HAUSA ARAB PART 1

HAUSA ARAB,💫💫💫 BY CUTUFANTASIA PAGE FORTY-EIGHT



Kwanakin Mahmud uku kenan cikin garin glascow amma har yau Allah bai sa yayi katari da haduwa da daya daga cikinsu ba. Idan yaje gidan nasu floor din su kullum a kulle yake, kuma babu alamar futa suke suna dawowa wajen yafi kama da ya kwana biyu a kulle ba'a shige shi ba. Hakan ba karamun sake dagula masa lissafi yayi ba har ya shiga tunanin kuma anya lafiyar Safna kuwa? Wayoyinta duka a kulle suke kuma har yau bata waiwaye shi ba, ba ta cika mu'amala da social network ba don haka baiyi mamaki ba da ya duba yaga dadewar da tayi bata hau ba. Sannan yayi mugun fushi da Dr.Garba Galadanci akan gazawa da yayi wajen baiwa Safna tarbiyya mai kyau kamar sauran nashi yayan da yayi wa aure tuni hankalinsu kwance. Bai san cewa hatsabibancin Safna ya girmi kakannin ta bama balle wani Galadanci.
Kwana yayi yana addu'a akan Allah ya kawo masa mafita cikin wannan cakwakiya da yake ciki mai hadarin gaske.
Maganar da Daddy yayi masa tattara ta yayi ya samu wani lungu acan cikin wani loko na zuciyarsa ya adana shi. Fatansa ya kammala da maganar Safna yasan me suke ciki sannan ya fuskanci waccan maganar mai tarin sarkakiya da kulle kulle.
Allah maji roko, a safiyar wannan rana Allah ya hada shi da su Safna. Dawowarsa kenan daga morning walk din shi yazo gidan nasu ya duba ko zai katari! Da ya gaji da tsayuwa gaban kofar shiga gidan Joyful sai ya nemi waje nesa ya zauna yana tunanin kawai gobe zai juya liverpool yasan menene mataki na gaba da zai dauka. Wata farar mota ce tazo tayi parking a gaban gidan, sai ya tsinci kansa da kurawa motar idanu, murfin gefen hagu ne ya bude bayan sakwanni biyu Safna ta futo cikin wata yoluluwar rigar turawa pitch wadda bata rufe mata komai a jikinta ba. Sai wani ubansun hill da ke kafarta wanda igiyoyin sa suka sarkafe gabadaya kaurin ta. Ta saki uban gashi baya wanda ya sha rini kalar brown! Yana cikin wannan mamakin Joyful ta futo da shigar da tafi ta Safna muni suna tafiya suna dariya suka shiga gidan. Shi dai Mahmud kasa katabus yayi, ko hannunsa bai iya motsawa ba saboda madaukakin mamaki da sanyin jikin da ya kama shi. Yana wajen mai motar yaja matarsa bayan sun daga masa hannu.

------------------------------------------------------------

Lokacin da na isa gidansu Ihsan gidan shake yake da mutane duk da babu taron suna sai bayan ta warware za'ayi.
Acan dakin Mummy na same ta tana sauya kayan da ta saka da safe zuwa wani leshi mai azabar kyau. Ta kara fari akan wanda take da shi. Hannu na saka da dau babyn wadda taci sunan mahaifiyar Faisal Rukayya, za'a dinga kiranta Amani. Wayata ta soma ruri na lalubo jakata na dauko ta! Number Mubarak ce don haka nayi swiping na kara a kunnena tare da cewa "hello"
Da wata mummunar ashariyar da ban taba jin irinta ba Surayya ta soma! Sannan ta dora da cewa "Na fahimci har yanzu baki san wacece Surayya Bala ba! Kasada da ganganci na neman jefa rayuwarki cikin masifar da bata da karshe......
Cikin rawar hannu na ciro wayar daga kunnena na saka a speaker. Jin kalaman Surayya ya sanya Ihsan barin daurin dankwalinta ta dawo kusa dani ta zauna tare da daukar Amani ta mayar da ita karshen gadon ta kwantar ta dawo ta zauna itama jikinta yana bari.

