أنا حرة

الحلقة ٣٢

#أنا_حرة
_________
الحلقة ٣٢

في شقة مايسه.
فريال بغضب : لا بتفهمي في الذوق ولا في الاتيكيت وقاصدة تحرجيني قدام جوز بنتي.
مايسه : أنا مبفهمش في الذوق ولا الاتيكيت يا طنط وقاصدة احرجك مع جوز بنتك ليه بقى؟!
فريال : علشان تقومي من غير ما تاكلي لو مش عاجبك اعملي نفسك بتاكلي لكن متوقميش كده انتي اهانتيهم.
مايسه : انا مش فاهمه ايه الاهانه اللي فيها هو مفروض اقعد أكل وانا مليش نفس علشان ارضي بنت حضرتك وجوزها وبعدين مين اللي مبفهمش في الذوق ولا الاتيكيت علشان جوز بنتك يخرج ببيجامة النوم؟!
فريال : انتي دخلك ايه يخرج ببيجامة النوم ولا غيرها انتي هتحكمي في الناس تلبس ايه جوه بيوتهم ؟! أما عجيبه!!
مايسه : تقصدي شقة حضرتك مش كده؟!
فريال : شقتي وشقة بنتي واحد يا مايسه وبلاش تلميحاتك المستفزه دي.
مايسه : تلميحاتي أنا برضو اللي مستفزه يا طنط؟
طب بعد اذنك بقى علشان داخله اريح في اوضتي شويه.

قعدت فريال وهي مضايقة من كلام مايسه ليها.
فريال : ماشي يا مايسه إن ما وريتك فاكره نفسك صاحبة ملك وهتتحكمي فيه امال لو مكانتش شقة ابني كنتي عملتي ايه؟ بس أنا مش هنولك اللي في بالي هقعد هنا على قلبك ولا أنا لا أنتي يا مايسه صحيح نانسي برقبتك متستجريش تقولي كلام زي ده.
__________

