🥀 ليلى ❤️🥀

الحلقة الحادية عشر

الحلقة ١١
#ليلي
#بوسي_مصطفى
______________

في شقة خيري.
سامية في غرفة ليلى وقعده جنبها ع السرير
سامية / مش بكدبك يابنتي انا بس ب سأل ليه شوفتك مدمعه وسليم خارج من الشقة
ليلى / ماما انا عارفه إن حضرتك بتثقي فيه ولو كان عندك شك واحد في الميه مكونتيش سيبتي سليم يخرج غير م تعرفي انا كنت مدمعه ليه
سامية / يعني هو مضايقكيش
ليلى سكتت
سامية / بصي يابنتي انا ست زيي زيك وكنت صغيرة كده برضو وكنت وانا مخطوبه ل باباكي كنا بنتكلم مع بعض واول م تيجي سيرة الحاجات دي كنا بنقفل التليفون مع بعض ع طول عشان الشيطان ميجرجرناش لحاجات تانيه
انا عارفه إن مكتوب كتابك وانه ب شرع ربنا
بقى جوزك بس في حاجات في الجواز مينفعش تحصل غير في النور
يعني لازم تلبسي الفستان الأبيض وتتزفي وأهلك يفرحوا بيكي وبابا يسلمك ب ايده ل عريسك
واخده بالك من يسلمك ب ايده دي
مش انتي اللي تسلمي نفسك
ليلى / ماما كلامك دا بيزعلني اوي انا معملتش حاجه غلط وكوني اني فتحت الباب ل سليم دا لانه كان في ايده حاجات كتير وكان هيدخل يحطها ع السفره ويطلع
بس حضرتك عارفه سليم بقى
سامية / خلاص يابنتي حصل خير
ليلى / ع فكرة بسبب الموضوع دا انا قافله التليفون وهو نازل خبط من فوق في البلكونه عندي وانا مبردش عشان لازم أعلمه درس مينسهوش
وان اللي حصل دا ميتكررش تاني
سامية / لا يا ليلى خلاص عشان خاطري يابنتي سامحيه المرادي ومتبقوش تقعدوا لوحدكو مرة تانيه
ليلى / شويه كده لازم اغلبه شويه
سامية / الواد غلبان وبيحبك بلاش تقرصي جامد عشان الرجاله بتزهق يابنتي مهما كانت بتحب
كفايه عليه كده وافتحي تليفونك بقى
ليلى ببتسامة / حاضر
سامية / هروح اجهز العشا عقبال م باباكي يرجع من بره
ليلى / هو بابا فين
سامية / راح هو وشريف لبابا غادة يشوفه عايز ايه
ليلى / اوبااااا زمان شريف هيطق دلوقت
سامية / دي غادة مبطلتش عياط في التليفون وانا قلقانه مش عارفه قالت ايه لشريف لاقيته قام جرى ع اوضته يلبس وبيتصل ب باباكي عشان يتقابلوا ويروحوا على هناك
ليلى / اما اتصل اطمن
سامية / لأ استنى شويه ولا اقولك متتصليش خالص
اخوكي زمانه ع آخره دلوقت سبيهم لما يجوا نشوف ايه الحكايه
ليلى / مش عارفه باباها عايز ايه كل اللي طلبه اتنفذ في ايه تاني بقى؟!
_________________

