🥀 ليلى ❤️🥀

الحلقة الثانية

#ليلى
__________________
الحلقة ٢
في شقة دكتور مروان.
فريال / طب بس اشرب الشوربه دي وانت هتقوم زي الحصان.
مروان / مش قادر يافريال.
فريال / انا غلبت معاك وانت عامل زي ولادك بالظبط اقعد احايل فيهم ويطلعوا عيني في الأكل.
مروان / طب سيبي الطبق وانا لما يبرد هشربه
هو ريان لسه مجاش؟
فريال / لأ.. سليم هو اللي جوه في اوضته.
مروان / غريبه يعني ايه اللي جايبه بدري كده؟
فريال / معرفش... بس انا حاسه إنه متخانق مع ليلى.
مروان / تعرفي إن البنت دي صعبانه عليه.
فريال / ليه ياحبيبي؟
مروان / ابنك شخصية متعبه اوي والبنت هادية وطيبه مش عارف بقى هتعرف تتعامل معاه ولا نظامهم هيبقى ايه بعد الجواز
دا كل أسبوع لازم يتخانقوا مع بعض.
فريال / بكره لما يتلموا في بيت واحد هيبقوا كويسين أنا كلمت سامية النهاردا.
مروان / كلمتيها في ايه؟
___________

فوق في شقة ( البشمهندس خيري)
شريف بيتكلم في التليفون.
شريف / مش هينفع النهاردا يا غادة.
غادة / ليه بقى؟
شريف / راجع من الشغل تعبان وبعدين غريبه يعني انتي عمرك م عملتيها قبل كده انك تطلبي مني اجيلك؟!
غادة / اصل بابا بصراحه هو اللي عايزك.
شريف / خير !
غادة / معرفش.
شريف / يعني ملمحلكيش بأي حاجه
اتكلم مع مامتك وسمعتي منهم حاجه
ايه ياغادة انتي مش عايشه معاهم ولا ايه؟
غادة / انت عارف بابا كتوم اوي ومبيقولش على اللي في دماغه
انت هتيجي وتتفاجئ.
شريف / بتخوفيني ليه بس؟!
غادة / شريف انت مش هتسيبني صح؟
شريف / ليه السؤال اللي يقلق ده؟
غادة / استحمل بابا مهما يحصل ياشريف.
شريف / اوبااااا طالما وصلت لكده يبقى عرفت اللي فيها.
غادة / هقفل عشان بابا بينادي... سلام.

بره في الصاله.
عدي اخد الفيشار وجه يقعد جنب ليلى.
عدي / وسعي كده يا ليلى.
ليلى / هي يعني محبكتش القعدة غير هنا؟!
عدي بيقلب بالريموت / ايه اللي انتي جايباه ده؟!
ليلى / هات الريموت يا عدي بدل م اقول لبابا.
عدي / عايز اتفرج على الماتش بابا مش عايزني انزل اتفرج عليه في الكافيه اللي تحت هتبقى انتي وبابا عليه.
ليلى / انت مش عندك مذاكرة؟!
عدي / باخد بريك وبعدين هدخل اكمل مذاكرة يا أختي.
التليفون بيرن📞
عدي / اقفلي البتاع دا مش سامع حاجه.
ليلى تنظر لشاشة التليفون وتكنسل.
عدي / سليم ده؟
ليلى / عدي هو انت ممكن تعملي خدمة.
عدي / اوي اوي... بس دا لو اقدر يعني.
ليلى / انزل ل سليم قوله ليلى نامت وطلبت محدش يصحيها معلش أنا قفلت فونها عشان بابا بيضايق من صوته.
عدي / ايه دا بقى؟!
ليلى / انزل قول له كده بس.
عدي / طب م تعمليه سايلنت وريحي نفسك.
ليلى / لا عشان ميتصلش تاني وبعدين انا قفلته اصلا..  تصبح على خير.
عدي / مش هكدب انا... ها مش هكدب.
ليلى / ياسلام!
يعني حضرتك معملتهاش قبل كده؟
عدي / انا ثانويه عامة ولازم امشي مستقيم.
ليلى / والكرة دي ايه بقى؟!
عدي / ترويح مجرد تنفيس عن النفس.
ليلى / هههههههههه هو مدرس اللغة العربية بتاعك اسمه ايه؟
عدي / الأستاذ فهمي.
ليلى / هههههههههه ابقى قابلني لو فلحت.
عدي / اقابلك فين؟
ليلى / هههههههههه مش هقولك تصبح على خير.. وبعدين أنت كده مش هتكدب لإني فعلاً داخله أنام.. سلام.
_________