أنا حرة

الحلقة ٤٦

#أنا_حرة
________
الحلقة ٤٦

مايسه : مقالكش حاجه؟
فوزي : حاجه زي ايه؟
مايسه : مسألكش عليه يعني لما عرف إني تعبانه وكده مش حضرتك قولتله اني تعبانه برضه؟
فوزي : اه قولتله...
مايسه : يعني مسألش ولا أهتم؟
فوزي : انتي عاوزه منه ايه يا بنتي خليكي في اللي انتي فيه دلوقت خُدي ابنك في حضنك واشبعي منه علشان شويه كده وهرجعه لرشدي زي ما انتي عارفه.
مايسه : بابا هو ممكن رشدي يسامحني؟
فوزي : يسامحك!
مايسه : ايوه يسامحني وأنا أعيش طول عمري خدامه تحت رجليه أنا ندمانه قوي يا بابا.
فوزي : يا بنتي متفكريش في الموضوع ده انتي في ايه ولا في ايه دلوقت مش نخلص من اللي اسمه زياد ده الأول.
مايسه : عندك حق دا كابوس مش عارفه هخلص منه ازاي؟
________

في شقة كريمة.
يمسكها فريد ويقفل بؤها ويدخلها جوه ويقفل الباب.
فريد : كفاية فضايح يا ست انتي.
كريمة بصوت مخنوق وبتحاول تفُك ايده اللي على بؤها : فضايح هو أنت لسه شوفت فضايح يا حرامي يا نصاب.
تكح جامد بعد ما تفُك ايده وتجري بعيد عنه.
كريمة : عايز تموتني طيب أنا اللي هموتك يا فريد.
فريد : بتعملي ايه يا مجنونه كريمة ارمي اللي في ايدك ده متضيعيش نفسك.
(كان في ايدها شمعدان نحاس)
كريمة : ما أنت ضيعتني وعاوز تتهنى بفلوسي وشقتي لأ وايه تطلقني كمان بس تعرف لو طلقتني أنا هبقى مبسوطه بس ترجعلي فلوسي الأول.
فريد : خلاص مش هطلقك بس ارمي اللي في ايدك ده.
كريمة : لا أنت ترجعلي فلوسي وشقتي وبعدين تطلقني.
فريد : حاضر هعمل كده بس لو موتيني مش هتاخدي فلوسك كلها أنا عندي أمي واخواتي هيقاسموكي في الميراث وبعدين القاتل مبيورثش
غير إنك هتروحي في داهيه يا روحي وأنا خايف عليكي.
كريمة : تكتب دلوقت بخط ايدك وتعترف إنك نصبت عليه وتسجل كمان بصوتك.
فريد : حاضر.
بيدور على قلم..
فريد : طب هاتي قلم.
كريمة : معييش وبطل الحركات بتاعتك دي طلع قلم واكتب يلا.
فريد : مش مصدقاني ليه بقولك معييش لا ورقة ولا قلم.
كريمة : طب افتح التسجيل اللي عندك يلا وسجل اعتراف بصوتك
نفس الكلام اللي كتبته في الجواب إياه فاكره؟
فريد : اه طبعا فاكره.
كريمة : طب يلا مستني ايه؟
فريد بيسجل بصوته اعتراف إنه نصب على كريمة وسرق فلوسها ومضاها على عقد بيع الشقة بعد ما عطاها منوم.
فريد : عاوزه حاجه تاني؟
كريمة : ايوه تكتب الكلام اللي قولته ده.
فريد : وايه فايدة ده ما انا قولتلك هرجعلك كل حاجه.
كريمة : مضمناكش يا حبيبي.
فريد : طيب هاتي ورقة وقلم من جوه.
كريمة : افتح الدرج ده هتلاقي.
يفتح الدرج وياخد ورقة وقلم ويكتب.
فريد : أظن كده خلاص اطمنتي نزلي اللي في ايدك ده.
كريمة : الورقة حطها في جراب الموبايل وحطه في الأرض واحدفه ناحيتي.
فريد : حاضر.
ينفذ فريد اللي قالت عليه لسه بتنزل كريمة في الأرض وهي رافعه الشمعدان بـ ايدها و ايدها التانية بتاخد الموبايل من الأرض يخبطها فريد برجله على دماغها فتوقع ولسه بياخد الموبايل وهيتمكن منها وبياخد الشمعدان راحت خبطته بيه على دماغه.
نظر لها والدم بيسيل منه ولسه بيحاول يعافر معاها ويرد لها نفس الضربه وبياخد الشمعدان منها بعد ما فقدت كريمة اعصابها من مشهد الدم اللي شافته
كان واقع فريد على الأرض وفي ايده الشمعدان.
جاتلها حالة عصبية وبقت تصرخ وتبكي وتجري تفتح باب الشقة كان بعض من الجيران لسه واقفين على السلم شافوها
فبيسألوا : فيه ايه؟
تشاور كريمة على الشقة وتنزل جري تجري في الشارع.
يدخلوا جوه يشوفوا فيه ايه يلاقوا فريد غرقان في دمه.
واحد من الجيران : انزلوا بسرعة وراها هاتوها الوليه قتلت الراجل.
واحد تاني من الجيران بيتصل بالاسعاف واتنين نزلوا جري وراها يلحقوها قبل ما تهرب.
_________