أنا حرة

الحلقة ٤٠

#أنا_حرة
_________
الحلقة ٤٠

غيث : اتصل بـ اختك يا ابني شوفها فين؟
ثنية جايه بالشاي والكيك : قولتلها بلاش النهاردا هروح معاكي بكره أصل جلال كان معصلج حبتين ومش عاوز مراته تروح.
جلال : مش كده يا ماما بس حنين بتقعد تختار وترجع مبتثبتش على رأي وعارف إنهم هيتأخروا بس كان لازم هايدي تروح معاها ونس حتى لو مش هتاخد رأيها في حاجه.
هايدي بتتصل.📞
جلال : هو دا بقى اللى جايين على طول مش هنتأخر؟!
مالك يا هايدي فيه ايه أنتي بتعيطي ليه فهميني حصلكم حاجه؟
ثنية : أختك مالها يا جلال؟
غيث : طمنا يا ابني حصل إيه؟
جلال : فيه يا هايدي فهميني مالك حصل إيه وحنين فين؟
هايدي وهي بتبكي : جلال حنين في حد أخدها ومشي.
جلال : حد اخدها ومشي يعني ايه وانتي فين؟!
ثنية : بتقولك ايه وفين أختك؟
جلال : ثواني بس يا ماما أفهم.
هايدي : أنا مش قادرة أتكلم تعالى.
جلال : طب فهميني أنتي فين؟
هايدي : مش عارفه استنى هسأل حد معدي كده.
جلال : أنتي يعني في الطريق اللي جاي على البلد؟
هايدي : ايوه بعيد عن المكان اللي كنا فيه بحوالي كيلو متر كده.
جلال : طب أنا جاي.
غيث : فيه ايه يا ابني مراتك قالتلك إيه وأختك فين؟
جلال : معرفش يا بابا أنا رايح أشوف حصل إيه مش فاهم حاجه في التليفون.
________
جرس الباب يرن.
كانت مايسه نايمة قامت تشوف مين اللي بره نظرت من العين اللي موجودة في الباب لاقيت جارتها.
تفتح الباب بعد ما تطمن : أهلا وسهلا اتفضلي.
الجاره : كويس إنك بخير يا بنتي دا أنا من ساعة ما مشيتي الضهر وانا قلبي واكلني عليكي.
مايسه : أنا بخير متشكره قوي وآسفة اني قلقتك.
الجاره : لا ابدا الجيران لبعضها شكلي قلقتك من نومك معلش أصل عيني غفلت من شويه كده ومعرفتش إن كنتي رجعتي من بره ولا لأ كشفتي واطمنتي على نفسك؟
مايسه : ايوه شكرا لتعبك اتفضلي ادخلي.
الجاره : لا معلش وقت تاني بقى اسيبك تنامي
تصبحي على خير.
مايسه : وأنتي من أهل الخير.
وتقفل مايسه باب الشقة بتنهيدة.
_________

جلال : يعني ايه واحد وقفكو وقالكو إنه ظابط
فتنزل من العربية تفتحله الشنطة علشان يفتش يقوم ياخدها ويمشي؟!
هايدي : هو دا اللي حصل يا جلال.
غيث : طيب يا بنتي ماأخدتيش رقم العربية؟
هايدي : لأ يا عمي للأسف ملحقتش.
غيث : مين اللي بيكلمك؟
جلال : دي ماما أقولها إيه؟
غيث : مش عارف.. بينا نبلغ المركز.
________
في فيلا تامر.
تامر : يعني إيه مسافر بكره هو لعب عيال يا ابني ولا ايه؟
باسم : معلش يا تامر مش هينفع أكمل في الشغل هنا أنا قولتلك.
تامر : يا عم هو أنت لسه اشتغلت ولا عامل كل ده علشان طلبت ايد أختك؟
طب لو زعلان أنا آسف وبسحب طلبي ده استريحت كده؟
باسم : الموضوع مش كده خالص بص يا تامر خلينا حبايب احسن بلاش لا ندخل في شغل ولا نسب احنا كده أصحاب أحسن مليون مرة من علاقات تانية تبوظ الصداقة اللي بينا.
تامر : ما أنا قولتلك بسحب طلبي أهو أعمل إيه تاني؟
باسم : تسحب العرض كمان اللي عرضته عليه؟
تامر : عرض إيه ده؟
باسم : عرض الشغل أنا مينفعش أشتغل معاك معلش سامحني.
تامر : طب والنسب وعرفنا سبب رفضك إيه إنما الشغل دا اللي مش فاهمه بصراحه.
باسم : خلينا حبايب وأصحاب يا تامر قولتلك.
تامر : خلاص براحتك مقدرش اضغط عليك أكتر من كده تصبح على خير.
______
في شقة زياد.
زياد : استني بس هشرحلك اللي حصل.
نانسي : هتشرحلي إيه هو أنت لسه عندك كلام تاني تقوله بعد اللي سمعته أنا عارفه كل دا من قبل ما مايسه تيجي أصلا بس سكت علشان بابا طلب مني ده لكن أنا لو عليه أقتلك وأرتاح منك.
زياد : باباكي يعرف؟
نانسي : بابا اللي قالي أصلا.
زياد : خلاص فهمت.
نانسي : فهمت إيه؟
فهمت انك ندل وحقير وبيطمرش فيك العشره
رايح تتجوز بعد كل اللي عملته ليك أنت من غيري متسواش حاجه يا زياد عارف يعني إيه أكبر عقاب اللي أنت فيه دلوقت اشبع بالشركة اللي أنت أسستها علشان مش هتعرف تشغلها بقى بتتجوز من ورايا ورايح تعمل شغل من ورا بابا فاكر إن كل دا هيعدي كده لا يا زياد هتدفع تمنه غالي قوي روح بقى للست هانم بتاعتك ومتجيش عندي تاني.
زياد : نانسي أنتي عارفه إني مقدرش أستغنى عنك وجوازي من مايسه كان مجرد نزوة بس خلاص فوقت منها علشان حبك هو اللي باقي في قلبي.
نانسي : انت فاكرني مغفله هصدق الكلمتين بتوعك اللي بتحاول تثبتني بيهم علشان تحافظ على كل اللي حققته من ورا الشغل اللي بابا سهله ليك بحكم دايرة معارفه الكبيرة؟ أنت تستاهل واحدة زي مايسه علشان تنيمك على البلاط وترجع زي ما كنت فاكر لما اتجوزتك كنت عايش إزاي وأنا اللي عملت منك مهندس ناجح بيعت كل دا وروحت تتجوز مايسه روحلها مستني إيه؟
بيفتح زياد باب الشقة بغضب وهو بيتوعد مايسه بعقاب شديد وقبل ما يخرج تفجر نانسي مفاجأة تانية ليه.
نانسي : أنا حامل يا زياد.
زياد رجع ليها وهو مش مصدق.
نانسي : ايوه حامل روحت تتجوز علشان كان نفسك في طفل مش كده؟
أنا بقى حامل بس اللي فضلت تتمناه وتحلم إنه يكون عندك هحرمك منه ومش هخليك تشوفه علشان أنت متستحقش ده اتفضل روح لمايسه وابنها.
زياد : نانسي أنا....
تقاطعه نانسي : أنت تخرج بره حياتي مش عاوزه أشوفك تاني أما بالنسبة لـ أمور الطلاق دي بابا هيبقى يتكلم معاك فيها اتفضل بقى مش عاوزه أشوفك.
___________