الصباح لا يتغير ، ولكن كل يوم يأتي بشكل أجمل، عطّر الله صباحكم برضاه.
صحينا بدري انا وسمر.. سمر مجتهده معاي شديد.. جابت الصينيه ختتها قدامي عصير وتوست جبنه وكيكه وكمان ورده، لا لا لا كدا اوووفر
انا : سجمي يا سمر مالك دايره تموتي
سمر: ما تتعودي اول واخر مره بس عشان طولت منك لكن تاني مافي كلام ذي دا، انا طقوسك بتاعت الصباح دي ما بتنفع معاي و الورده دي عشان انتي بتحبي الورد قلت اتم جميلي لكن برضو اول واخر مره
انا : هههههه والله ماقصرتي
سمر: انا بعد شويه ح امشي الجامعه.. انتي برنامجك شنو؟
انا : في راسي في حاجات كتيره ماعارفه ح ابدا بشنو. انتي شيلي مفتاح الشقه انا عندي نسخه بتاعتي معاي
سمر : طيب، بس حتتحركي بشنو. يلا بيتنا سوقي عربيه بابا او ماما
انا : لا ح اسوق عربيه ماما
سمر : يابت كيف حتسوقي عربيه امك، عربيه امك دي واقفه في الباركن من اخر مره ساقتها قبل الحادث
انا : ح اتصرف يا سمر ماحتكون محتاجه حاجه غير تغير بطاريه
سمر : طيب براحتك. لو احتجتي لحاجه اضربي لي..
سمر مشت، وانا لبست وطلعت من الدولاب رخصتي وشهاده البحث بتاعت العربيه والمفتاح وشلت شنطتي وطلعت.. العربيه وسخانه واقفه ليها قريب سنه ما بتقدري تهبشي الباب من بره من التراب خلي تركبي فيها.. كلمت الحارس بتاع العماره جاب لي ولد يغسلها قال ليهو غسلها من بره بالمويه والصابون ومن جوه فوطتها بس وقال لي امشي وديها مغسله احسن.. بقيت قاعده معاهو منتظره الولد يخلص.. ضرب لي مهند
مهند : صباح الخير يا خير سوداني وخليك سوداني
انا : صباح النور هههه متذكر الجمله دي الخلتنا نتعرف
مهند : ودي حاجه بتتنسي، اها بتهببي في شنو؟
انا : ولا شي منتظره الغسال بغسل في عربيه ماما عشان اتحرك بيها
مهند : انتي مجنونه العربيه ما حتدور ليك اصلا دي واقفه ليها زمن ابسط حاجه حتكون محتاجه لبطاريه دا لو ما ظهرت فيها مشاكل تاني
انا : عارفه يامهند والعربيه ما حتكون دايره غير بطاريه، العربيه دي جديده ماما غيرت العربيه قبل الحادث ب اقل من شهرين
مهند : اسمعي يافالحه انتي، خليك مرزوعه في حتتك وما تتحركي الا لما اجيك، كلها 5 او 10 دقايق وبكون معاك
بعد 10 دقايق ضرب لي انا بره في المكان النزلناك فيهو امبارح .. ادخل بي وين
انا : تعال داخل بالعربيه.. ركز حتلقي المدخل بتاع الباركن بنزلك تحت..جاء سلم علينا انا والحارس
