🥀 ليلى ❤️🥀

الحلقة الأولى

الحلقة الأولى ١
#ليلي
#بوسي_مصطفي

_________________

في احد أحياء مصر الجديدة
وتحديدا في احد العمارات السكنيه اللي بـ تعيش فيها بطلة قصتنا ( ليلى)
في شقة البشمهندس خيري
(والد ليلى).
سامية (الأم)/ شريف خبط ع ليلى قولها ماما بتقولك قومي ساعديها بقى كفايه نوم.
شريف ( محاسب) / مش هتصحى دي نومها تقيل وبتزهقني شوفي عدي يدخل يصحيها.
عدي(٣ث) / معنديش وقت انا داخل ألبس عشان ألحق الدرس.
سامية / درس ايه اللي يوم الجمعه ده؟!
شريف / تلاقيه بيشتغلنا وبينزل يلعب بلاي استيشن ويجي يحكلنا على معاناته في فهم الدرس اللي هو مااخدوش أصلًا.
عدي / لا ياحبيبي هو انا زيك ولا ايه.
شريف / سامعه ياماما؟!
سامية / احترم اخوك الكبير عيب كده.
عدي / اهو بابا صحي اهو هو اللي هيعرف يصحي ليلى.
سامية / خيري معلش خبط ع ليلى قولها قومي افطري بقى عندنا شغل كتير النهاردا.
شريف / ماما انا هتغدا مع بابا غادة.
خيري بيخبط ع باب اوضة ليلى ويرجع يقعد ع السفرة.
خيري / تروح بس متتأخرش.
شريف / ليه يابابا فيها ايه لما اقعد هناك شويه؟
خيري / م انا بقول تروح هو انا قولت لأ بس حكاية حداشر واتناشر بالليل دي مش عايزها تتكرر.
ساميه / وفيها ايه يعني ياخيري دا مبيشوفش خطيبته غير يوم الجُمعة.
خيري / يعني انتي تحبي سليم خطيب بنتك يجي يقعد خمس ست ساعات مع البنت؟!
شريف / انا وغادة يابابا مبنبقاش قاعدين لوحدنا لو دا اللي حضرتك تقصده.
خيري / لا ياحبيبي انا اقصد كمان ميصحش إنك تقعد الوقت دا كله هناك كل واحد عايز يستريح في بيته ولا يمكن يكون عندهم مشوار بره البيت
دا مش من آداب الزيارة.
شريف / لا انا بعمل دا وانا قاصد بقى.
سامية / قاصد يعني ايه؟
شريف / حضرته رافض اني اخد خطيبتي ونقعد في اي كافيه نتكلم براحتنا شويه حاجه تخنق محاوطنا طول الوقت كأني هخطفها واهرب.
خيري / الأصول متزعلش واللي متقبلوش ع اختك متقبلوش ع بنات الناس واظن خطيبتك دي هتبقى مراتك... واجب انك تحافظ عليها.
شريف / باباها اللي دماغه شمال دايمًا... وفاكر يعني إن اول م نقعد لوحدنا هيحصل حاجه مش تمام.
خيري / اولا عيب تقول كده ع الراجل اللي هيبقى جد أولادك ثم الراجل مغلطتش عايز يحافظ على بنته
ثانياً ألفاظك وطريقتك في الحوار خاليه من الأدب والتربيه كمان.
سامية / في ايه بس ياخيري شريف بيفضفض معاك.
خيري / خليه يقوم بقى عشان اعرف أكل.
غمزت ساميه لشريف اللي قام وهو مضايق ودخل اوضته.
سامية / مالك بس ياخيري صاحي من النوم مضايق ليه؟
خيري / مش سامعه ابنك بيتكلم ازاي؟!
ساميه / معلش عديها كل الشباب كده ياحبيبي انت مكونتش زيه ولا ايه؟
خيري / مكناش نقدر نرفع عينا في عين أهلنا ياسامية كان اللي يقوله والدي يبقى سيف علي رقابتي لازم انفذه
لكن الدلع اللي انتي مدلعاه لولادك دا هيجي على دماغنا.
سامية / بقى كده ياخيري دلوقت تربيتي للولاد مش عاجباك؟!
خيري / لا مش كلهم انا عندي ليلى برقبتهم.
سامية / ايوه خليك كده اقعد فرق بينهم بكلامك دا عشان يكرهوا بعض.
خيري / اعمليلي فنجان قهوة بدل اللي برد ده.
سامية / حاضر.
خيري ينظر ببتسامة / صباح النور على البنور.
ليلى تقرب من والداها وتطبع قبله على خده / صباح الخير يابشمهندس.
خيري / مش هنبطل حكاية بشمهندس دي.
ليلى / هو انا بس اللي عندي أب قمر كده ولا في حد غيري؟!
خيري / هههههههههه بكاشه بس بموت فيكي.
ليلى / ايه دا هو مفيش عيش ولا ايه؟
خيري / هاتي عيش ل ليلى ياسامي.
سامية من جوه / خليها تيجي عشان انا واقفه على البوتاجاز القهوة هتفور.
ليلى تقوم وتدخل المطبخ.
ليلى / صباح الخير ياماما.
سامية / صباح النور... افطري وتعالي بقى ساعديني في الأكل عشان لسه هروق الشقة.
ليلى / ايه رأيك اروق انا الشقة وحضرتك تعملي الأكل؟
سامية / مش عارفه انتي بتكرهي المطبخ ليه نفسي أفهم؟!
ليلى / مبحبوش ياماما اعمل ايه بقى؟
سامية / خلاص ابقي قولي ل سليم ميعملش مطبخ في الشقة.
