🥀 ليلى ❤️🥀

الحلقة ٥٥

الحلقة ٥٥
#ليلى
#بوسى_مصطفى
_____________

بعد م حدف سليم التليفون ع الكرسي اللي جنبه وسايق وهو متغاظ من الكلام اللي قالته صافي
وبيفكر معقوله يكون حصل حاجه بيني وبينها؟؟؟
طب ازاي ياسليم.. معقوله؟؟ لا لا
انا متأكد مفيش حاجه حصلت بيني وبينها
طب انا لما دخلت الشقة لاقيت ليلى نايمه ع السرير حضنتها ونمت
اللي مكانتش ليلى طبعاً
كانت الهانم صاحبتها!
شوفتي ياليلي حطتيني في موقف زباله ازاي وخلتيني اسمع كلام من البنت دي
عمري م توقعت ان اسمعه!
طب هي بتقولي الكلام دا ليه ؟؟
انا نمت محستش بنفسي كنت راجع تعبان حتى مبصتش في وشها اللي كنت فاكرها مراتي طبعا
طب لما قامت صافي تجري ووقعت في الأرض وانا قومت على الدوشه اللي حاصله في الاوضه
قالتلي ان رجلها اتعورت
معقول يكون دا؟
لا لا ياسليم انت بتقول ايه؟؟؟!
لو حصل حاجه فعلاً مكانتش هتسيبك وتنزل ومعقوله يعني مقاومتش لو حتى انا متهبب ومش داري بنفسي؟؟؟
وبعدين هو انا كنت شارب حاجه ومش داري بنفسي ولا ايه؟؟؟؟
كلام مش منطقي اصلا وميصدقش هي كدابه ودا حوار عاملاه
بس ليه معقوله لو حتى بترسم إنها تتجوزني تبيع صاحبتها بالطريقة القذره دي
م انت عارف ياسليم إنها بتغير من ليلى
فاكر لما كنت انت وليلى في المركب في شرم وبتقدم ل ليلى هدية عيد ميلادها
فاكر نظرتها ليك ول ليلى
اللي من وقتها قررت إن ليلى تبعد عنها
بس ليلى غبيه وعنديه ومستحيل تقتنع غير ب اللي في دماغها
كل الحوار دا كان بيدور في دماغ سليم
وكان حاسس إنه في كابوس
وبيدعي إن كلام صافي دا يطلع كدب
سليم / لا انا متأكد من نفسي اكيد البنت دي كدابه
معقوله توصل بيها الجرأة إنها تألف حوار قذر بالشكل دا عشان؟؟؟
ولا يمكن صادقة فعلاً بس مش انا اكيد حد
يقاطع نفسه / لا... استغفر ﷲ العظيم
مالك بس ياسليم انت مش واثق من نفسك؟
يبقى خلاص ولا كأنك سمعت حاجه
بس هتشوشر عليه وهتقول ل ليلى
وليلى مجنونه بتصدق ع طول أي كلام يتقالها
اسكت البنت دي ازاي؟؟؟؟
تليفونه يرن مرة تانيه
سليم / الو... ايوه ياليلي
ليلى / سليم انت فين ومبتردش ليه
قلقتني عليك
سليم / معلش ياحبيبتي كنت مشغول
البسي وجهزي الولاد عشان جاي اهوه قدامي ربع ساعة واكون تحت البيت
إن شاء ﷲ
ليلى / طيب  احنا مستنينك عشان نتعشا مع بعض
سليم / لا عشا ايه
انا تعبان ياليلي مش هقدر اطلع
ياريت لو عدي عندك ينزل معاكي بالولاد
ليلى / ياااه للدرجادي ياسليم
سليم / معلش مش قادر اطلع بجد
ليلى / خلاص على راحتك... سلام
وقفلت ليلى التليفون
سامية / سليم كلمك ياليلي
ليلى / اه ياماما كلمني
هدخل ألبس
سامية / طيب هجهز السفرة عقبال م سليم يجي
ليلى / متعمليش حسابنا ياماما عشان سليم راجع تعبان ومش هيقدر ياكل
سامية / ايه دا بقى؟؟
طيب وانتي يابنتي
ليلى / وانا كمان مش قادرة ياماما
ودخلت ليلى جوه لبست وغيرت هدوم الولاد
وقعدت مستنيه اتصال سليم
سليم يتصل / ليلى انا واقف تحت
ليلى / ثواني نازله
دخلت لعدي اللي كان بيقفل الكتاب عشان ينام
عدي / في حاجه ياليلي
ليلى / معلش ياعدي تنزل معايا بس لحد تحت عشان معايا شنطة الولاد ومش هعرف انزل بيهم لوحدي
عدي قام من على المكتب / حاضر
بس هو انتي هتمشي لوحدك
ليلى / لا سليم واقف تحت
عدي طبعاً سأل نفسه / سليم مطلعش ليه
عدي ل ليلى / طيب هاتي الشنطة دي
واخد آدم والشنطه
وليلى نزلت ب ببتها بعد م استأذنت باباها ومامتها
قرب سليم ياخد من عدي الشنطه فتح الباب الخلفي للعربية ووضع الشنطه واخد آدم قعده في الكرسي الخلفي  في كرسي البيبيهات واخد مريم وقعدها جنب آدم
عدي / تصبحو على خير
سليم / وانت من اهل الخير
كانت ليلى ركبت قدام جنب سليم وهي ساكته طول الطريق ومش عايزة تفتح معاه اي حوار لحد م وصلوا قدام العماره اللي ساكنين فيها
اخدت ليلى بنتها وطلعت
واخد سليم الشنطة والولد وقفل العربيه ولاحقها ع باب الاسانسير ركبوا ومازال الاتنين في حالة صمت
سليم باله مشغول في اللي حصل الليلة وكلام صافي ليه
وليلى عماله تفكر / ياترى متغير معايا ليه ياسليم
زعلان مني في حاجه
ولا الموضوع ملوش علاقة بيه
خرجوا وقرب سليم نزل الشنطه وفتح باب الشقة ودخلوا كلهم
وقفل الباب
دخلت ليلى تنيم ولادها اللي كانوا نايمين اصلا
آدم نام على كتف سليم وهو شايله ومريم كمان
رجعت اوضتها عشان تغير هدومها كان سليم غير هدومه وقعد بره قدام التليفزيون لكن كان سرحان في كلام صافي
وليلى فكرت تخرج تتكلم معاه ولا تنام
اخترعت اي حوار عشان تفتح معاه كلام
ليلى / هتتعشا ياسليم
سليم / لا مليش نفس
قربت ليلى وقعدت جنبه / مش عايز تقولي مالك
سليم / مفيش انا كويس
ليلى / طيب تصبح على خير
ودخلت ليلى جوه عشان تنام معرفتش تنام وعماله تتقلب
وسليم نايم على الكنبه اللي بره
عمال يتقلب هو كمان والتليفزيون شغال
______________