في شقة والد غادة
والد غادة / اللي عندي قولته وانتو احرار بقى
خيري / الكلام اخد وعطا ياحاج
والفرح دا بيكون  للأهل بس مش لازم يعني نعزم البلد كلها
والد غادة / انا بنتي لازم يتعملها فرح لا حصل ولا هيحصل في البلد احنا مش شويه يابشمهندس
شريف / ع فكرة ياعمي اللي بيشتري راجل مبيدققش في الحاجات دي
وطالما حضرتك متمسك بشرطك دا فأنا احب اقول ل حضرتك إن دا فرحي انا وانا اللي هكلفه من جيبي يبقى اعمله زي م انا عايز محدش يشرط عليه
خيري / متتكلمش خالص ياشريف
والد غادة / وليه ميتكلمش متخليه يتكلم وياخد راحته اوي
الظاهر يابشمهندس عرفت تربى
شريف بغضب / ع فكرة انا متربي كويس اوي ولو فعلا زي م تقصد كان زماني سايب القعدة دي من زمان
خيري بعصبيه / خلاص بقى ياشريف
والد غادة / طب عشان قلة أدبك دي معنديش بنات للجواز
عبد الحميد / اهدا بس ياحاج مش كده
خيري / في ايه بس ياحاج انت مش شايف انك مدى الموضوع اكبر من حجمه مفيش حاجه تستاهل كل دا
شريف / لا ماهو واضح بيتلكك يابابا
والد غادة ولسه بيرفع ايده عشان يضرب شريف خيري مسك ايده
خيري / اظن عيب اوي لما حضرتك ترفع ايدك وتضرب ابني وانا واقف دا انا عمري م عملتها لا معاه ولا مع اخواته
والد غادة / ابنك محتاج يتربي يابشمهندس
خيري / ابني انا مربيه كويس اوي ياحاج وكتر خيرك لحد كده يلا ياابني
غادة جوه سامعه الحوار كله وبتعيط
حوريه / استغفر ﷲ العظيم يارب
مش عارفه ايه اللي بيحصلنا ده
غادة / اللي بيحصل دا بسبب عند بابا قوليله ياماما اني مش هتجوز حد غير شريف هو عمال يزهق فيه عشان يبعدنا عن بعض
بس انا بقى مش هتجوز حد غيره وحتى لو متجوزتوش مش هتجوز خالص
حوريه / اهدي بس يابنتي
هي قومت شيطان وهتروح لحالها
بره في الصاله
عبدالحميد / اقعد بس يابشمهندس وقول ل ابنك كمان يقعد محدش بيبيع بسهولة كده
خيري / احنا كمان اللي بايعين؟!
حضرتك مش سامع اخوك قال ايه من شويه
عبد الحميد / معلش استحملوا كل دي أمور بسيطه مش مستاهله يعني
وإن كان المشكلة في الفلوس ف انا سداد
وخرج عبد الحميد كام رزمة فلوس من جيبه ووضعهم على الطربيزة
خيري / دخل فلوسك ياحاج الحكاية مش حكاية فلوس
شريف / فعلاً الحكاية مش حكاية فلوس هو في حاجه وانا بدأت افهمها بس ع فكرة انا مش هعمل فرح بميه وخمسين ألف انا هعمل فرح ع قد امكانياتي
والد غادة / يبقى معنديش بنات للجواز
شريف / لا حضرتك فاهم غلط انا مش جاي اخطب بنت حضرتك
دي مراتي ب شرع ربنا
يعني ممكن ادخل دلوقت واخدها من ايدها ونروح بيتنا عادي جداً بس انا عامل احترام لحضرتك ولوالدي وقولت نمشي بالاصول لكن يوم م ترسي ع كده يبقى مفيش قدامي غير اني اخد مراتي كده زي ماهي ونروح بيتنا
والد غادة / سامع ابنك بيقول ايه يابشمهندس
خيري / بص ياحاج عشان ننهي الموضوع دا
الفرح يتعمل في ميعاده ويكون على قد أهلنا وبس قاعة كده محندقه على قدنا نفرح وننبسط كلنا قولت ايه
والد غادة / ابنك بيلوي دراعي
خيري / مفيش لوي دراع ولا حاجه ياحاج مشي بقى الأمور عشان نفرح بالعيال
والد غادة / خلاص موافق
شريف نظر لوالده ببتسامة وخيري بيطبطب ع كتفه
خبري / مبروك ياشريف
اومال فين عروستنا ياجماعه عايزين نطمن عليها
غادة بتفتح الباب ببتسامة / انا هنا ياعمي
سلام عليكم
يرددوا / وعليكم السلام
ينظر ليها شريف ببتسامة
خيري / تعالى اقعدي هنا يابنتي
وشاورلها ع كرسي جنب شريف
نظرت لوالدها اللي كان مضايق
خيري / ايه واقفه ليه متقولها تقعد ياحاج
والد غادة / اقعدي ياغادة
غادة ببتسامة / حاضر يابابا وقعدت جنب شريف
______________