أنا حرة

الحلقة ٥١

#أنا_حرة
_________
تامر نايم التليفون يرن📞
بصوت ناعس : الو.
باسم : ايه دا أنت نايم؟!
تامر : في حاجه يا باسم؟
باسم : أنت نايم ليه دلوقت؟
تامر : مش فاهم السؤال.
باسم : هههههههههههه يعني لسه الساعة تسعة ايه
اللي منيمك دلوقت؟
تامر : يعني لاقيتني فاضي معنديش حاجه اعملها قولت أنام.
باسم : طيب تصبح على خير.
تامر : لا تصبح على خير ايه قولي الأول متصل عاوز ايه؟
باسم : عادي يعني كنت وحشني قولت اكلمك اطمن عليك مش كويس برضه؟
تامر ' اه تمام.
باسم : ماشي هكلمك بكره سلام.
تامر : استنى متقفلش
قولي بجد كنت عاوز ايه؟
باسم : بطمن عليك يا تامر مالك مستغرب ليه؟
تامر : مش عارف حاسس إن المكالمة دي وراها حاجه قول بقى ومتخبيش أنا عارفك كويس.
باسم : بص بقى وبصراحة كده.
تامر : ايوااا أنا عاوز الصراحة دي كمل.
باسم : كنت عاوزه رقم خطيب حنين قصدي اللي كان خطيبها.
تامر : ليه؟
باسم : عاوزه في مصلحة كده هو مش اتنقل عندنا برضه؟
تامر : ايوه يعني عاوزه في ايه؟
باسم : حاجه كده محدش غيره هيقدر يساعدني فيها هتديني الرقم ولا هتفتح معايا تحقيق.
تامر : ماشي براحتك طالما بقى في أسرار عليه.
باسم : مش أسرار ولا حاجه هقولك في الوقت المناسب هات الرقم بقى.
تامر : ماشي ثواني هطلعه من الموبايل.
سجل عندك..
باسم : ماشي.
تامر : زيرو ميه....
___________
في منزل غيث.
غيث : امال فين حنين؟
ثنية : نايمه.
غيث : ليه نايمه دلوقت؟
ثنية : قالت هتنام ساعة وابقى اصحيها هسيبها تنام للصبح.
غيث : اطلعي شوفيها يمكن تعبانه.
ثنية : مش تعبانه ولا حاجه هي كويسه.
غيث : ميبقاش قلبك جامد على بنتك كده يا حاجه.
ثنية : أنا قلبي جامد عليها برضه يا حاج أنت اللي بتخاف عليها زيادة عن اللزوم بقولك مفيهاش حاجه هقلق ليه بقى.
غيث : طيب هو جلال سافر؟
ثنية : اه سافر من ساعتين كده.
غيث : اخد مراته معاه؟
ثنية : لأ.
غيث : ليه؟
ثنية : قالت هقعد يومين كده مع حنين سيبها اهي منوساها.
غيث : ما تقعد براحتها دا بيتها أنا بس مش حابب تعوده على كده.
ثنية : يعني هما اليومين دول اللي هيعملوا مشكلة بينهم اعتبره مسافر اليومين دول.
غيث : براحتهم هما أحرار.
ثنية : عارف أنا قلبي ارتاح لما رشدي كتب كتابه على البنت اللي خطبها.
غيث : فرحانه ماشي إنما يعني ايه قلبك ارتاح هو انتي كنتي تعبانه ليه اصلا؟
ثنية : أصل أم حسين في الرايحه والجايه وكل ما تشوفني تقولي ايه رأيك في رشدي مش هو أولى ببنت خاله وهي أولى بيه.
غيث : دا كلام قديم يا أم جلال.
ثنية : ايوه بس كنت بضايق أصل يعني لما هي عاوزه ابنها لبنتي مطلبتهاش من الأول ليه؟
غيث : الكلام ممنوش فايدة هو شاف حاله وبنتك خليها في حالها.
ثنية : اه نسيت اقولك.
غيث : خير في ايه؟
ثنية : أم آدم كلمتني النهاردا.
غيث : ليه خير؟
ثنية : قالت إنها عاوزه تيجي تقعد معايا شويه وتكون حنين موجودة.
غيث : ايش معنى؟
ثنية ' يعني أنا بقول حست بغلطها وجايه تعتذر بنتك بس تطول بالها شويه وتخلي الأمور تمشي يمكن يكون ليهم نصيب مع بعض.
