تقطع لمصطفي فطرو عشان حضرة سيادتها تقعد جنب مهند 😏 مصطفي بخفة دمو خلي الناس تتجاوز الموقف دا ، ورجعنا لونستنا وهظارنا ، و مهند ظهر عليهو الضيق في وشو لكن اكيد ما حيتكلم معها قدام الناس
في اثناء ما نحن بنفطر جاء عمو عمر وسلم علي الناس بلطافتو المعهوده لقي سمر مستلمه الجلسه كالعادة
عمو عمر : سمورتي مشتاقين البيت من غيرك مسيخ والله ، كنا قايلين اننا حنرتاح من ازعاجك لكن البيت من غيرك ما بتقعد
سمر : ما تحنكني يا بابا لو متخيل اني ممكن اخلي الخضره والماء والوجه الحسن وارجع البيت تبقي اكيد بتهظر 😂
عمو عمر : انتي يابت انتي الرباك منو 😅
سمر : هوووي كلو ولا عمر الامين لحدي هنا نقطه سطر جديد .. قامت حضنت ابوها وخلتنا كلنا نضحك
عمو عمر : ما كفاكم مريم واحده متحملين مريم التانية دي كيف 😆
الشله كلها دافعت عن سمر لانها فعلا هي كانت نكهه السفره دي ، تهظر مع دا وتكاوي دا ، والناس ماخده راحتها معها 💗
عمو عمر استاذن من الشله وقال ليهم ح اخد منكم مريم 10 دقايق ، انا طوالي قمت مشيت معاهو في اوراق بخصوص الشغل وقعت عليها ✍🏻 ،وبعد داك انا كنت طالبه منو يجهز لينا برنامج للفسح في السودان انا حدي الخرطوم ، وعمو عمر اكتر زول ممكن يضبط لينا البرنامح لانو بجوهم سياح في الفندق وبنظمو ليهم رحلات
عمو عمر : مد لي ورق ..دا يامريم البرنامج ، طبعا طويل، لما لقاني مخلوعه 😳 .. يامريم دي لسته لكل الاماكن الممكن تزوروها ، ماحبيت اختار ليكم براي لاني ماعارف باقي ازواق الشله ، لكن في طارق دا المرشد البطلع مع السياح ممكن يساعدكم تختاروا شنو
انا : تسلم يا عمو عمر 😘 ، ما ظنيت نحتاج لطارق ، الورقه فيها وصف دقيق ل اي برنامج وبياخد زمن كم ، انا ح اقعد مع مهند نختار حسب البرامج البحبوها الشله ومهند احسن مني لانو سافر كتير داخل السودان.
عمو عمر : تمام قرروا و وروني
طلعت من عمو عمر ومشيت للشله ناديت مهند و وريتو الورق وبقينا نختار في البرامج ..مهند قال لي مافي زمن نطلع حته بعيده عشان معزومين عند اهل حسام خلينا نمشي المتحف القومي ونتغداء بره ، خلي البرامج الطويله ليوم تاني
طلعنا عشان نغير هدومنا ونطلع ، ما ظريفه نخلي ساره براها ، مع انها سخيفه لكن قلت ليها تطلع معانا لحدي ما نجهز 😎 دخلنا جناح البنات ، ساره قعدت في الصاله ونحن دخلنا الغرف نغير، وخلينا ليها باب الغرفه فاتح عشان تجي لوعايزه تدخل الحمام او دايره تجدد مكياجها 💄 بعد شويه كدا ، سمعنا صوت ساره بتتكلم في التلفون وبصوت عالي يعني قاصده تسمعنا كلامها 👂🏻 وركزنا معها خصوصا لما سمعنا اسمي
