(رب اخ لك لم تلده امك )
تليفوني رن اه اه
ترررن... ترررن.. اه اه �
الحفله اشتغلت من الصباح ما تتخلعو يا جماعه دا صوت المنبه بتاعي �
قفلتو ونمت تاني ، وفجاءه اتذكرت موضوع الشغل قمت ذي المجنونه لبست سريع سريع واتخارجت اتصل علي مهند وانا في البص
مهند : صباح الخيرات
انا : صباح النور من غير ماتسال انا في البص 5 دقايق بصل
مهند: تمام حتلقيني واقف منتظرك بره
وصلت سلمت عليهو ودخلنا عرفني علي الناس الفي الشفت بتاعو واحده منهم كريستينا شكلها كيوت.. كريستينا ساقتني معها غرفه ملابس البنات غير ملابسنا.. وورتني نظام الشغل كيف و التقسيمات اي زول مسؤل من ترابيز محدده قالت لي نحن كلنا حواليك لو في اي حاجه ماعرفتيها اسالينا طوالي، مهند كلمني انك اول مره تشتغلي قلت ليها اوكي تمام
بدا الدوام الموضوع بالنسبه لي تجربه جديده عشان كدا متحمسه اول حاجه رسمت ابتسامه عريضه واتوكلت
الموضوع ابدا ماصعب...المهم انك تحب الحاجه الانت بتعمل فيها..
مهند : بتريق فيني شنو شايله الحاجات باصابعينك كدا ذي الفي بيتكم، بحالتك دي لما توصلي الطلبات بتكون بردت، افتحي يديك ختي فيها الصحن وحسي انك طايره
انا : عاينت ليهو كدا... شكرا علي النصائح مع انك بتتريق لكن كلامك صح
انتهي اليوم الاول بسلام لكن عندي وجع رجلين حاله صعبه مامتعوده علي الوقفه الكتيره رجعت طوالي استشهدت ونمت
تاني يوم بقيت ريلاكس واتعودت علي الوقفه وكمان بقيت بشاغل في زملائي
انا : مهند واحد فول مظبط مع زيت سمسم لعمك جاك في التربيزه رقم كدا
بعد شويه يا مهند بالله واحد منقه مركز لحبوبتك إليزابيث في التربيزه رقم كدا مهند بس بضحك
مهند : شكلي جبتك لطردتي يامريم روقي عليك الله ماممكن ياخ حتضيعي مستقبلي
انا : اوكي خليتك.. يا كريستينا واحد كوارع لخالك أنطونيو، كريستينا مخلوعه قالت لي مهند مريم بتقول في شنو قال ليها بتمزح ما تشتغلي بيها (طبعا يا اخوانا الحوارات المع الخواجات ديل مفروض اكتبها بالانجليزي لكن مافي داعي اكتبها بالانجليزي وتاني اترجمها كدا اوووفر)
استمر الحال علي كدا وبعد كم يوم قدرت احبب الناس فيني ب ابتسامتي وتعاملي ببساطه.. باختصار خليك علي طبيعتك واتعاملي ببساطه حتلقي الناس بحبوك من غير ما تبذلي مجهود
الليله اخر يوم في الشغل العشره ايام مرت كالنسمه ، لكن الليله اليوم غير..في شركه ايطاليه عندهم غداء عمل في المطعم، مستر جاك طلب مني اكون انا المسؤوله من خدمتهم عشان لغتي الايطاليه..قال لي الوفد دا مهم لو اتبسطوا مننا حيتعاقدوا معانا حيقيموا كل اجتماعاتهم الخارج الشركه هنا بالاضافه للسيرفيس في مناسبات الشركه.. قلت ليهو اوكي انا حنسق القاعه ليهم وبما اني بفهم في الثقافه بتاعتهم ممكن اقترح اصناف اضافيه للشيف.. قال لي اوكي نسقي مع المطبخ
