🥀 ليلى ❤️🥀

الحلقة ٦٤

الحلقة ٦٤
#ليلى
#بوسى_مصطفى
_______________

في شقة خيري... ع السفرة
عدي قاعد وبيمد ايده عشان ياكل
سامية / استنى لما بابا وليلى يجوا
عدي / ليلى قالت مش هتاكل
خيري جه وبيقعد / امال فين ليلى ياسامية
عدي / انا سألتها هتاكلي قالت مليش نفس
خيري / ليه... وبعدين جايه من الجورنال بدري النهاردة مش قالتلك ياسامية انها هتتاخر
سامية / معرفش مالها ياخيري
جايه من بره مش طبيعيه وهاريه نفسها من العياط
بسألها مالك.. تقولي مفيش حاجه
ابقى ادخل اطمن عليها
خيري قام قبل م يبدأ اكل
سامية / رايح فين
خيري / هدخل اطمن على بنتي
سامية / طب كل الأول انت مش دخلتلي المطبخ تستعجلني وبتقول إنك جعان اوي
خيري / يعني اقعد اكل واسيب بنتي جوه مش عارف فيها ايه
بيخبط خيري على باب غرفة ليلى
ليلى وهي بتمسح دموعها / مش هاكل ياماما
خيري / انا بابا ياليلي
ليلى اول م سمعت صوت باباها بكيت ووضعت ايدها ع بوقها عشان صوتها ميطلعش
خيري / ادخل ياليلي
ليلى بتردد / اتفضل يابابا
طبعاً خيري حاسس ببنته
وعارف هي ليه حابسه نفسها في اوضتها اكيد الموضوع ليه علاقه ب سليم
دخل خيري.. وليلى لابست النضاره عشان م ياخدش باله إنها كانت بتعيط
لكن صوتها وعيونها اللي ظاهره من تحت النضاره مبينه انها منهاره وبتبكي
قعد خيري جنبها وهو بيفكر يهديها ازاي
خيري / مالك ياليلي
ليلى / الحمد لله
خيري / الحمد لله على كل حال
يابنتي
بس قوليلي عامله في نفسك كده ليه
ليلى صوتها مخنوق ومش قادره تتكلم هيبان إنها بتبكي وهي عايزة تفضل قدام باباها قويه عشان ميتعبش عشانها
خيري قرب اكتر وحاوطها بدراعه
وضعت ليلى دماغها على صدره وجسمها بيتنفض وبتبكي اخدها خيري في حضنه
وهو بيبكي عشانها
خيري / ايه اللي واجعك ياقلب بابا
ليلى / قلبي... قلبي يابابا اتكسر
خيري / لا ياليلي انتي أقوى من كده
ليلى / هو انا غلطت في ايه يابابا
خيري / مش فاهم سؤالك
ليلى / يعني غلطت عشان كنت بدور على الحقيقه... غلطت عشان كنت بحمي بنت استنجدت بيه... غلطت عشان حبيت اجيب حق طفل اتقتل
يابابا... يبقى جزائي إن بيتي بيتهد بالشكل دا
خيري / لا ياليلي انتي مغلطيش
ليلى / مش دا يابابا اللي ربيتنا عليه إننا ننصر الحق وندافع عن المظلوم ومنتخلاش عن حد محتاجنا ومنبخلش أبدا إننا نساعده
خيري / مش انا اللي بقول ياليلي
دي تعاليم دينا يابنتي
ليلى / طب كل اللي عملته إني مسكتش عن الظلم وحاولت انصر المظلوم
غلطت في ايه بقى عشان سليم ب يعاقبني وعايز يطلقني
خيري / مش دي رغبتك ياليلي
ليلى / بابا انا بحب سليم ومتمسكه بيه ومعنديش إستعداد إني اخسره
خيري / حيرتيني معاكي ياليلي
قومي يابنتي اطلعي اقعدي معانا بره متقعديش لوحدك
هنا
ليلى / معلش يابابا تعبانه وعايزة انام
خيري بحزن ويطبطب عليها / تصبحي على خير ياليلي
_________