"Zaki gane baki da wayo kuma taurin kai bai miki amfani ba a lokacin da kika shigo gidana! Wallahi Zara gara a yanke miki daurin rai da rai a kaiki prison a kulle akan rayuwar da kike shirin jefa kanki. Ba barazana nake miki ba! Inaso ki gane cewa nayi miki adalci ne a lokacin da kika shigo kika ci karo da abubuwan da zasu faru da ke. Kinga sai dai kiyi kuka da kanki ba dani ba tunda nayi miki gargadi baki ji ba! Bar ganin Mubarak na rawar kafa akanki! Hmmm! Zaki sha mamakin yanda reshe zai juye da mujiya da zarar kin tako kafarki gidansa! Wanda baiji bari ba"..........tai wata irin dariya mai razanarwa kafin tace "na barki lafiya kafin ta gagare ki"
Kit!! Ta kashe wayar, tuni hawaye ya jika mun fuska kamar an balle famfo! Jikina sai mugun rawa yake yi. Yayin da kaina yake sarawa kamar ana datsa shi.
A hankali Ihsan tace "yaushe matar nan ta soma kiran ki?" Cikin shashshekar kuka nace "wannan karo na biyu kenan!" Sannan na zayyane mata wancan kiran da tayi mun a mota wanda ya kaini ga kwanciya asibiti. Shiru tayi tana tunani kafin tace "gaskiya Zara na tsorata na wannan matar matuka! Daga yanayin muryarta da yanda take sarrafa kalaman ta zata iya kowanne irin mugun aiki! Allah yana gani hankalina bai kwanta da ita ba sam! Kuma abinda ya bani mamaki kamar sunan Mubarak nagani a screen din ko idona ne?" Girgiza kai nayi nace "number shi ce! Da wayar shi take kira na! Wancan ma da wayar shi ne" cikin fushi Ihsan tace "kan uban can! Wato ya sani ma kenan? Ko kuwa ba ya wajen take bugowa?" A sanyaye nace "ni ina zan sani Ihsan! Wallahi ni bansan inda zan sa kaina ba! Bana son auren nan gabadaya Ihsan! Na tsani Mubarak din shi kansa, ina tsoron sharrin matarsa ina tsoron halin da zan fada Ihsan idan na aure shi!
Wannan wacce irin rayuwa ce? Haka na hadu da Imamu na saba da shi nayi nisa a son shi a karshe mummunar akidarsa ta bayyana. Ban gama warkewa daga ciwon da ya ji mun ba maganar Mubarak ta taso, ba don ina son sa 100% na amsa ba, kawai don naga Mami ta matsu taga nayi auren ne, kuma nima kewar Aisha na sakani naji inaso na bar garin nan na sauya wajen zama ko zan samu sukuni. Toh kawai sai kuma wannan matsalar Ihsan? Ni wacce irin mara sa'a ce?"
Na fashe da wani kukan mai bayyyanar da tsantsar bakin ciki da damuwar da nake ciki.
Sai da itama ta share nata hawayen sannan ta soma lallashina tana bani hakuri tare da kwantar mun da hankali. Dakyar na tsagaita da kukan ina sauke ajiyar zuciya a hankali.
"Yanzu abinda za'ayi ki tambayi Mubarak kiji da saninsa take bugo miki waya da wayarsa ko kuwa? Sannan kiyi masa bayanin komai. Ki kara da cewa idan har yasan ba zai iya rike mata biyu ba ya gaya miki! Kiyi masa barazana mai kyau akan ba zaki dauki wulakanci daga matarsa ba. Sai muga me zaiyi akai! Sannan kinga ba gida daya zaku zauna da ita ba, bama unguwa daya ba, idan kika so babu abinda zai hadaku in ba lalura ba. Don haka ki cire tunanin da kika fara na tsanar Mubarak! ba shine mai matsala ba auren wannan zamanin ne! Duk auren da kika gani yana da irin tashi matsalar da challenge din sai dai kawai na wani yafi na wani zafi! Kuma kowa da akwai ta fannin da ake jarabtar shi. Ki kalli abubuwan da Hajiyar Faisal take mun? Ko sunan ta da ya saka fa ba'a son ranta bane, cewa tayi bata so idan dagaske yana son saka sunanta ya bari sai ya auro wadda ta dace da shi. Har yau fa bata zo ganin babyn nan ba, idan nayi mishi complain yace nayi hakuri zata sakko ne! Zara kinsan dai it is not easy ko? Jurewa da biyayyar wanda baya kaunarka! Wata rana har ji nake ina dana dana sanin auren Faisal! Amma kullum abinda Mummy take ce mun shine ba Hajiyar Faisal ce mai matsala ba irin sigar matsalar auren nawa kenan kawai, saboda kowanne aure dole yana da tashi matsalar idan ma ban auri Faisal ba zan iya zuwa na auri wanda babanshi baya sona ko Dan shaye shaye ko mara tarbiyya ko matsalar