غيث : انتي بتقولي ايه يا حاجه ليها نصيب مع مين؟
احنا انتهينا من الموضوع ده خلاص.
ثنية : متنشفش دماغك بقى زي ما عملت مع تامر لو كنت لينت دماغ بنتك بدل ما تهاودها وتخليها تصمم على الطلاق كان زمانها عايشه دلوقت في بيتها وعندها عيلين.
غيث : بتفكري ازاي انتي
يعني يروح يجيب ستات البيت ويضرب البنت كمان لما ترفض القرف ده إنه يحصل في بيتها يضربها وتكلمنا وهي مفلوقه من العياط وفي الاخر يقول أنا آسف مكانش قصدي اضربها طب واللي كانت عندك في البيت كانت بتعمل ايه يقول مش عارف دي كانت جايه لواحد صاحبي واحد صاحبه وفي شقته
دا ايه القرف ده وجايه تقوليلي مكونتش اهاودها واخليها تطلق منه لأ كنت أعمل كده حتى لو هي مش عاوزه.
ثنية : طب أنت شايف إنها بقيت احسن دلوقت؟
غيث : اللي حصل ده لا أنا ولا انتي لينا يد فيه هو نصيبها كده وخلاص خلصنا بقى.
ثنية : انت متنرفز عليه ليه دلوقت وأنا مالي؟
غيث : ما هو انتي عارفه كل حاجه وحاضره الموضوع من أوله وجايه دلوقت تقولي كلام غريب كأنك مكونتيش عايشه معانا وقتها.
ثنية ' خلاص اهو اللي حصل حصل.
غيث' خلاص متفتحيش الموضوع دا مرة تانية لا معايا ولا مع حنين؟
ثنية : حاضر.
___________
في شقة زياد..في الصباح.
فوزي : طب ايه اللي مقعدك هنا مجتيش ليه تقعدي عندي.
مايسه : واسيب شقتي يا بابا؟
فوزي : مش بتقولي اتقبض عليه هتقعدي هنا تعملي ايه؟
مايسه : هقعد في شقتي وشقة ابني وبعدين لسه هاخد المحامي ونروح هناك نشوف في ايه وقبضين عليه في ايه؟
نانسي جايه وبتقعد : ايوه شوفي محامي يا مايسه يخرج جوزك من القضية اللي لابساه لابساه دي يا حبيبتي و متنسيش تصرفي الكام مليم اللي بتقبضيهم وتقومي محامي في قضية خسرانه.
مايسه : ملكيش فيه أنا عندي أصل مش زي ناس.
نانسي : هههههههههههه لا بنت أصول قوي.
فوزي : أظن عيب الكلام اللي بتقوليه دا لو انتي فعلا متربيه.
نانسي : هههههههههههه ايه يا عمو أنت كمان طلعت زيها ولا ايه اه صحيح ما هي هتطلع لمين بس كنت بقول هي وطنط كريمة نسخه واحدة معرفش إنك زيهم.
مايسه : اخرسي وحطي لسانك جوه بؤك انتي ايه طايحه في الكل ومش لاقيه حد يشكمك.
نانسي : اعمل ايه اللي كان شكمني محبوس يا عين أمه روحي طيبي بخاطره وطمنيه كلها عشر سنين ولا حاجه ويخرج يلاقي ابنه كبير كده بيسأله كنت غايب عننا فين يا بابا يكدب عليه ويقوله كنت مسافر يا حبيبي ههههههههههههه
مايسه : يا سواد قلبك النار اللي في قلبك دي كلها بسبب إني حامل ههههههههههههه
معلش يا نانسي بكره يا حبيبتي تبقي زيي.
نانسي : اوعي تكوني مفكره إنك عملتي انجاز ولا حاجه ما هو مش أي أم تعرف تربى مش اللي زيك اللي راميه ابنها عند أهل ابوه يتقال عليها أم
مش كل اللي خلفت تستحق الامومة يا مايسه.
مايسه : معلش اعمليها انتي وورينا هتربي ازاي يا حبيبتي أما كلامك بخصوص زياد لا هيقدم ولا يأخر بكره يخرج وساعتها هينتقم منك خافي على نفسك بقى.
نانسي : بتهدديني يا بنت القاتله.