قدام شقة سليم ريان يرن الجرس
سليم كان بيتكلم في التليفون قام فتح الباب
ريان ببتسامة / سلام عليكم
سليم للمتصل / اوكيه نتقابل بكره الصبح ونتفق ع كل حاجه
سلام
سليم ل ريان /"وعليكم السلام
ادخل ياريان
ريان / ايه عندك شغل ولا ايه
سليم / لا ابدا اديني قاعد اهوه
وقعد سليم وقرب ريان قعد جنبه
سليم يرفع صوت التليفزيون
ريان / ايه الاخبار
سليم / اخبار ايه
ريان / عرفت من بابا إنك هطلق صافي
سليم /" اه
ريان / طب هي عامله ايه دلوقت
سليم /  يعني هتعمل ايه
لسه بتشوف دكتور تجميل واحتمال تسافر قريب
ريان / وليلى
سليم مردش
ريان / ايه سؤالي ملوش إجابة عندك
سليم / مالها ليلى ياريان
ريان / يعني متفقتوش على حاجه
سليم / اه انا قولتلها طالما دي رغبتك.. هطلقك عشان تستريحي وانا استريح
ريان / اتجننت
سليم / لا عقلت ياريان
ريان / فين العقل في اللي بتقوله ده
سليم / عشان تعبت ومحتاج استريح بقى
بقالي حوالي سبع سنين تعبان
وظالم قلبي معايا قررت إني اريحه يمكن حياتي تتعدل
ريان / انت بتضحك على نفسك ياسليم
سليم / مش فارقه صدقني
معندكش حد يشتري الشقة اللي في أكتوبر
ريان / هتبيعها ليه
سليم / ملهاش لازمه عندي
ريان / سيبها ياسليم
سليم / محتاج فلوس عشان ادفع مؤخر ليلى واخد فلوس معايا
ريان / اسمع ياسليم انت تسافر تخلص شغلك هناك يمكن الأمور بينكم تتحسن وبعدين تبقى ترجع تاني
دا رأيي
سليم بصوت مخنوق وهو حابس دموعه / تعبت يااخي... تعبت
ريان / ممكن افهم ايه الحكاية بالظبط
عشان انا بجد مبقتش فاهمه حاجه
سليم / اكتشفت اني كنت طرف في لعبه قذره كل ذنبي اني حبيبتها مكونتش مصدق انها بقيت ليه
كنت حاسس اني خلاص حققت كل أحلامي
كانت أجمل وأهم حلم حلمته في حياتي
لما اتحقق فوقت على كابوس
وعرفت إن كل دا كان وهم
الحب مش اهم هدف نعيش عشانه
في حاجات تانيه اهم
ريان / اول مرة اسمعك بتقول الكلام ده
الحب إحساس جميل ياسليم
متحرمش نفسك منه  لانك انت اللي هتتعذب صدقني وبعدين طالما عايش الدور اوي كده وبتقول هطلق ليلى
طب مستني ايه م تروح تطلقها
نظر سليم ل ريان وسكت
ريان / عرفت انك بؤ على الفاضي
لا هتطلق ليلى ولا هتقدر تبعد عنها انا متأكد وهي كمان مش هتقدر تبعد عنك
ياابني دا انا كنت ببقى قاعد جنبك اكلمك وانت سرحان وهيمان فيها تقولي هطلقها
قوم معاكي يلا
سليم / سيب ايدي يا ريان
مش رايح في اي حته
ريان / ياابني انا مزاجي رايق الليلة وقولت اعزمك ع العشا يلا مش خسارة فيك
سليم / انت رايق لكن انا زي م انت شايف كده حالتي النفسيه صفر
فمش فايق للخروج والفسح والكلام دا
سيبني ياريان وافرح مع نفسك
اقولك كلم مراتك وانزلوا اتعشوا مع بعض
ريان / تصدق هسمع كلامك واكلم لين دلوقت ونخرج نتعشا بره وخليك انت في الجو الكئيب اللي انت عايش فيه دا... سلام ياحبيبي
سليم / مع السلامة
خرج ريان وقفل الباب قام سليم يدخل اوضته... قعد ع السرير وهو بيفكر في اللي حصل النهاردة والكلام اللي قالته صافي ودموع ليلى واعتذارها ليه
سليم بيكلم نفسه / هو انا ليه مش قادر اسامحها مع اني هموت دلوقت واشوفها
يمكن عشان اللي حصل مكانش سهل ابدا
ورطت نفسي في جوازه تانيه ومشاكل لسه معرفش هتنتهي ع ايه باباها مش هيسكت
انا ازاي قبلت اتجوزها
ازاي صدقتها مع اني كنت واثق من نفسي.. بابا كمان مرحمنيش خلاني اشوف في جوازتي منها حل للمشكلة عشان تسكت ومتشوشرش عليه ولا ع اهلي
خوفت ع سمعت بابا وع اسمه وكمان خوفت ع ريان وولادي
لكن ضحيت ب ليلى وانا عارف انها مستحيل ترجعلي بعد م اطلق صافي
ايه ياسليم مترسي على بر بقى
ناوي تسامح ليلى يبقى روحلها وقولها مش قادر ابعد عنك انا مستحيل اطلقك
طب لو فعلا عايز تطلق طب مبتطلقش ليه زي م قال ريان
اكيد بتحبها
ياابني اتكلم بقى واعترف
انت بتحبها ومتقدرش تبعد عنها
كنت بتأنب ضميرها صح؟؟؟
اه هو كده فعلاً
ليلى دي روحي حد يبعد عن روحه يامغفل
انا اتجننت ولا ايه... بكلم نفسي وارد عليها
جننتيني ياليلي... ياترى عامله ايه دلوقت بعد الكلام الدبش اللي قولتهولك
ايه رجعت تحن ليها تاني؟؟؟
م احنا قولنا متقدرش تبعد عنها
اااااه يا دماغي... خلاص مبقتش قادر.
وغمض عينه عشان ينام
________