kishiya ko ta rashin haihuwa! Babu ta inda matsalar bata shigowa kuma ba zai taba yiwuwa ka guje mata ba. Sai dai kayi addu'a da hakuri Allah ya baka mai sauki ya kuma baka wuyan dauka. Don haka kiyi hakuri kici gaba da addu'a kawai! Kada ki bari Mami ta sani idan ba abun ne yayi zurfi ba don hankalinta ne zai tashi fiye da naki, kina ga duk yanda ta rame tayi sanyi kuma hakan bai rasa nasaba da halin da kika fada a baya da wanda kike ciki yanzu. Ki karfafa zuciyarki! You are strong Zara! Don't let this brake you don Allah" da tarin maganganun Ihsan masu kwantar da hankali na shiga toilet na wanko fuskata na gyara ta sannan muka shiga cikin mutane ana hidimar suna.
Sai magriba na baro gidan Ihsan na wuce gidansu Ya Sofiy. Twins sunyi girma sosai suna ta shan madarar su. Kowanne kamar shi kadai aka haifa gwanin sha'awa! Anan na tarar da Ya Anis tayi shiru tana kallon mutane! Daman ita ba mai yawan magana bace musamman ma da ba hausar ce ta ishe ta ba. Gefen ta na dawo muna yar hira nan take gaya mun ita fa garin su take son zuwa haihuwa! Cikin rashin fahimta nace "meye dalili?" Ta gyara zama tace "kinsan Abie na shirye shiryen komawa Hurgada saboda jikin Mamanshi yayi zafi kuma su biyu kawai yayanta! Yayar Abie is paralysed tsayin shekaru ashirin kenan itama sai dai a kula da ita don haka hankalinsa yafi karkata ta tattara ya koma gida gabadaya! Nima rabona da Hurgada wajen 3years kenan inaso naje amma sam Sadik yaki amincewa" tausayi ta bani don zama a kasa babu iyaye ba danginka yana da wahala! Amma nasan tunda Ya Sadik yace mata a'a ba zai yarda ba. Magana daya yake yi! Ba'a juya shi don haka nayi ta bata hakuri nima ina lallabarta kamar nima ba yanzu Ihsan ta gama yimun hakan ba.
Nace "kinga ko bai bari kinje can haihuwa ba idan kika haiwu kikai arba'in dole zakije ganin gida nima kinga sai na biki naga garin ku"
wani murmushi tayi tsantsar kyanta ya bayyana, a raina na dinga tasbihi ga ubangijin da ya kagi wannan sura. Kyau kala kala ne! Amma kyawun Ya Anis irin wanda zaka yi misali da shi ne! Ga hutu da kwanciyar hankali da suka sauka a jikinta fatar ta kamar mudubi don kyalli da haske! Wani ruwan sarkar agogo ne gold a damtsen hannunta na hagu, yanda kalar agogo ta dace da fatar ta kawai nake kallo ina kara girmama girman Ubangiji. Da agogon da fatar hannun na ta kowanne walwali yake shi kadai. Da na waiwayo kuma na kalli Inno mai yin aikin twins na kalli yanda fatarta take shinning din wani irin baki ga faffadan hancinta da ya bararraje a katuwar fuskarta sai naji bakina yana cewa "subhallahi wa hamdihi subhanallahil azeem"
Sai da ta tabani na ankare da abinda nakeyi na mayar mata da murmushin ta sannan taci gaba da mun bayani cikin harshen English wanda tafi kwarewa da magana da shi bayan larabci.
"Zanyi murna sosai idan hakan ya faru, duk da nasan ba zuwan zakiyi ba saboda lokacin an kusa koma anyi auren ki" dariya nayi nace "I promise you idan har ba auren akayi ba zan raka ki" rungumeni tayi tana cewa tagode kuma na fara shiri tun yanzu!
A nutse nace "wai Ya Anis duka danginku suna Egypt ku kadai ne a kasar nan?" Cewa tayi "gaskiya kusan 80% suna can! Amma akwai close relatives dinmu a America da South Africa da wasu ma a Dubai! Amma sun fi yawa a America!
Cewa nayi "toh su waye a Canada su Mum dinki suka tafi suka dade wajen su?" Murmushi tayi tace "Auntyna ce sunanta Azeeza! Ita wannan ko abubuwa ne masu yawa marasa kyau suka yi ta faruwa da ita na ban mamaki a rayuwa har ya zama tayi losing mind dinta. She has been under psychotherapy bayan ta dawo daga coma da tayi 15years a ciki!"
Cikin zaro ido nace 15years cikin coma? How?" Tace "hadarin jirgin sama suka yi and she survived it" abun ya ban mamaki kwarai! Haka dai muka ci gaba da hirarmu ta yan'uwanta da al'adarsu da garinsu har Ya Sadik yazo! Tare muka tafi suka saukeni a gidan Mami suka wuce.

