أنا حرة

الحلقة ٢٧

#أنا_حرة
________

الحلقة ٢٧

في شركة زياد.
زميل مايسه : وريني كده.
بتقرب مايسه التليفون من زميلها.
الزميل : معرفش بس الأوراق دي ممكن تلاقيها في مكتب البشمهندس.
مايسه : دي كانت على مكتبي امبارح.
الزميل : يبقى اخدتيها البيت ملهاش تفسير تاني.
يدخل زياد المكتب : مساء الخير.
يتفاجئ زياد بمايسه واقفه بجانب زميلها و بيتكلموا.
يوقف الموظف : مساء النور يا بشمهندس.
زياد يشاور لمايسه اللي تلحقه على المكتب.
مايسه : اتأخرت ليه يا زياد؟
زياد : ايه اللي أنا شوفته بره ده؟!
مايسه : شوفت ايه مش فاهمه؟
زياد : واقفه بتعملي ايه عند محي؟
مايسه : يعني ايه واقفه بعمل ايه؟
سؤالك غريب!
بسأله على حاجه خاصة بالشغل.
زياد : ياريت تاخدي بالك من تصرفاتك شويه وتسيبي مسافة بينك وبين زميلك.
مايسه : في ايه يا زياد؟
زياد : فيه ان اللي شوفته من شويه دا مش عاوزه يتكرر تاني.
مايسه : لاااا انت جرالك ايه؟!
زياد : هاتي الملف اللي طلبته منك.
مايسه : تقصد الملف اللي طلبته امبارح ومشيت قبل ما تطلع عليه؟
زياد : ايوه.
مايسه : أنا خلصته كله.
زياد : تمام هاتيه بقى.
مايسه : ما هو أنا معرفش سيبته فين شوفه كده على مكتبك.
زياد : في ايه يا مايسه مبقتيش مركزة في الشغل ليه؟!
مايسه : مش عارفه بس أنا سيبته في المكتب حتى بالامارة اخدته مني وبعدها جالك مكالمة سيبته من ايدك وخرجت.
زياد : ايوه يعني هو فين مش مفروض لو دا حصل يبقى موجود على المكتب مفيش حاجه اخرجي دوري عليه بره.
مايسه تقعد وهي ماسكه دماغها.
زياد : في ايه بقولك اطلعي دوري على الملف محتاجه ضروري.
مايسه : ثواني بس علشان مش قادرة أقف.
زياد يقرب منها : في ايه مالك؟
مايسه : مش عارفه بقالي كام يوم كده دايخه ومش قادرة اعمل أي مجهود.
زياد يهمس لها..
مايسه : اه بس لسه مش متأكدة.
زياد : طب بينا نتأكد.
مايسه : والملف؟
زياد : بعدين بعدين يلا بينا.
___________

في منزل غيث.
على السفرة واقف غيث بيوزع الأكل على الموجودين ويخرج بصواني الأكل لباقي المعازيم.
البواب يقرب من جلال ويهمس في ودنه.
جلال : طيب طيب جاي.
ويخرج جلال بره.

آدم : كنا أكلنا معاهم بره.
تدخل ثنية الصالون وهي في ايدها الأطباق يقف آدم ياخد الأطباق منها.
ثنية : ودا اسمه كلام برضو عاوز تقعد تاكل بره مع المعازيم.
آدم : مفيهاش حاجه يا طنط.
ثنية : لأ فيها بقى انتو تقعدوا تاكلوا هنا علشان تبقوا على راحتكم.
تغمز ثنية لحنين اللي تستأذن وتقوم.
حنين : نعم يا ماما.
ثنية : تاكلي كويس متتكسفيش وتعزمي على خطيبك متخلهوش يقوم من غير ما ياكل.
حنين : حاضر.
ثنية : و اتكلمي معاه متفضليش ساكته.
حنين : حاضر.
ثنية : لو محتاجين حاجه ابعتي قوليلي أنا قاعدة بره لما الناس تخلص اكل.
حنين : حاضر يا ماما.
ثنية : استني رايحه فين؟
حنين : نعم في حاجه؟
ثنية : ايوه ظبطي الطرحه كده و اقفلي الزرار اللي فوق ده.
حنين بدهشه : ما اخدتش بالي.
ثنية : هههههههههههه اللي واخد عقلك يا ضنايا معاكي حق انتي هتاخدي بالك من ايه ولا ايه.
حنين بخجل وابتسامة : ماما !
ثنية بابتسامة : أنا قاعدة بره لو احتاجتي حاجه نادي عليه ماشي؟
حنين : ماشي.