مريم

الجزء 17

الشوبينق ... الشوبينق متعه اي واحده فينا، لكن الليله ماعندي زمن كتير ليهو، ركبت تاكسي عارفه وجهتي علي وين.. وصلت وبديت اختار في حاجاتي سريع سريع اساسا اكتر حاجه محتاجها لبس للجامعه، الناس هنا لبسها للجامعه بسيط بنطلون وقميص ولا تونك وامورك بتظبط ، مافي بهرجه ذي اغلب جامعات السودان كانو الواحده ماشه مناسبه وفل ميك اب وحركات ذي دي... اشتريت كم بنطلون، علي كم جيب بنطلون وكم قميص علي كم تونك ومعاهم اسكارفات علي كم اسبورت .. اشتريت لي لبستين بتاعين قشره للمرقات لحدي ما اجي اشتري حاجات برواقه في تخفيضات والحاجات مغريه لكن مافي زمن وعدت ولد الناس ولازم ابقي قدر كلامي

ضرب لي مهند قال لي حنتلاقي بعد ساعتين. رجعت الفندق استحميت وصليت واكلت ولبست واتخارجت.. وصلت المطعم واقفه بره بتلفت بفتش في مهند، دقيقتين لقيتو في وشي..

مهند: طبعا جاي وقلبي في يدي كنت خايفك تشريني بعدما وعدت مصطفي وسافر هو مطمئن

انا : افو مريم النصري لما توعد ما بتخلف

مهند : خلاص يابت النصري الراجل الجوه دا لو سالك انك اشتغلتي في مطعم قبل كده قولي ليهو ايوه

انا : علم وينفذ

دخلنا المطعم مهند سلم علي الويترز وطلعنا مكتب المدير.

مستر جاك: مرحبا مهند

مهند : دي البت الحتشتغل بدل مصطفي

مستر جاك: مرحبا بك هل استطيع رؤيه اثبات شخصيك واذن العمل

انا: اوكي تفضل هذا جواز السفر لا احتاج ل اذن عمل انا مواطنه انجليزيه

مهند عاين لي ب استغراب غمزت ليهو وابتسمت

مستر جاك : اوووه هذا عظيم اذن انتي تتحدثين الانجليزيه بطلاقه

انا : نعم الانجليزيه بالإضافة لأربعة لغات أخري .. هنا مهند بالجد اتخلع لمن شهق ههه

مستر جاك: ماهي اللغات الاخري التي تتحدثينها

انا: العربية ، التركية، الفرنسيه ، بالاضافه الي الايطاليه

مستر جاك: هذا رائع..هل لي ان اعرف كيف استطتعي اجاده خمس لغات وانت في هذا العمر

انا: بما انني سودانيه الاصل فالعربيه هي لغتي الام، اتولدت في لند وعشت فيها لعده سنوات وحتي بعدما غادرت لندن دراستي المدرسيه كانت باللغه الانجليزيه، لذلك اجيدها.. المدرسه كانت تحتم علينا دراسه لغه اجنبيه اخري وانا اخترت الفرنسيه. والدتي تركيه الاصل وكانت حريصه علي ان تعلمني لغتها الام فلذلك اجيد التركيه. اما الإيطالية ف انا احب بلدهم وثقافتهم لذلك تعلمت لغتهم قبل 4 سنوات ومازال لدي رغبه في تعلم لغات أخري.. الراجل كضم وماسالني من حاجه تانيه ههههه