اصبح الصباح عمو عمر بعدما شرب الشاي قال لي يلا قومي اجهزي عشان نمشي الاجتماع وقال لماما زينب انتي ذاتك ارح معانا الحيحصل الليله حيعجبك ، انا وماما زينب عاينا لبعض وضحكنا لاننا مافاهمين حاجة.
مشينا الفندق الاجتماع كان هناك لقينا عمو عثمان المستشار القانوني لعمو عمر وبابا ومعاهو تاني محامي ، جو داخلين عمو يوسف وخالتو مني بتبسموا ساي...
عمو عمر بدا الاجتماع، انا الليله جمعتكم عشان اضع النقاط علي الحروف واي زول ياخد حقو عشان كدا ح اوريكم اي حاجه بالتفصيل....طبعا ذي ما انتو عارفين انا ومحمد النصري ابتدت شراكتنا بعد وفاة والده عم النصري الله يرحمو، بدينا بالفندق والمستشفي اي نعم محمد هو شريكي لكن الاسهم بتاعتو كان مسجله ب اسم دكتوره فرح زوجتو (طبعا اكيد حسيتو بالدهشه الاترسمت علي وش عمو يوسف وخالتو مني) حتي فرح في الاول ما كانت عارفه لانو انا ومحمد ما كنا بنطلع اسرار الشغل بره مننا نحن الاتنين، لكن بحكم انو فرح كانت هي المدير الطبي لمستشفي بقت هي ذاتها قريبه من امور الشغل ومحمد كلمها انو هو مسجل الاسهم ب اسمها، فرح اعترضت جدا لانها ابدا ما كانت زوله ماديه وكانت زوله عينها ملانه (الكلام دا طبعا مطاعنه لخالتو مني بالبارد ) محمد كان عندو احساس بالذنب اتجاه فرح لانو هو السبب في بعدها عن اهلها وكان نفسو اي شي ملكو في الدنيا دي يديهو ليها لانها هي اختارتو بالرغم من انو ابوها هددها انو حيحرمها من الميراث. المهم نحن شغلنا مشي كويس والحمدلله وطورنا الفندق والمستشفي وبقت كل سنه بتجينا ارباح عاليه ولانو اولادنا بدو يكبرو انا ومحمد قررنا نواصل في شراكتنا ذي ماهي لكن الارباح دي اي زول يستثمرها بطريقتو. انا فتحت شركه استيراد وتصدير ومحمد فتح شركه طبيه ب اسمو لانها فرح رفضت المره دي انو يسجلها ليها وبقينا كل سنه ب ارباحنا اي زول فينا يشتري ليهو عقار محمد اشتري قطعتين في كافوري ب اسمو وعند بيت في الرياض مسجل ب اسم فرح اهداهو ليها في واحد من اعياد زواجهم ، البيت حاليا مؤجر لشركه وايجارو بنزل في حساب فرح في البنك، وفي بيت في الطائف كان بتاع ورثه واحده من ملاكو دكتوره زميله فرح ولما عرفت منها انو البيت عارضينو للبيع اشترتو فرح، لكن استلمتو بعد 6 شهور يعني قبل اسبوع من وفاتها. فرح كان حلمها تعمل مركز قلب خيري، محمد كان ساعي معها في الموضوع دا شديد اشتروا ارض قبل شهر عشان يبنوا فيها المركز وبدوا في تصريح البناء وباقي الإجراءات كل الورق مسجل ب اسم فرح، وفي شقه في الرياض دي مسجله ب اسم مريم من اول ما اشتروها، بالاضافه لحساب محمد في البنك، وفي حاجه تانيه فرح عندها حساب في بنك في دبي وشقة باسمها دي كان هدية ابوها ليها لما جات تدخل الجامعه. دا يا جماعه شرح لكل املاك محمد وفرح وكلو مثبت بالاوراق مع المستشار عثمان. عمو يوسف عايز يتكلم عمو عمر ثبتوا قال ليهو انا لسه ما خلصت كلامي.
