مريم

الجزء 30

(وفي الخرطوم دي انا تاني ما بجي الحر السموم انا تاني ما بجي) 👏🏻

دي الاغنيه الاستقبلتنا بيها سمر في المطار لما شافت وشوش الناس دي محمره من السخانه 😨 كمان الحاله نحن وصلنا المغرب 🌘 لما يشوفوا النهار عندنا حيعملوا شنو 🌞 ذي ما قلت ليكم عمو عمر استقبلنا استقبال حافل جدا هو سمر ، ولما وصلنا الفندق لقينا ماما زينب كمان منتظرانا والسلام والبكاء ياخ و ربي ديل احلي ناس 💗 بعد السلام والتحايا عمو عمر قال لينا امشوا ارتاحو وبكره نتلاقي بإذن الله ، ومهند زاتو حيمشي ل اهلو يسلم عليهم ويقضي باقي الليل دا معاهم ويجينا الصباح ،مهند طلع مشي مع ناس عمو عمر ، وسمر طبعا قاعده بشنطتها معانا 😂

طبعا انا واقعه سلام علي الناس 🤝 بعرف اغلب الشغالين في الفندق بالاضافه انو عمو عمر موصى علينا توصية جد. لقيناهو مجهز لينا جناحين جناح للاولاد وجناح للبنات في نفس الطابق كل جناح مكون من غرفتين وكل غرفه بحمامها وفيها سريرين بالاضافه لصاله فيها مطبخ صغير فيهو ثلاجه ومايكرويف...

كل زول دخل علي جناحوا نحن البنات ايليف وراني في غرفه وانا وسمر في غرفه .. اما الاولاد نميش وأحمد في غرفه ومهند ومصطفي حيكونوا في غرفه .. ناموا طوالي السفريه طويله ومتعبه ، وأساسا الناس شبعانه ماكله في الطائرة، انا وسمر شمار شمارين ونمنا عايزين نصحي بدري عشان نستمتع باليوم كلو

صحينا من الصباح رسلنا لبعض واتفقنا ننزل نفطر في البوفيه الساعه 8 ونص ، مهند اتصل علي من الساعه 8 اطمئن علي الشله وقال بجي يحصلنا..

فعلا نزلنا ولقينا مهند في وشنا قعدنا فطرنا ،وسمر سيده الجلسه ممتعه ليك الناس ديل متعه جد، انا ومهند بس بنضحك عليها.. مهند قال لي بالجد سمر نسخه منك ، مهند ماحصل اتونس مع سمر شافها مرتين.. مره لما نزلنا السودان ووصلوني هو واهلو ، ومره في خطوبتو 💍

بعد الفطور انا قلت ليهم ماشه ازور اهلي كلهم قالوا ماشين معاي مش قلت ليكم ديل حبايبي 💓 ديل نوع الناس البتلاقاهم معاك في الحلوه والمره 😍

عمو عمر مجهز لينا ميني بص مكيف يرافقنا طول فتره الاسبوعين الجايات نحن كتار وماعايزين نتقسم .. مشينا المقابر زرنا اهلي ، شالوا الفاتحه ودعوا ليهم ، خلوني براي معاهم شويه 🙏🏻

( حلاة بلدي.. وحلة ناسا... وحلاة الطيبه.. والطيبين )

بعدما طلعنا من المقابر ، مهند قال لازم نمشي بيتهم نسلم علي امو فعلا مشينا ، خالتو سعاد ام مهند 😍 مراه بميه راجل ربت اولادها احسن تربيه براها، لانو ابوهم مغترب، هم بسافروا ليهو في الاجازه وهو بجي راجع معاهم في اجازتو .. استقبلتنا استقبال ظريف مراه بشوشه ذي ولدها 😍 ماخلت حلاوه ما خلت خبيز و حلويات وما خلت عصائر زوله راقيه وزوق، وزوقها ظاهر حتي في فرش بيتها الانيق 🏡 الظهر اذن الشباب كلهم مشوا الصلاه مهند قال ليهم حنمشي نصلي في جامع اهل مريم 🕌 طبعا هم كلهم عارفين قصه اهلي ووقفة ناس عمو عمر معاي لكن ما حكيت ليهم بقصه ناس عمي لاني اساسا مسحتهم من حياتي ..