في منزل الحاج غيث.
ثنية جايه بالشاي.
يقوم آدم ياخد منها الصنيه : تسلم ايدك يا طنط تاعبه نفسك ليه بس انا خمسه وماشي.
ثنية : ودا اسمه كلام برضو أنت هتتعشا معانا زمان الحاج جاي.
آدم : لا عشا ايه أنا جاي بس اطمن على حنين صوتها في التليفون قلقني هو حصل حاجه يا طنط وانتو في البيت عندنا؟
ثنية : لا يا ابني هيحصل ايه بس؟
نازله حنين من فوق وتخبط على الباب.
يقوم آدم بابتسامة.
حنين : سلام عليكم.
يرددوا : وعليكم السلام.
ثنية : تعالي يا بنتي اقعدي.
آدم : ازيك يا حنين اخبارك ايه؟
حنين : مش كويسه.
ثنية غمزت لحنين.
حنين : ايوه يا ماما أنا مش كويسه وحضرتك عارفه السبب.
آدم : حصل ايه يا حنين؟
حنين : هتكلم يا ماما ولو سمحتي متضغطيش عليا علشان متكلمش.
ثنية : أنا ساكته اهوه اتكلمي.
آدم : اتكلمي يا حنين قلقتيني حصل ايه؟
حنين : اللي حصل واحنا في بيتكم مامتك مكانتش عاوزه يبقى ليا رأي في أي حاجه تخص الشقة.
آدم : ازاي ده؟ دي هتبقى شقتك ومن حقك طبعا تغيري فيها اللي مش عاجبك خلاص ولا يهمك قوليلي ايه اللي مش عاجبك في الشقة وأنا اغيره على ذوقك.
حنين : كان ممكن دا يحصل قبل ما مامتك تقول الكلام اللي قالته ده.
آدم : كلام ايه؟
ثنية : ولا حاجه يا ابني دا زي ما تقول كده سوء تفاهم بس حصل بين مامتك وحنين قالت إن رأيك مش لازم يبقى صح
فردت حنين نفس رد مامتك ده بس لحقت نفسها واعتذرت وخلاص الموضوع عدى على خير.
حنين : لا يا ماما معداش على خير حضرتك ناسيه ردت قالت ايه كمان؟!
ثنية : خلاص بقى يا حنين اعتبريها زي أمك يا حبيبتي معلش عدي بقى.
آدم : ماما قالت ايه يا حنين؟
ثنية : مقالتش حاجه يا ابني هي بس حنين بتاخد على خاطرها بسرعة وكفاية جيتك لحد هنا اظن لازم تكوني مرضيه كده يا حنين.
حنين : لأ يا ماما أنا لسه زعلانه
ومفيش حاجه هترضيني.
آدم : طب ممكن افهم حصل ايه؟
نظرت حنين لوالدتها اللي غمزت لها فترددت حنين تتكلم.
ثنية : قومي يا حنين اعملي حاجه لـ آدم يشربها.
آدم : الشاي لسه قدامي
اتكلمي يا حنين أنا سامعك.
حنين : لو كده يبقى ماشي انا بقى ليه شرط.
ثنية : شرط ايه؟
آدم : طنط أنا آسف بس خلي حنين تتكلم براحتها.
ثنية : اتفضلي اتكلمي.
حنين : أنا عاوزه بيت لوحدي.
ثنية : ايه؟!
آدم : ما هو انتي فعلا هيبقى ليكي شقة لوحدك.
حنين : أنا قولت بيت لوحدي.
آدم : مش فاهم يعني أعمل بيت تاني غير البيت اللي موجود فيه؟
حنين : ايوه أو نعيش في شقتك اللي في مصر.
آدم : ايوه بس أنا شغلي هنا وبعدين أعمل بيت تاني ليه وأنا عندي بيت اصلا؟!
نظرت حنين لوالدتها وسكتت ففهم آدم إن في مشكلة مع حنين ومامته.
آدم : طب اديني فرصة أفكر.
حنين : مفيش مشكلة.
آدم : بس كده الفرح هيتأجل.
حنين : برضو مفيش مشكلة.
آدم : هفكر وارد عليكي بعد اذنكم.
ثنية : اتفضل يا ابني ولو إنك مشربتش الشاي حتى.
آدم : معلش أصل أنا لسه راجع من الشغل وكنت مروح استريح شويه بس كان لازم اطمن على حنين الأول.
ثنية : معلش متزعلش من حنين هي بس واخده على خاطرها شويه مامتك كانت شديدة معاها فعلشان كده تلاقيها زعلانه.
آدم : مفهوم يا طنط بعد إذنك.
ثنية : اتفضل يا ابني.
__________
في الغردقة.
نانسي : بقولك ايه يا زياد.
زياد : قولي يا حبيبتي.
نانسي : فيه واحدة صاحبتي كانت استشارتني في حاجه كده وأنا كنت عاوزه اخد رأيك فيها.
زياد : حاجة ايه وأنا ايه علاقتي اصلا؟!
نانسي : قولت يمكن يعني يكون عندك حل لمشكلتها دي أنا بصراحه مش عارفه افيدها.
زياد : قولي يا نانسي ايه مشكلة صاحبتك؟
نانسي : هي شاكه في جوزها.
زياد : شاكه في جوزها!
نانسي : ايوه شاكه إنه متجوز عليها.
زياد : طب وانا مالي؟!
نانسي : يعني تعمل ايه لو شاكه فيه تواجهه ولا تعيش حياتها معاه عادي خصوصا إنه بيعاملها كويس يمكن علشان متكتشفش الحقيقة.
زياد : يبقى احسن متعرفش حاجه علشان يفضل كويس معاها.
نانسي : يعني تفضل عايشه معاه وهي شاكه إنه متجوز واحدة تانية؟
زياد : طب لو عرفت ايه اللي هيتغير هيطلق التانية ويفضل معاها؟
طب افرض محصلش واتمسك ب التانية دي وسابها هي كده بقى استفادت ايه؟
نانسي : ردك غريب بصراحه.
زياد : خلاص اعتبري مقولتش حاجه.
نانسي : انت متعصب ليه دلوقت أنا بقول صاحبتي شاكه إن جوزها متجوز عليها مجبتش سيرتك خالص.
زياد : نعم!
نانسي : أصلك متعصب كأني بقول يعني انك أنت اللي متجوز.
زياد : لاااا دا انتي بتهرجي بقى تصبحي على خير يا حبيبتي.
___________