ابتدت الاجازه.. الاجازه شهر ونص اطول اجازه في الجامعه.. عشان كدا مافي زول بقعد كل الناس بتسافر، والداخليه بقت شبه فاضيه.. الشله كلها سافرت فضلنا انا ومهند وايليف.. ايليف مسافره بعد شويه ومهند بعد يومين.
واقفه قصاد الشباك لمحت مهند وايليف في الحديقه قاعدين بتونسوا.. استغربت مهند جاء الداخليه وما كلمني.. بعد شويه ضرب لي قال لي تعالي انا جيت تحت.. مشيت سلمت عليهو.. ايليف قالت لينا انا جاريه ماشه البس ترحيل الداخليه منتظرني يوديني المطار.. قال لي بالمناسبه انا جيت لي نص ساعه كان عندي موضوع خاص مع ايليف.. طبعا هو عارفني لما زول يقول لي موضوع خاص تاني ما بسال عن الموضوع.. قلت ليهو تمام ، اساسا ايليف ماعندها موضوع خاص غير مراد حبيبها البقا مشهور هنا اكتر مننا.. الاتنين قعدنا نضحك.. جات ايليف طايره ودعناها سريع سريع ومشت
انا : انت مسافر فجر بكره ولا فجر بعد بكره
مهند : انا جليت السفر
انا : بخلعه انت مجنون ، مش انت خططت مع ابوك تنزلوا السودان سوا وابوك اخر اجازتو عشانك.. حصل شنو خلاك تغير رايك، اكيد ما الشغل
مهند : ما ح اسافر واخليك براك لو كان في زول من الشله كان ممكن
انا : انت مجنون يامهند دا كلام شنو ثم ثانيا انت عارف اني ح اسافر دبي اسبوعين الاقي ناس عمو عمر
مهند : حتسافري بعد اكتر من 3 اسابيع ليه تقعدي الوقت دا كلو براك
انا : مهند انت حتفكر فيني اكتر من ما حتفكر في نفسك، انت مجنون في زول يكون عندو عيلة وما يسافر يلاقيهم .. ياخ انا مستعده ادفع عمري كلو قصاد انو الاقي اهلي تاني ان شاء الله دقيقه
مهند : مريم الموضوع غير قابل للنقاش يا نسافر سوا يا نقعد سوا.. تقعدي براك لا
انا : انت بتقارن نفسك بي ليه.. انت عندك اهل تسافر ليهم وانا ما عندي ......
مهند : ماعندك شنو يامريم مالك سكتي.. عايزه تقولي ماعندك اهل يعني كلام اننا اخوان دا بتقوليهو من بره قلبك
انا : الدخل خوتنا في السفر شنو يا مهند انت عايز تصل لشنو
مهند : عايز اصل لي انك لو عايزاني اسافر السودان انتي ذاتك تسافري معاي تمشي تقضي 3 أسابيع هناك وتسافري دبي من هناك مع ناس عمو عمر
انا : انت عارف انو انا ما عندي ناس في السودان غير ناس عمو عمر وهم هسي مافي السودان..عمو عمر وماما زينب ومحمد سافروا السعوديه و سمر قاعده مع حبوبتها عشان الامتحانات وما حتكون فاضيه لي
مهند : في انا .. ما عاجبك
انا : اولا: ايوه ما عاجبني مصاقراك السنه كلها خليني ارتاح منك شويه.. وتانيا: انت الله يقدرك وتلقي زمن يكفي الناس المنتظرنك، اهلك وساره و اصحابك
