أنا حرة

الحلقة ٤

#أنا_حرة
#بوسي_مصطفى
____________
الحلقة الرابعة.

في شقة حسين.
حسين : اسمع ايه بس يا ميريهان!
ميريهان : هو أنا خلصت كلامي يا حسين لسه بقول معجب بيها اضايقت و مصمم مكملش كلامي.
حسين : اتفضلي بس خدي بالك إن دي بنت خالي و انتي عارفه اخوكي لعبي و مش بتاع استقرار و الكلام دا.
ميريهان : ممدوح اتغير خالص عن زمان أنت بس بقالك كتير مقعدتش معاه لا دماغك تغيرت خالص
بص هو شافها في الفرح و اعجب بيها لا اعجب بيها ايه دا بيكلمني حسيت من كلامه إنه واقع في حبها.
حسين : وقع في حبها و هو لسه شايفها في الفرح يا ميريهان؟!
ميريهان : هو بصراحه شافها قبل كده في خطوبة رشدي بس أنت عارف بقى مكانش بيفكر خالص في الموضوع ده بس هو معجب بيها من وقتها و زعل قوي لما عرف إنها اتجوزت أصله كلمني و أنا قولتله لسه بتدرس و كده بس اللي حصل إنها اتخطبت و اتجوزت و كل حاجه جات بسرعة.
حسين : اه و الطريق فضي بقى قدامه قال اما اكلم اختي.
ميريهان : طب و فيها ايه يعني و بعدين متنساش إن سبق ليها الجواز قبل كده يعني اخويا بالنسبالها هيبقى لقطه.
حسين : لا لو الحكاية كده خليه يصرف نظر عن الموضوع ده حنين بنت خالي صحيح كان ليها تجربة قبل كده و فشلت بس دا مش علشان هي وحشه و لا أخلاقها مش تمام الموضوع و ما فيه بصي هو طويل و ملوش لازمه الكلام اصلا عارفه إنتي قفلتيني بعد الجملة اللي قولتيها دي.
ميريهان : يا حبيبي اينكان السبب اسمها برضو اتجوزت قبل كده.
حسين : اه يعني ترضى بأي حاجه.
ميريهان : اخص عليك يا حسين و هو اخويا أي حاجه برضو؟!
حسين : ميري يا حبيبتي اخوكي مبيشتغلش دي أول نقطه تاني حاجه بقى مفيش شقة جاهزة و تالت حاجه و دي الاهم إنه لعبي قوي بلاش علشان خاطري خالي ممكن يحصله حاجه بسبب الحوار ده.
ميريهان : خالك هيدور على شغل اخويا ليه ما هو ممكن يشتغل معاه هناك
ممدوح خريج تجارة يعني ممكن يمسك الحسابات بتاعت الأراضي و المزارع
و البيت هناك كبير مفيش غير خالك و مرات خالك جلال عايش هنا اصلا مبيروحش هناك غير كل فين و فين ممدوح هيبقى دراع خالك اليمين و زي ابنه أنت مش بتقول كان نفسه ابنه هو اللي يمسك كل حاجه علشان ميتسرقش اهو مش هيلاقي واحد يأتمنه على املاكه أكتر من جوز بنته.
حسين : دا ايه التفكير ده
هو دا بقى الهدف من الجوازة كلها؟!
ميريهان : لا طبعا ممدوح بيحبها بس مفيش مانع إنه يرتب حياته معاها ايه الغلط في اللي أنا قولته.
حسين : انتي متأكدة إنك مش حاسه إن في أي غلط خلاص في كلامك؟
يعني أنتي لو باباكي حالته الماديه مستريحه و عنده مشروع كبير اروح اتقدملك و اطلب إني اشتغل و اعيش في بيتكم ليه كل دا
الرجاله كتير يا حبيبتي ها الرجاله اللي مبتبصش للي عند الست.
ميريهان : ايه دا بقى هو علشان بابا يعني على قده حضرتك هستهزأ بينا؟!
حسين : يبقى مفهمتيش حاجه من اللي قولتها.
ميريهان : أنا واحدة غبيه و مبفهمش اصلا إني فتحت معاك الحوار ده
عارف أنا قولت لممدوح بلاش البنت دي اصلا هي من الفلاحين و حياتهم غيرنا دا غير إنها اصلا شايفه نفسها معرفش على ايه و تلاقيها كانت مزهقاه في عيشته علشان كده طلقها.
حسين : دا كلامك اللي ملناش دعوة بيه
طليق حنين لسه لحد النهاردة بيبعت ناس علشان ترجعله و خالي و هي مش موافقين.
ميريهان : على ايه يا حبيبي دي عليها تكشيره يا باي تقطع الخلف.
حسين : لما هي مش عجباكي بتكلميني عليها ليه
و اخوكي اللي من شويه كان هيمان في حبها ايه خلاص هو كمان شايفها وحشه علشان قولت بلاش!
ميريهان : اعتبرني مقولتش حاجه استريحت؟
حسين : اه استريحت و ياريت تريحي انتي نفسك و شوفي عروسة لـ اخوكي تكون بعيد عن أهلي علشان مش عاوز مشاكل.
ميريهان : بقى كده يا حسين ماشي أنا بقى هخرج ابات مع العيال و خليك أنت هنا لوحدك.
حسين بسخريه : ها ها ها
و أنا هخاف يعني و لا ايه ما تتفضلي تنامي مكان ما انتي عايزة.
_____________