اصبحنا واصبح الملك لله، الليله الاحد يعني موجزين ، صحيت بصوت دق الباب المتواصل اكيد الزفته ايليف قمت فتحت وانا عين مغمضه وعين مفتحه دخلت ايليف و معها راني ، وانا رجعت رقدت في سريري جو الاتنين جروا البطانيه مني
ايليف : يامريم قومي ياخ عايزين نمشي الكوافير نفسياتنا تعبانه وعايزين نعمل نيولوك
انا: اولا انا نعسانه مساهره الليل كلو في التلفون مع سمر وانتي جايا تصحيني من الساعه 8ونص عشان تقولي لي نمشي كوافير ، وثانيا انا نفسياتي ما تعبانه بلا نيولوك ولا بطيخ اغمض عيوني وافتحها القاكم اختفيتوا
راني : ما علي كيفيك حنسوقك بالغصب ولازم نمشي هسي عشان نخلص بدري لانو مصطفي الظهر عامل لينا كشري وحنتلمي مع الشباب في الحديقه
انا : اوووف منكم ياخ... قعدوا ينقنقوا لي وقلت اخير اقوم امشي بدل نقتهم وعارفاهم حيقيفوا فوق راسي وما حيمشوا من غيري و كدا كدا النومه طارت
لما مشيت الكوافير لقيت بت افريقية بتمشط بس خلاص الموضوع عجبني قلت ل ايليف وراني امشوا اعملو حاجاتكم وماعندكم شغله فيني انا حتمشط بس، جوز اللوز زاتهم اتشبكوا معاي قالوا لي بس ياهو دا التغير زاتو هههه.. قعدت اول انا قلت للمراه اعملي لي حاجه بقدام شكل ظريف،بعد خلصنا عجبني عجب اليشوفني وانا ما دايره اجي الكوافير مايشوفني هسي، ايليف وراني قالوا ليها بس دايرين نفس العملتي ل مريم ، بعد خلصنا المشاط ،البت البتمشط لما شافتنا معجبين بالمشاط قالت لينا عندنا بلوزات افريقيه للبيع مع المشاط كدا تكونوا عملتو اللوك كامل، طلعتهم لينا عجبونا خصوصا انهم طوال وحيتلبسوا مع البنطلون عادي اشترينا منها 9 كل واحده 3 واتخارجنا
مشيت الداخليه استمحينا وغيرنا وطبعا الجديد شديد لبسنا البلوزات حار حار وطلعنا مشينا الحديقه للشباب نحصل الكشري
مهند : البلابل هههههههه يابنات دا شنو العاملنو دا ومتين عملتو
مصطفي : نيولوك افريقي جميل اوووي
ايليف: مشينا الكوافير مريم عجبها ونحن اتشبكنا معها
انا : انا عاينت لمهند مالو شاذ يعني
مهند : لا ابدا والله تغير ظريف بس استغربت متين عملتو ومنو العملو ليكم وحلاتكم ماشاء الله ولو كان شاذ براك عارفه كان خليتكم فكيتوا هسي
قعدنا اتونسنا واكلنا كشري مصطفي طلع معلم
مهند : امبارح لقيتي احمد كيف
انا : كويس الحمدلله مع انو ظاهر عليهو التعب لكن في ونستو وضحكو
مهند: داير امشي ليهو ما ظريفه يرقد مستشفي وما امشي ، ماتمشي معاي اساسا ما وراك شي
