🥀 ليلى ❤️🥀

الحلقة ٦٥

الحلقة ٦٥
#ليلى
#بوسى_مصطفى
_________________

في قسم الشرطة
سليم قاعد في مكتب الضابط
الضابط / قولت ايه في الاتهامات اللي اتوجهت ليك يااستاذ سليم
سليم / حضرتك مدام صافي موجوده ممكن تسألها
هل الكلام دا حصل فعلاً
ولا الأستاذ عزت بيبتزني لهدف في دماغه
عزت / ممكن تتكلم بأسلوب افضل من كده
سليم / انا بحاول امسك اعصابي ع قد م مقدر
عزت / لا ياشيخ م تيجي تضربني احسن
سليم / لا انا متربي ومش هعمل كده
الضابط / وبعدين معاكم
استاذ سليم احنا هنستدعي مدام صافي وهي اللي تقولنا بقى
بس حضرتك هتستني معانا شويه
شاور للعسكري اللي اخد سليم وخرجوا من المكتب
كان مروان وخيري واقفين بره
جريوا ع سليم اول م خرج من المكتب
مروان / في ايه ياسليم قابضين عليك ليه
سليم / الأستاذ عزت بيتهمني اني ضربت بنته ورشيت عليها مياة نار
خيري / وانت عملت كده
سليم / لا طبعا ياعمي
هو مش زعلان عشان هطلق بنته فحب يلفقلي اي تهمه

بعد شوية جات صافي
وانكرت الاتهامات اللي توجهت ل سليم
وفي نفس الوقت كان بيتحقق مع صلاح اللي اعترف بكل حاجه
استدعوا عزت اللي كان واقف قدام مكتب الضابط
دخل جوه وعرف كل حاجه واكدت صافي إن هو دا اللي حصل فعلا
خرجوا من القسم
واتفقت صافي مع سليم إنهم هيروحوا ل المأذون بكره عشان يطلق وهتتنازل صافي عن المؤخر اللي كتبه سليم ليها
طبعا والدها مضايق وغضبان منها ومنتظر بس لما يرجعوا البيت عشان يعاقبها
صافي عارفه إنها لو رجعت مع باباها مش بعيد يقتلها خرجت من القسم ع شقة سليم تبات فيها الليلة وبكره تفكر هتعيش فين
لانها خلاص مستحيل تعيش مع والدها بعد م عرف كل حاجه

سليم ل خيري / متشكر اوي ياعمي
خيري / على ايه بس ياابني احنا جيران قبل كل شيء
مروان / جيران بس يابشمهندس
احنا أهل ياراجل نسيت إن دا جوز بنتك ولا ايه
خيري / لا منستش
بس كمان ليلى مكانتش تستحق كل دا يادكتور
مروان / سوء تفاهم... وهيتصلح
إن شاء ﷲ
تليفون خيري يرن
خيري / بعد اذنكم
ووقف خيري بعيد شويه يكلم ساميه
سامية / انت فين ياخيري
خيري / لما اجي هقولك.. مسافة السكه مش هتاخر
بس مال صوتك ياسامية
انتي تعبانه
"" صوتها كان تعبان وهي بتكلمه حابسه دموعها وقلبها بيدق بخوف ""
سامية / ليلي ياخيري
خيري / مالها ليلى ياسامية
جرى سليم ناحية خيري اول م سمع اسم ليلى
سامية / ليلى لسه مرجعتش البيت لحد دلوقت وتليفونها مقفول
سليم / مالها ليلى ياعمي
خيري / ثواني بس ياسليم
سامية وانهارت بالبكاء / هو سليم معاك؟؟؟
قوله يدور عليها ياخيري
انا قلبي مش مطمن
خيري / طب هحاول اكلمها يمكن تكون فتحت تليفونها
سامية / عدي اتصل بالجورنال زمايلها قالوا إنها نزلت من بدري
وهي كانت هنا قبل المغرب جات ب دعاء ونزلت ع طول ولما سألتها رايحه فين
قالتلي وهي بتجري ع السلم
لما ارجع ياماما هقولك
واديلها اكتر من خمس ساعات بره لا جات ولا اتصلت
انا خايفه عليها ياخيري
خيري كان بيحاول يطمنها لكن هو كمان كان قلقان
خيري / اهدي ياسامية... ليلى بخير متقلقيش
سامية بتبكي / يا رب
كلمني لما تلاقيها ياخيري
خيري / حاضر... مع السلامة
قفل خيري مع سامية
وسليم واقف قلقان سمع المكالمة طبعا
وبيتصل ب ليلى... التليفون مقفول
سليم بخوف وقلق / ردي بقى ياليلي
خيري / انت بتتصل ب ليلى ياسليم
سليم / تليفونها مقفول ياعمي
مروان / في حاجه ياسليم
مالك يابشمهندس
خيري / ليلى خرجت من البيت من حوالي خمس ساعات لا رجعت البيت ولا اتصلت بمامتها
وتليفونها مقفول
سليم / ليلى كانت معايا في المطار
خيري بلهفه / امتى ياسليم
سليم / من حوالي تلات ساعات ياعمي
خيري / طب ماهو عدي اتصل ب الجورنال وقالوا إنها نزلت من بدري
هتكون راحت فين
سليم / هي كانت معايا لما اتقبض عليه في المطار وكانت جايه ورايا
بس معرفش راحت فين التفت ورايا ملقتهاش
قولت يمكن خرجت بسرعه تشوف تاكسي عشان تلحقني ع هنا
لكن اتلهيت في اللي انا فيه و م اخدتش بالي هي ازاي مجتليش ع هنا
خيري وهو ايده بتترعش / يمكن تكون عند شريف
وفجأة التليفون يوقع من ايده ع الارض
ينزل سليم ياخد التليفون
مروان بيحاول يهدي خيري اللي كان جسمه بيرتعش من الخوف ع بنته
الساعة واحده بعد نص الليل
وبنته مرجعتش البيت وتليفونها مقفول ونازله من البيت من بدري ومرحتش الجورنال من الصبح لانها كانت مع دعاء في المستشفى
ومفروض ربيع هربان كل دا خلاه يفقد توازنه
وكان هيوقع على الأرض سنده مروان وسليم
وبدأوا يدوروا في المستشفيات واقسام الشرطة
وعدي كمان كان خرج من بدري يدور عليها ويسأل اصحابها ويروح الأماكن اللي متعوده ليلى تروحها
زي كافيه قريب من الجورنال
ومطعم متعوده تاكل فيه
يمكن حد شافها النهاردة يقوله امتى شافها عشان يحدد هي متغيبه من قد ايه
وبالنسبة لشريف فهو مكانش معاهم وميعرفش أي حاجه
لإنه كان في المستشفى مع حماته وغادة اللي كانوا منتظرين انتهاء الإجراءات عشان يخرجوا ب والد غادة يتدفن
____________