أنا حرة

الحلقة ١٥

#أنا_حرة
_________
الحلقة ١٥

تاني يوم في شقة والد مايسه.
كريمة : اتجنن دا و لا ايه؟!
مايسه : مش عارفه يا ماما اعمل ايه أنا لو بجد نفذ اللي في دماغه هسيبله البيت احنا عندنا ديون كتير دا غير المستوى الاجتماعي اللي عايشين فيه كل دا هيروح طبعا بعد ما حضرته يسيب الشغل و يقعد في البيت ما هو مش هيلاقي الشغل مستنيه و لو لاقى مش هيبقى بنفس المرتب ده.
كريمة : مهما يحصل اوعي تسيبي بيتك انتي حاضنه يا حبيبتي حتى لو غار في داهيه دي شقتك تقعدي فيها تربي ابنك و هو غصب عنه يبعت مصاريفه
شوفتي بقى لما قولتلك خليكي متمسكه بشغلك كان معايا حق ازاي
اهو يا حبيبتي هيرجع كحيان تاني خلي ابوه بقى يصرف عليه و لا أمه تروح تبيع الورث بتاعها و تأكله.
مايسه بتضحك بسخريه : حتى الورث دا كمان طار على الست هانم اخته يعني مش هيلاقي حد يأكله أنا متغاظه قوي كنت بقول بعد ما يسدد أقساط عربيته يشتري ليه عربية بدل ما يضطر يوصلني و يجيبني كل يوم من الشغل دلوقت مش عارفه هيسدد باقي الاقساط منين.
كريمة : ممكن تكون مشكلة بسيطه في الشغل و يرجع تاني متسبيقش الأحداث هو كمان مش مغفل يعني علشان يسيب وظيفة بالمرتب ده.
مايسه : ياريت يا ماما احسن من ساعة ما قالي إنه هيسيب الشغل و انا دماغي خلاص حتى الشغل مجاش ليه نفس اروحه النهاردة.
كريمة : شوفي مين بيتصل.
مايسه : دا زياد!
كريمة : زياد منين؟
مايسه : ثواني بس يا ماما اشوفه عاوز ايه.
___________

في منزل الحاج غيث..
ثنيه : و يتخانق معاك ليه هو بالعافيه ايه الفترا بتاع العمدة ده؟!
غيث : طالما حاطط الأرض في دماغه مش هيسكت إلا لما ياخدها.
ثنيه : و أنت هتوافق تبيعهاله؟
غيث : لا طبعا بس هندخل في مشاكل كتير و انا مكونتش عاوز وجع الدماغ ده بس محدش برضو ياخد حاجه مني غصب عني.
حنين : بابا أنا خارجه.
غيث : رايحه فين يا حنين؟
حنين : هروح لغادة..
غمزت ثنيه لغيث.
غيث : خلاص روحي يا بنتي.
حنين : مش هتأخر.. سلام عليكم.
يرددوا : و عليكم السلام.

غيث : مش حابب خروجها لوحدها يا حاجه.
ثنيه : و هي يعني بتروح فين يا حاج و بعدين هو كل مشوار لازم يكون حد معاها؟!
حنين مش صغيرة.
غيث : ما هي دي المشكلة.
ثنيه : مشكلة ليه بقى؟
غيث : الحاج ياسين مكلمني بيقولي عايز يجي يشرب الشاي معايا قولتله تشرف و تنور قالي بصريح العبارة كده أنا كنت عاوز بنتك لفادي ابني.
ثنيه : قولتله ايه؟
غيث : هقوله ايه بس يا حاجه مش لما اخد رأي بنتك الأول.
ثنيه : هتقول لأ.
غيث : خلاص لأ لأ.
ثنيه : ازاي الكلام دا؟!
انت متاخدش رأيها خالص
هما يجوا عادي و محدش يقولها و تدخلهم و هي متعرفش يمكن يحصل قبول أصل حكاية إننا نقولها قبلها دي جربناها كتير و منفعتش.
غيث : انتي عارفه دماغ بنتك يا حاجه.
ثنيه : علشان كده بقولك منقولهاش حاجه خليها مفاجأة و زي ما تيجي.
______

في منزل رامي.
غادة ببتسامة : أدخلي يا حنين متخافيش محدش هنا.
حنين : هههههههههههه لا عادي أنا مبخافش.
غادة : وحشاني قوي محدش بيشوفك معلش أنا كمان مبقتش اخرج كتير..
حنين : عارفه يا حبيبتي معلش كنت مشغوله اليومين دول.
غادة : لميا بنت عمتك اتجوزت؟
حنين : لا لسه فرحها الشهر الجاي.
غادة : لازم اروحلها امانه عليكي لما تتجوز و تحبي تروحي تكلميني علشان اعرف رامي و لو وافق اسافر أباركلها متعرفيش أنا حبيتها قد ايه.
حنين : و هي كمان حبيتك قوي و بتسألني عليكي دايما و كانت عايزة رقم تليفونك بس قولت استأذنك الأول.
غادة : طبعا ادهولها اقولك هاتي رقم تليفونها اكلمها.
حنين : ثواني
ههههههههههههه أصل مش حافظة رقم تليفونها جديد بقى و أنا مبحبش احفظ أرقام بصراحه اتفضلي.
غادة : ثواني بقى.
حنين : بتعملي ايه؟
غادة : هتصل بيها... متتكلميش خالص ماشي؟
حنين ببتسامة : ماشي.
غادة بتغير نبرة صوتها : الو.
لمياء : الو مين معايا؟
غادة : بيت الاستاذ محسن؟
لمياء : لا حضرتك النمرة غلط..وبعدين اسمه رقم الأستاذ محسن مش بيته!
غادة : هو دا رقمه اصلا علشان تعدلي عليه؟!
لمياء تكلم نفسها : ايه قلة الذوق دي.. مع السلامة.
غادة : استني يا آنسه متقفليش؟
لمياء : هو دا صوت حضرتك بجد و لا التليفزيون؟
غادة بمزح : لأ صوتي
ها ها ها ها.
لمياء : يا باي دمك سم.
غادة : محدش قالك تشربيه ها ها ها ها.
لمياء : انتي عاوزه ايه بالظبط؟
غادة : عندكم لبن؟
لمياء : نعم!
حنين بتضحك.
لمياء : استني كده الصوت دا مش غريب عليه.
حنين : هههههههههههه بتشتغلك يا لميا.
لمياء : مين حنين؟؟
غادة : ايوه هههههههه
ازيك يا لميا عندكم لبن بقى؟
لمياء : معلش مش واخده بالي حضرتك مين؟
حنين : دي غادة يا بنتي.
لمياء : غادة مين؟
اه افتكرت ازيك يا غادة
ههههههههههههه معرفتكيش صوتك كان غريب قوي عامله ايه يا حبيبتي؟
غادة : تمام و انتي اخبارك ايه؟
لمياء : كله كويس ايه انت عند حنين و لا حنين اللي عندك؟
حنين : أنا اللي عندها.
غادة : مش هنشوفك قريب؟
لمياء : لا انتوا اللي تشرفونا قريب بقى.
غادة : هههههههههههه
ألف مبروك يا حبيبتي طبعا هنيجي نهني و نبارك لـ عروستنا.
لمياء : يا سلام تشرفي و تنوري دا احنا نفرشلك الأرض ورد.
غادة : متشكرة قوي يا لولي حنين معاكي اهيه.
حنين : ازيك يا لميا اخبارك ايه؟
__________