طلعت من المستشفي وحاسه روحي خلاص حتتطلع من الضيق الأنا فيهو.. لا انتظرت دوامي يخلص ولا انتظرت ترحيلي ولا حتي شلتي ..
بقيت ماشه في الشارع لحدي ما لقيت لي حديقة دخلتها وقعدت في اقرب كرسي لقيتو وبكيت بكيت لما صدعت اساسا لي زمن متضايقة والحصل الليلة تم الناقصه
الزول الوحيد وانا في حالتي دي ممكن استعين بيهو من غير ما يضغط علي ويسالني مليون سوال هو مهند طوالي اتصلت عليهو...
انا : مهند
مهند: مريومتي
انا: انت خلصت محاضرات ولا لسه؟؟؟
مهند: لسه.. دقيقة دقيقة صوتك مالو؟ انتي كنتي بتبكي؟؟؟
انا : متضايقه حبه وبكيت المشكله وين بعد تخلص اضرب لي
مهند: هو شنو البعد اخلص انتي وين هسي؟؟؟
انا : ماعارفه في حديقه قريبه من المستشفي
مهند: رسلي لي الموقع.. ربع ساعه بالكتير بكون معاك.. فعلا بعد ربع ساعه شوفتو داخل الحديقه وبتلفت كوركت ليهو
مهند: مريم في شنو ليه عيونك مورمه كدا والبكاك شنو اصلا
انا : تاني اتفقعت بالبكاء مهند ماسالني خلاني تميت بكيتي
مهند: خلاص كملتي؟؟؟ ممكن اعرف في شنو
انا : مخنوقه يامهند انا لي زمن ما عارفه مالي من ما نزلنا وغيروا نظامنا وفرقونا انا مخنوقه
مابحب الوحده مابحب اكون براي حتي لو لساعه.. بحب يكون حواليني ناس برتاح معاهم احساس الوحده الحسيتو بعد فراق اهلي بقي طوالي ملازمني ما بنساهو الا وانا مع واحد منكم والزاد ضيقي زياده ضغط القرايه وضغط حسام علي ، الليله حسام وصلني مرحلة انو طلعني من طوري وقلت ليهو كلام ما بشبهني وحكيت ليهو كل الحصل الليله
مهند: بالنسبه لحسام انتي عارفه روحك انك ماغلطانه لانو هو فعلا ضاغط عليك اكتر من اللازم لكن غلطتي يا مريم في كلامك الاخير ليهو
انا : عارفه يامهند وزعلانه من نفسي انت ماشفت النظره الشفتها في عيونو ورغم انو جاط وكورك، لكن كانت جوطه زول مكسور ذي الاني هبشتو في الوتر الحساس
مهند: ومريومتي لما تغلط بتتعذر وبتطيب خاطر الزول الكسرتو بكره حتمشي لحسام وحتعتذري ليهو والموضوع انتهي ماتزعلي نفسك اكتر من اللازم
انا: اكيد ح اعتذر لكن مرات بعد ماتوجع زول حتي الاعتذار ما بفيد
مهند : انتي اعملي العليك وريحي ضميرك
انا : ان شاءالله
مهند: بعدين يا حيوانه انتي في واحده يكون عندها اخو ذي كدا عسل ودمو خفيف وتقول حاسه بوحده..ياربي سامحها البت دي جاحده خلاص
