أنا حرة

الحلقة ٤٤

#أنا_حرة
_________
الحلقة ٤٤

جيهان : آدم... آدم أنت مش هتقوم يا ابني؟
آدم يلتفت لمامته : صباح الخير.
جيهان بابتسامة : صباح النور... ايه مش هتقوم تفطر؟
آدم بيفكر شويه وبيحاول يركز هو عنده ايه النهاردا مهم وفجأة يقوم من السرير بسرعة.
جيهان : ايه فيه ايه؟
آدم : عندي مشوار مهم هي الساعة كام؟
وبيدور على التليفون.
جيهان : عشرة ونص.
آدم : يا خبر اتأخرت لازم اخرج حالا.
جيهان : رايح فين مش هتفطر؟
آدم : لا بعدين... هدخل اخد شاور على السريع لإن عندي حاجات كتير لازم اخلصها.
جيهان : طيب على راحتك.
________
ترن كريمة جرس الباب تقوم فريال تفتح باب الشقة.
كريمة : سلام عليكم.. إزيك يا أم زياد؟
فريال : وعليكم السلام
أنا بخير أي خدمة؟
كريمة : معلش بس كنت جايه أسألك هو زياد هنا؟
فريال : عاوزه زياد في ايه بقولك ايه يا أم مايسه انتي يا حبيبتي تاخدي بنتك كده في حضنك وتحاولي كده تهتمي بيها وانسوا زياد ابني خالص علشان عنده اللي مكفيه.
كريمة : معلش بس دي مراته اقولك بلاش مايسه دلوقت نركنها على جنب أنا جياله في موضوع خاص بيه أنا.
زياد خارج من اوضته ب انفعال : نعم جايه ليه عاوزه مني ايه يا ست انتي؟ بنتك أنا بقى هحاسبها على اهمالها وخروجها من البيت بدون اذني أما الطلاق دا أمر مفروغ منه مشكلتك بقى مع فريد استني لما يجي وابقوا حلوها مع بعض مليش فيه.
كريمة : ازاي يعني هو مش صاحبك؟!
زياد : صاحبي بس هو جوزك انتي مشاكلكم دي حلوها مع بعض مالي أنا عندي مشاكلي ومش ناقص وجع دماغ.
كريمة : بس...
يقاطعها زياد بانفعال : سمعتيني قولتلك ايه ولا اعيد الكلام مرة تانية؟!
كريمة : ايوه بس دا شكله نصاب وأنا مش هعرف اخد حقي منه أنا بس عاوزاك تتفاهم معاه خليه حتى ياخد جزء من الفلوس ويرجعلي الباقي أما الشقة أنا مستحيل اسيبها.
زياد : خلاص استنيه لما يجي يرميكي في الشارع القانون لا يحمي المغفلين وانتي مضيتي وبصمتي كمان هو قالي كده.
كريمة : كداب محصلش أنا ممضتش ولا بصمت على حاجه دا بيقول كده علشان يلهف الفلوس والشقة.
زياد : هههههههههههه يلهف ايه ما هو اوردي اخدهم اصلا ريحي نفسك يا ماما اهو يمكن تلاقي واحد غيره متريش تتجوزيه وابقي حققي أحلامك معاه.
كريمة : بتتريق عليه يا جوز بنتي؟!
زياد : ايوااا جوز بنتك اللي كانت فاكره نفسها هتتجوز بنك فلوس كل اما تعوز تكبش وتاخد بس مطلتش حاجه زيك كده بالظبط بس الفرق انها مكانش عندها حاجه علشان اقلبها فيها زي ما عمل فريد ههههههههههههه
اتفضلي بقى علشان مش فاضي عندي مليون حاجه نازل اعملها.
كريمة : عاجبك كلام ابنك ده يا ام زياد صاحبه ينصب عليه ويسرق فلوس ويمضيني وأنا نايمه على عقد بيع الشقة اللي عايشه فيها.
فريال : ازاي دا مش معقول؟!
كريمة : دا اللي حصل وباعترافه وبخط ايده كمان حطلي منوم ومضاني وبصمني من غير ما احس بس ابنك قطع الجواب أنا كده اتأكدت من كلام مايسه لما قالت إنك نصاب ومتفق أنت وصاحبه على النصبايه دي بس أنا مش هسيب حقي.
زياد : عندك المحامين مالين البلد روحي أي قسم شرطة واتهمي فيه جوزك إنه سرقك ولو عرفتي تثبتي ده ابقي قابليني.. سلام.
ونزل زياد وترك كريمة اللي خرجت بعده بقلة حيله وحزن مالي قلبها.
_______