عمو عمر: كلكم عارفين حادث العربية الحصل لفرح قبل سنتين وانها نجت منو باعجوبه، بعد الحادث دا مباشرة فرح كتبت وصيتها والوصيه دي موثقه وقاعده ليها سنتين نسخه عند المستشار عثمان ونسخه كانت مع فرح ومحمد.عمو عمر اتفضل يا عثمان قول الوصيه
عمو عثمان: طلع ورقه مداها لي عمو يوسف وقال فرح كتبت انو جميع املاكها بعد وفاتها تتحول ب اسم اولادها واحفادها العلي قيد الحياة. يعني حاليا جميع املاك فرح بقت من نصيب بتها مريم.
عمو يوسف وخالتو مني هاجوا وجاطوا وماما زينب عايزه تطير من الفرح قالت مال الحلال عمرو ما بضيع
عمو عمر: اسمع يا يوسف اقعد خلينا نخلص من الاجتماع دا لانو اساسا وصلنا للجزء البخصك
الشرع بقول املاك محمد تتوزع عليك وعلي امك ومريم لكن انت طبعا عارف نفسك انت عملت شنو انت استقليت ثقه اخوك فيك ومضيتو علي ورقتين، الورقه الاولي التوكيل العملو عم عثمان والبقول انو محمد اتنازل ليك عن نصيبو انت وامك في بيت نمره2. والورقه التانية التوكيل العام الانت عملتو عند محامي تاني والبقول انو محمد اتنازل ليك عن كل اموالو و املاكو بيع وشراء وللاسف محمد مضي ليك علي الورقتين علي اساس انهم توكيل واحد وبما انك زول ما بتخاف حساب ربنا اكيد ما حتخاف مني ولا حتخاف من اكل مال اليتيمه دي ، ف بالتالي هاك دي اوارق بيت المنشية والشركه الطبية وقطعتين الارض الفي كافوري بالاضافه لرصيد محمد في البنك ديل قانونيا بتاعنك لكن اقسم بالله يا يوسف لو لقيتك انت ولا مرتك ولا اولادك قربتو من مريم ولا من حقها تاني ما تلوم الا نفسك وانت عارف عمر الامين لما يقول حاجه ببقي قدرها مريم خط احمر يايوسف وانا المسؤول عنها ومن الليله ماعايز اشوف وشك لا انت لا مرتك لا في الفندق لا في المستشفي الكلام كدا واضح علي ما اعتقد عندك كلام تاني يا يوسف عم يوسف قال ليهو لا عمو عمر قال ليهو طيب يلا ورينا عرض كتافك انت وحرمك المصون وربنا يهنيكم بمال الحرام.
عمو عمر ياعم عثمان من بكره تبدا في إجراءات تحويل املاك فرح ب اسم مريم
عمو عمر: انتي يا مريم مش بتثقي فيني؟
انا: اكيد ياعمو عمر دي ما دايره سؤال نفس ثقه بابا وماما فيك واكتر
عمو عمر: طيب تمام اذن ماعندك شغله بشغل المستشفي والفندق شغلتك انك تركزي في قرايتك وبس وتبقي لينا اكبر دكتوره انا شغل المستشفي والفندق بقدر عليهم براي ونصيبك حينزل في حسابك ذي ما كان بنزل في حساب امك، ولاني ح اكون مشغول شديد الايام الجايا زينب الحتطلع معاك تمشوا مع عم عثمان تتموا إجراءات تحويل الملكية وحساب البنك وقبل ما تسافري لجامعتك حنسافر دبي برضو نحول ليك الشقه والحساب باسمك
طلعنا انا وماما زينب مشينا البيت انا طلبت منها انها تنزلني في الشقه عايزه اقعد شويه براي وبجيهم في البيت قبل المغرب
بالرغم من الحصل الليله دا لكن نهائي ما ماكنت مبسوطه مافي قروش بتعوض الزول عن اهلو ، وشفت القروش كترتها بتعمل شنو خلت عمي الوحيد بدل ما يحتويني بعد وفاه اهلي بالعكس بقي ضدي يعني هسي انا بقيت من غير اهل ابو ولا اهل ام ، لو ما عمو عمر وماما زينب وسمر ومحمد انا كان هسي بكون وحيده تماما.
يتبع.....