مايسه : قاتله وهي بتدافع عن نفسها احسن ما أكون ابويا مرتشي يا بنت الراجل المرتشي حلو كده
علشان تتكتمي.
بتقرب نانسي تتخانق معاها يوقف فوزي بينهم ياخد مايسه على جنب.
مايسه : مش همشي يا بابا الشقة دي ليه فيها أكتر منها مش عاجبها الباب يفوت جمل.
نانسي : مش خارجه من بيتي يا مايسه.
مايسه : وأنا كمان مش خارجه من بيتي.
فوزي : خلاص براحتك أنا ماشي.
________
في قسم الشرطة.
فريال : بقى كده يا زياد
ليه يا ابني تعمل في نفسك وفينا كده؟!
زياد : أنا معملتش حاجه يا ماما.
فريال : ازاي بس امال انت هنا بتعمل ايه؟
زياد : دا بلاغ كيدي يا ماما هو فعلا في مشروع الشركة نفذته والمشروع فشل بس أنا مكونتش معاهم.
فريال : بجد يا زياد ولا بتقولي كده علشان تطمني بلاش تضحك عليه يا ابني.
زياد : بجد يا ماما.
فريال : طيب يا حبيبي يبقى الموضوع بسيط تشوف محامي يخرجك من القضية دي طالما انت بريء.
زياد : اه هشوف طبعا.
فريال : طيب يا حبيبي طمنتني انا كنت قلقانه قوي وعماله اقول ليه بس تعمل كده كنت مفكره شغلك اللي مع حماك دا هو اللي مش مظبوط وياما قولتلك ابعد عنه بس لما عرفت إن شغل الشركة اللي كنت شغال فيها كمان بالشكل دا
قولت خلاص روحت في داهيه.
زياد : اطمني يا ماما وعاوزك تروحي تطمني على مايسه.
فريال ' ودا وقته وبعدين مالها مايسه مش مفروض رجعتها الشقة وقاعدة مع نانسي.
زياد : نانسي مش ناويه تجيبها لبر وخايف تعمل فيها حاجه مايسه حامل وانا عاوز احافظ على اللي في بطنها دا ابني يا ماما.
فريال : حاضر يا حبيبي بس خليك في نفسك دلوقت وأنا هطمن عليها حاضر.
زياد العسكري بياخده.
زياد : ماتحتكيش بنانسي علشان اتجننت على الاخر وممكن تقتل أي حد.
فريال : خلي بالك من نفسك أنت بس وماتشغلش بالك بحاجه تانية.
________
آدم راجع من الشغل بيغير هدومه.
التليفون يرن📞
آدم : الو..
باسم : سلام عليكم.
آدم : وعليكم السلام
مين معايا؟
باسم بارتباك : أنا باسم.
آدم : باسم مين؟
باسم : أنا باسم صاحب تامر عادل.
آدم بيحاول يفتكر الاسم : اه.. أي خدمة؟
باسم : بصراحه كنت عاوزك في مصلحة كده.
آدم : اتفضل لو في امكاني اساعدك مش هتأخر.
باسم : متشكر أنا طبعا اخدت الرقم من تامر بس هو ميعرفش الموضوع اللي عاوزك فيه.
آدم : خير يا أستاذ باسم موضوع ايه ده؟
باسم : كنت عاوز رقم تليفون حنين.
آدم : نعم !!
باسم : أنا عاوز رقم تليفونها لمصلحتها صدقني مش لحاجه تانية.
آدم ' مصلحة ايه دي؟
باسم : هو أنا عرفت من تامر إنك يعني عاوز تقربهم من بعض علشان...
يقاطعه آدم : معلش الموضوع دا يخصك في ايه؟!
باسم : أنا صاحبه على فكرة.
آدم : ايوه صاحبه يعني اعملك ايه دلوقت تاخد رقمها ليه معلش؟
باسم : أنا مش هكلمها دي والدتي اللي هتكلمها.
آدم : وأنا بقى اعرف منين إن والدة حضرتك اللي هتتكلم معلش مش هقدر اساعدك.
باسم : أنا مش هضرها على فكرة وعندي أخت أكيد بخاف عليها.
آدم : أنا ايه علاقتي بكل ده معنديش أرقام لحضرتك.
باسم : كده.. طيب بعد اذنك.
آدم : اتفضل.
وقفل باسم التليفون.