اليوم مر ذيو وذي اي يوم من ايام المستشفي.. بعدما خلصت محاضراتي اتصلت علي مهند
مهند : مريومتي 😍 ياداب طالع من الجامعة ح انتظركم في الداخلية
انا : لا تعالي لي في الكوفي شوب الفي شارع الجامعه منتظراك هناك
مهند وصل لقاني قاعده منتظراهو
مهند: خلاص قلبي اكلني من تجيبنا هنا بتكوني بتفكري في مصيبة
انا : المره دي دايراك لعمل خير عشان مريومتك البت اليتيمه والمسكينه
مهند: ههههه في ذمتك مسكينه دي جايا مع خلقتك دي.. اها احكي
انا : رايك شنو في شراكة بابا وعمو عمر خصوصا انهم في مجالات مختلفه
مهند:ديل احلي اصحاب ومثال للخوه النظيفه.. ما مهم انو مجالاتهم مختلفه النجح شراكتهم ثقتهم و اخلاصهم لبعض وتفاهمم
انا : طيب انت شايف انا اكتر زول صحبي واخوي ، وثقتنا واخلاصنا وتفاهمنا مافيهو ذره شك منو ؟؟؟
مهند : عايزه مني شنو
انا : اموت في فهمك .. انت يا مهند الزول الانا نفسي انا وهو علاقتنا تكون نفس علاقه عمو عمر وبابا ونبقي شركاء
مهند : ههههه انت بتهظري صح؟ شركاء شنو يا مريم انا وانتي مافي توافق مادي بينا يخلينا نتشارك في حاجه
انا : طيب عشان ما تتكلم ساي انا ح احكي ليك حلمي النفسي تحققو معاي
الشركة الطبية الكانت بتاعت بابا ، عمو يوسف افلسها واتباعت الليله بواسطه البنك وتاني رجعت ب اسمي 😍يعني انا حاليا عندي شركه مبنية واقفه ساي عايزه استثمرها ..و انا قرايتي يحلك لحدي ماتخلص لكن هنودي اخوي كلها سنه او سنه ونص ويخلص ويبقي اشطر مهندس مدني فيك ياسودان
انا عايزه اقلب نشاط الشركه دي لشركه هندسية الهي.. مجموعه الأخوه المتحده للإنشاءات الهندسية 😍 بشراكة الاخوين مهند ومريم
مريم براس المال ومهند بالمجهود و الاداره، ذي ما عمو عمر ادار شراكتهم هو وبابا
مهند : مريم انتي ماخده الموضوع ببساطه كدا ذي بتقولي لي تعال نتشارك نشتري هديه للايليف
انا : نحن ما اول ناس نتشارك شراكه ذي دي ياما شركات وشركات قامت علي الاساس دا وهسي من انجح الشركات
مهند: ما اختلفنا قولي اتجاوزت موضوع القروش ، انا ح اكون زول ياداب خريج كيف ح ادير لي شركه وانا ماعندي خبره
انا: ومنو القال ليك انت حتديرها براك 😉 حيكون معاك مهندس من اشطر المهندسين في الشرق الاوسط الهو الباشمهندس عبدالرحمن الشريف 😍
مهند: ابووووي يا مريم 😲خلاص استلمتيني وعايزه تستلمي ابوي كمان 😎
انا : يازول أنا ماعايزه استلمو ولا شي 😂 لكن ولدوا الاسمو مهند براهو بخشمو قال لي قبل كدا، انو اتفق مع ابوهو اول ماهو يتخرج حيمشي يشتغل في الامارات ويخلي ابوه يرجع يستقر في السودان كفاهو غربه ..حصل ولا ما حصل يامتعلم يابتاع المدارس 😃
