အနက်ရောင် ကောင်းကင် (Unicode)

Part (3)

အနက်ရောင် ကောင်းကင်

🌸pann

Part (3)

ရိုးမယ် အမေနဲ့အဆင်မပြေဖြစ်လိုက် ပြန်အဆင်ပြေလိုက်နဲ့ နေ့ရက်တိုင်း လတိုင်းဖြတ်ကျော်လာခဲ့ရသည်.. ။

အမေကလည်း ရိုးမယ်မကြိုက်တဲ့ အလုပ်ကို လုပ်နေဆဲပါ.. ယောကျာ်းကြီးတွေနဲ့ တွေ့ဆုံနေတုန်းပဲ ၊ လက်ဆောင်တွေ လက်ခံသိမ်းယူနေတုန်းပဲ ၊ ပေးသမျှတွေ မငြင်းဘဲ ခေါင်းညိတ်လက်ကမ်းကြိုဆိုနေဆဲပဲ.. ။

အိမ်ကို မိန်းမကြီးငယ်မရွေး လာပြီးသောင်းကျန်းနေဆဲပဲ.. အမေ သူများရိုက်သမျှ ခေါင်းငုံု့ပြီး ငြိမ်ခံနေဆဲပဲ.. ။

အမေနဲ့ရိုးမယ် ငြင်းခုံလိုက် ပြန်အဆင်ပြေလိုက်နဲ့ သံသရာ လည်မြဲလည်ပတ်နေဆဲပဲ..

အရာရာဟာ ဒီပုံစံအတိုင်းလည်ပတ်နေရာကနေ အမေနဲ့ရိုးမယ်ကြား ပါးလွှာတဲ့မျဉ်းတစ်ကြောင်း ခြားခံလိုက်ရမယ် ဆိုတာ ဘယ်သူကြိုတင်သိနိုင်မည်မလဲနော်..

ရိုးမယ် စတုတ္ထတန်း နှစ်ဝက်လောက်မှာ ရလာတဲ့ ကံကြမ္မာရဲ့ ကျီစယ်နောက်ပြောင်မှုကြီး တစ်ခု.. ။

အဲ့နေ့က ကျောင်းမှာ HIV AIDS သင်ခန်းစာ ပို့ချတဲ့နေ့ရက်ကြီး.. နောက်ထပ်တိတိကျကျ ပြောရရင် ရိုးမယ်ဘဝ ပိုမှောင်မိုက်ကျသွားတဲ့နေ့ ၊ ရိုးမယ်နဲ့အမေ ကြား ဆက်ဆံရေး အေးစက်သွားရတဲ့နေ့.. ။

စဖြစ်ပုံက..

" တနင်္လာနေ့ က မြွေကိုက်ရင် ဘယ်လိုလုပ်ရမယ်.. မြွေမကိုက်အောင် ဘယ်လိုကြိုကာကွယ်ရမယ်ဆိုတာ ဆရာမ သင်ပြထားပြီးပြီနော် မှတ်မိကြလား "

" မှတ်မိပါတယ် ဆရာမ.. "

အတန်းဖော်တွေက ဆရာမကြားအောင် အသံကျယ်ကျယ်နဲ့ အော်ပြီးပြန်ဖြေကြပေမယ့် ရိုးမယ်ကတော့ နောက်ဆုံး ထောင့်ဆုံးနေရာကနေ ခေါင်းလေးငုံ့ထားရင်း တီးတိုး လေးလိုက်ဖြေမိသည်.. ။

" ဒါဆို ဒီနေ့ ဆရာမက HIV နဲ့ AIDS အကြောင်း ပြောမယ်.. နောက်အပတ်ထဲ ကျောင်းစစ်ဆေးရေးလာမှာ အဲ့ချိန်ကျ ဆရာကြီး ဆရာမကြီးတွေက အခန်းထဲ ဝင်ပြီးမေးမှာ သေချာပြန်ဖြေပေးရမယ်နော်.. ညီညီညာညာနဲ့ မှန်မှန်လေးဖြေ ဆရာကြီး ဆရာမကြီးတွေက မေးလို့ မဖြေနိုင်ဘဲ ခွေးအကြီးလှည်းနင်းခံရသလို ဖြစ်နေတာ ကြားရင် ဆရာမက ဆရာကြီးတို့ပြန်တာနဲ့ မင်းတို့ကို ရိုက်မှာနော်.. "