🥀 ليلى ❤️🥀

الحلقة ٤١

الحلقة ٤١
#ليلى
#بوسى_مصطفى
______________

في طنطا... في المستشفى
عواطف قاعدة ع الكرسي جنب السرير اللي نايمه عليه دعاء
عواطف / الحمد لله... إنك قومتي بالسلامة يا دعاء دا انا كان قلبي هيوقف من الخوف عليكي
ومكونتش هسامح نفسي ابدا لو حصلت اي حاجه بعد الشر
دعاء / وانتي ذنبك ايه بس
عواطف / بتعيطي ليه بس
محدش يعرف الخير فين يابنتي
دعاء / صعبان عليه اللي كان في بطني نفسي كنت احضنه واملي عيني منه
عواطف / معلش يابنتي
يمكن في خير جايلك في الطريق محدش يعرف
دعاء / خايفه اكون انا السبب في اللي حصل دا
عواطف / وانتي يعني كنتي تعرفي إن دا هيحصل
دعاء / بس كنت لسه بقولك من يومين إن أوقات بتمنى إن الحمل ميكملش خايفه اكون السبب ف اللي حصل ده
عواطف / انا حاسه بيكي يابنتي بس هتاخديلك كام يوم كده عقبال م تحاولي تنسى اللي حصل وهتبقي كويسه اوي واحسن من الاول كمان
دعاء / هو مين اللي بره سامعه صوت حد بيتكلم
عواطف / دا الأستاذ كمال جه مع عمك غريب
بصراحه يشكر ع اللي عمله دا كان عايز ينقلك من المستشفى دي
وقال هيتكلف بكل المصاريف بس الدكتور قال مفيش داعي
وانك كويسه... الحمد لله
وتقدري تخرجي بالليل من المستشفى
دعاء / كتر خيره
عواطف / كويس إن كان معاكي شهادة الميلاد بتاعتك
عشان يسجلوا بياناتك
وعلى فكرة طلبوا موافقة اهلك
بس عشان الحالة كانت مستعجله الدكتور مكانش قدامه حل غير إنه يدخلك اوضة العمليات ع طول
دعاء / وهما لسه عايزين اهلي
عواطف / متخافيش احنا قولنا للأستاذ كمال ع كل حاجه
دعاء / قولتوله ايه
عواطف / قولنا إنك هربانه من أهلك ومش عايزة ترجعيلهم
دعاء / ليه
عواطف / عشان يبقى معانا يابنتي بصراحه قلقنا من الموضوع دا ندخل في سين وجيم ولا حاجه قولنا يبقى في حد معانا ويكون عارف الحكاية كلها بس طبعاً معرفش إن جوزك عايش
دعاء / طب كويس
انا عايزة اخرج من هنا بسرعه
عواطف / استنى عشان لسه الدكتور هيجي يطمن عليكي ويكتبلك خروج مينفعش نخرج مننا لنفسنا كده
______________

قدام الجورنال ليلى نزلت من عربية سليم بسرعه وهي بتشاورله يركب ويمشي
لكن فضل واقف لحد م دخلت جوه
كانت صافي واقفه جوه ع السلم
كملت ليلى طريقها لفوق وتجاهلتها تماما
صافي / ليلى انا عايزة اتكلم معاكي
ليلى / مفيش كلام بينا ياصافي
صافي / ماهو انتي لازم تفهمي الموضوع
عشان دماغك متروحش لبعيد
ليلى / اعتبريني مشوفتش حاجه
لو سامحتني سبيني ادخل اشوف شغلي
صافي / انا وصلاح في حكم المخطوبين وانتي عارفه إن الكلام دا عادي يعني
ثم انا كنت برد على كلام قالهولي معجبنيش عشان كده قولتله الكلام دا
ليلى / هو عادي يعني انك تقولي الكلام دا
وبعدين مشوفتيش الصورة اللي بعتيها ليه بالغلط طبعاً
صافي / صورة عادية متصوراها في البيت فيها ايه دي
ليلى / خلاص طالما مفيهاش حاجه جيالي ليه
اعملي اللي انتي عايزاه انتي حره
صافي / ع فكره طريقتك في الكلام وحشه اوي
وانتي لو مش صاحبتي وبحبك مكونتش جيت وقولتلك الكلام دا بعد البلوك اللي انا اخدته
ليلى / ممكن توسعي بقى عشان ادخل انا متأخره وعندي شغل لازم يخلص حالا
صافي / مش قبل م تفوكي البلوك وتقوليلي انك مصدقه اللي قولتهولك
ليلى / وانا كلامي يفرق معاكي في ايه
طالما انتي مقتنعه باللي بتعمليه يبقى مش فارقه بقى
صافي / متبقاش دماغك جزمه قديمه بقى
ليلى / خلاص ياصافي روحي شوفي شغلك
صافي / من غير نفس كده
ليلى / قوليلي الأول انتي اتخطبتي امتى
صافي / لسه متخطبتش بس هيكلم بابا قريب
ادعيلي بقى يا ليلى
ليلى / خدي بالك من نفسك ياصافي عشان انا مش مستريحه للموضوع ده
صافي / انتي دايما قلوقه كده
متخافيش انا صافي ياحبيبتي ولا لسه هتعرفيني
ليلى / اوكيه سبيني بقى اشوف شغلي سلام
صافي /"فوكي البلوك ياندله بقى
ليلى / حاضر
___________