ليلى / هههههههههههههه حاضر.
وخرجت ليلى من المطبخ.
خيري / ليلى هاتي الجورنال اللي ع المكتب جوه يابنتي.
ليلى / حاضر يابابا هو في لسه حد بيقرأ جرايد؟
خيري / قراءة الجرايد دي متعه جيلكو ميعرفهاش وبعدين ازاي بتشتغلي في جورنال وتقولي الكلام دا؟
ليلى / اتفضل يابابا.
خيري / ايه في ايه مالك؟
ليلى وهي عينها ناحية البلكونه مفيش يابابا.
خيري / لا انا سامع صوت خبط في البلكونه.
ليلى / لا دا تلاقي عصفورة بس اللي عامله الدوشه دي.
خيري / عصفورة تعمل كده؟!
ليلى / ثواني يابابا هشوف في ايه حضرتك اشرب القهوة عشان متبردش.
وفتحت ليلى باب البلكونه وقعدت تدور الصوت دا جاي منين وفجأة تنظر فوق
تلاقي سليم واقف وبيصفر لها عشان تخرج.
سليم من فوق / افتحي الفون بتاعي بدل م اجي ل ابوكي اتخانق معاه.
ليلى / حاضر ووطي صوتك بابا جوه.
سليم / م انا عارف ياحبيبتي
افتحي الفون وتعالي عايزك.
ليلى دخلت جوه فتحت التليفون وسليم بيتصل.
ليلى / نعم.
سليم / ايه حكاية التليفون المقفول ع طول دا؟!
ليلى / انت عارف بابا محرج علينا نفتح موبايلاتنا بعد الساعة اتناشر.
سليم / وانا بقى هستحمل الوضع دا لحد امتى؟!
ليلى / معلش ياسليم خلاص هانت.
سليم / بقولك ايه.
ليلى / نعم.
سليم / ابقي استأذني باباكي عشان نخرج النهاردا.
ليلى / مش هينفع.
سليم / ليه بقى؟؟
النهاردا عيد ميلادي.
ليلى / عارفه م انت اخدت هديتك امبارح.
سليم / لا م اخدتش الهدية اللي نفسي فيها.
ليلى / سليم اتكلم كويس.. اوك.
سليم / اسمعي يا ليلى لو مجتيش عيد ميلادي اعتبري اللي بينا انتهى.
ليلى / ايه شغل العيال ده؟!
سليم / اه وفي حاجه تانية كمان لو مجتيش عادي جدا هلاقي اللي هسهر معاها ومش هتبقى خنيقه زيك كده.
ليلى وهي مدمعه/ سليم اقفل.
سليم / اقفلي انتي الأول.
ليلى صرخت في التليفون / متتصلش بيه تاني انت سامع.
وقفلت التليفون
سامية / هي ليلى فين ياخيري؟
خيري / معرفش هي كانت هنا وبعدين..
قطع كلامه خروج ليلى من الاوضه.
سامية / خلصتي فطار يا ليلى؟
خيري / محطتش حاجه في بوقها.
سامية / خلاص خلصي أكل وادخلي اوضة اخواتك نضفيها وانا هدخل المطبخ.
ليلى متكلمتش دخلت جوه ع طول.
شريف / ايه هي وكالة من غير بواب؟!
ليلى / آسفة معرفش انك هنا.
شريف / مالك يا ليلى؟
ليلى / مفيش... ممكن تقوم بقى عشان ارتب السرير ده.
شريف / طيب انا هدخل احلق دقني تكوني خلصتي.
ليلى تخبط ع باب حمام شريف.
شريف واقف بيحلق دقنه / نعم.
ليلى وفي ايدها سيجاره / ايه دي؟!
شريف خرج اخدها منها ورماها في الباسكت.
ليلى / انا بقولك ايه دي؟
شريف / سيجاره... ايه متعرفهاش ؟!
ليلى / بتعمل ايه هنا يعني؟
شريف / كنت مخنوق امبارح نزلت اشتريت علبة وخرجت واحده انفس فيها.
ليلى / انت عارف إن بابا مبيطيقش ريحتها ولو عرف هتبقى مصيبه.
شريف وهو بيقرصها من خدها / وبابا هيعرف منين يا ليلى يا حبيبتي؟
ليلى / طب نزل ايدك وتعالى شيل قشر اللب اللي ع السرير ده.
شريف / م انضف انا الاوضه واريح نفسي.
ليلى / اخلص شيل القشر دا عشان بقرف ولا اقول لبابا.
شريف / الواحد امتى يتجوز ويهرب من البيت ده؟
ليلى / بدعيلك ليل ونهار عشان ارتاح من غتاتك.
شريف / طب اتفضلي كلمي.
كانت سامية بتنادي.
ليلى خرجت من الاوضه / نعم ياماما.
سامية / خلصتي يابنتي عشان تيجي تساعديني.
ليلى / محشي!
لا ياماما ابوس ايدك انا بزهق اوي من لف المحشي ده.
ساميه / افرض سليم طلب...
قعدت ليلى قبل م مامتها تكمل كلامها / حاضر ياماما.
سامية / غسلتي ايدك؟
ليلى تقوم جرى / نسيت.
من جوه وهي بتغسل ايدها / على فكرة ياماما انا عندي مذاكرة وبحث لسه مخلصتوش ياريت بقى ميبقاش في طلبات تانية.
شريف خارج من الاوضه / مخلصتيش الاوضه ليه؟
ساميه / انتي يا ليلى مخلصتيش اوضة اخوكي؟
خيري واقف بيكوي الجلابيه / ومينضفش اوضته ليه هو صغير؟
سامية / يووووه بقى احنا مش هنخلص النهاردت اقعدي يابنتي ساعديني.
_________________