-----------------------------------------------------------
Mahmud yana zaune akan dan dakalin wani gida jikinsa a matukar sanyaye yayinda kansa ya dau zafi sosai. Duk da yana tsammanin faruwar wani abu amma bai tunanin muninsa zai kai haka ba! A yanayin da yake ba zai iya tunkarar su ba, sai ya tashi dakyar ya rarrafa zuwa masaukinsa ya kudundune cikin bargo zuciyarsa tana nukurkusar ciwo! Da kiran sunan Allah ya samu ya mike ya dauko maganin sa yasha sannan ya koma ya kwanta yana dafe kirjin sa. Bashi ya samu nutsuwa ba sai bayan sallar azahar sannan yayi wanka yayi sallah yayi order abinci ya dan tsakura ya kuma shan magani ya sake kwanciya.
Karfe biyar na yamma ya kammala shirinsa cikin yanayin kayan da ya saka da zai taho, ya rufe kanshi tsaf da hular rigar ya futo fuskarsa babu walwala ko daya.
Yana futowa aka soma yayyafi amma bai juya dauko umbrella ba duk da yana bukatar ta don jikinsa baya kaunar dukan ruwa ko kadan!
A jike ya karasa gidan Joyful kirjinsa na dauke fargabar abinda zai ci karo da shi.
A hankali ya saka hannu zai danna bell din shiga gidan sai yaga alamar kofar a saye kawai take ba'a hade ta ba. Don haka ya tura a hankali ya shiga. Madaidaicin parlour ya tarar a kintse tsaf sai dai wani irin wari-wari da karni da ya futa daban daga room freshener din da akai amfani da shi a falon ya sanya shi toshe hanci. Scanning din falon ya shiga yi, kofofi uku ne a cikinsa kowacce a rufe, kai tsaye ya nufi wadda take kallon shi ya bude! Wayam babu kowa! Ya dawo gefen hagunsa ya kama handle din ya bude a hankali! Take Safna ta bayyana akan dan karamin gadon da ke tsakiyar dakin ta baza kwalaben magunguna a gabanta tana sha. Bai iya kara ko taku daya daga bakin kofar ba ya tsaya cak yana kallon yanda ta futa hayyacinta ta rame sosai! Ya dade tsaye yana kallonta cikin tsananin bakin ciki kafin ya tuna abinda ya kawo shi don haka Wayarsa ya ciro daga aljihu ya bude camera ya soma daukanta ba tare da ya sanya hasken flash ba cikin dauriya da jarumta mai yawa. Sannan ya mayar da wayar aljihu ya juya zai futa sai kawai sukai karo da Joyful!
Hannunta dauke da robobin cocacola guda biyu. Cikin wani irin shock ya tsaya cak jikinta na rawa tana kallon Mahmud Wanda fuskarsa ta rikide ta koma kamar ta zakin da aka daukowa 'ya'ya don tsananin fushi, fuskar sai digar ruwa take yi wanda yake gangarowa daga cikin kansa da ya jike da dukan ruwa.
Sai lokacin Safna ta dago ta kalli kofa ai kuwa kirif suka hada idanu da Mahmud! A bala'in razane ta jefar da kwalbar hannunta ta mike tsaye cikin tsananin tashin hankali mara iyaka! Ko a mafarki bata tsammanin Mahmud ba balle ido biyu. Kasancewar maganin ya soma sama da ita ya sanya jikinta ya saki sosai don haka da rangaji take take takowa tana nufo shi hankalin ta tashe!
Wata uwar tsawa ya daka mata wadda ta sanya Joyful sakin fitsari a tsaye don tsananin firgita, daman ba karamun tsoron Mahmud take yi ba saboda ita kanta tasan ya tsaneta kuma yanayinsa yake bata babu abinda ba zai iya aikatawa ga wanda ya shiga gonar sa.

"Stay there! Kada ki karaso nan! Kar ki sake ki matso kusa dani, babu ni babu ke babu sauran wata alaka a tsakanin mu!  Daga yau bana fatan sake saka ki cikin idona har abada."

Cikin tsananin razana da kaduwa Safna take kallonsa lebbenta sun kasa motsi! Sama sama take gane abinda yake fada don tuni hankalinta ya soma futa daga jikinta! Gane hakan da yayi ne ya sanya shi juyawa ya futa da sauri ba tare da ya kalli Joyful ba domin yasan idan har ya daka ta zuciyarsa babballata zaiyi ya karairayata a wajen  nan ka ya kashe ta. Don haka yayi matukar kokarin danne zuciyarsa ya futa daga gidan ba tare da ya dora hannunsa a kansu ba. A hanzarce ya isa hotel room din sa yasha magani ya cire jikakkun kayan jikinsa ya kwanta amma sam sai numfashi ya soma yi masa barazanar daukewa! Danne kirjinsa yayi da karfi yana wani irin tari yayinda bakinsa ya soma bulbulo da jini. Tuni ya fado daga gadon yana birgima a kasa kafin hankalinsa ya soma fucewa daga jikinsa...............