أنا حرة

الحلقة ٣٥

#أنا_حرة
_________
الحلقة ٣٥

في التليفون 📞
رشدي : ايوه يا لميا قولتلك جاي.
لمياء : في ايه يا رشدي مالك بتكلمني كده ليه؟
رشدي : ما انتي عماله تتصلي وأنا بكنسل قولت هتفهمني إني قربت خلاص من القاعة.
لمياء : وأنا هعرف منين يعني على العموم توصل بالسلامة.
رشدي : أنا آسف حقك عليه؟
لمياء : خلاص محصلش حاجه على فكرة في ناس هنا سألوا عليك.
رشدي : يا خبر دي أكيد البشمهندسه نهى وباباها.
لمياء : نهى مين؟!
رشدي : هقولك بعدين.
لمياء : ماما رحبت بيها شكلها تعرفها هي كمان.
رشدي : ما قولت هبقى اقولك يا لميا.
لمياء : ماشي خُد بالك من نفسك.
رشدي : أنا خلاص وصلت اهو هركن العربية وجاي.
___________

على طاولة آدم وحنين.
آدم : عقبالنا يا حنين.
حنين : هاه؟
آدم : بقول عقبالنا انتي مش معايا ولا ايه؟
حنين : لأ معاك.
آدم : هو باباكي اضايق امبارح؟
حنين : مش فاهمه بابا هيضايق من ايه؟
آدم : علشان يعني كنت واقف بتكلم معاكي.
حنين : لا ابدا بابا متكلمش معايا في حاجه
وبعدين هو واثق فيك وبيحبك.
آدم : المهم اللي في بالي هو اللي يكون بيحبني.
حنين : طبعاً... ايه دا مش فاهمه؟
آدم : هههههههههههه خلاص خلاص وقعتي بلسانك.
حنين : آه ما أنت ظابط شرطة وأكيد ليكم طريقة تعرفوا بيها تستدرجوا السذج اللي زينا.
آدم : هههههههههههه
دماغك راحت فين؟!
وبعدين شغلنا حاجه وحياتنا الخاصه حاجه تانية.
حنين : لا أكيد ليهم علاقة ببعض.
آدم : خلاص طالما مصممه يبقى ماشي هوافقك على كلامك ده ثواني بس هخرج برة علشان أعرف اتكلم في التليفون انتي عارفه الدوشة بقى اللى حوالينا.
حنين : تمام.. اتفضل.
آدم : ماما على فكرة اللي بتتصل.
حنين : سلملي عليها.
آدم بابتسامة : تمام.. يوصل.

على طاولة تانية.
صدفه : قوليلي يا أم جلال هو يا أختي خطيب حنين ده عنده ملك؟
ثنية : اه عنده.
صدفه : كتير يعني ولا ايه؟
ثنية : عنده بيت وحتة أرض في البلد وشقة هنا في مصر.
صدفه : ممم يعني مش متريش.
ثنية : احنا مبنبصش للي معاه يا أم حسين.
صدفه : فاهمه يا أختي غيث اخويا مش محتاج علشان يبص على الحاجات دي بس مفيش مانع يعني يكون عنده حاجه كده ولا كده خصوصا يعني الاولاني كان يعتبر عنده ملك أكتر من ده.
ثنية : عنده آه بس بتاع باباه وجده وورث بعد وفاته الفيلا اللي كان عايش فيها واخد ميراثه من مامته.
صدفه : يا خسارة.
ثنية : هو ايه اللي خسارة يا أم حسين؟
صدفه : يعني بقى عنده شيء وشويات دلوقت مش كانت رجعتله وخلاص.
ثنية : احنا قفلنا على الموضوع ده وانتهينا منه خلاص وحنين مبقتش تفكر فيه وهي مخطوبة دلوقت وفرحها الشهر الجاي.
صدفه : يااختي ألف مبروك بس مستعجل على ايه مش يصبر شويه لحد ما تاخد عليه.
ثنية : بكرة ياخدوا على بعض رشدي عامل ايه؟
صدفه : كويس.

لمياء : ايه يا جميل قاعد لوحدك ليه؟
حنين بابتسامة : هعمل ايه مش لاقيه حد يقعد معايا.
لمياء : ليه امال خطيبك راح فين؟
حنين : خرج يتكلم في التليفون.
لمياء : اسكتي يا حنين تعبانه قوي.
حنين : يا حبيبتي ألف سلامة عليكي تعبانه عندك ايه؟
لمياء : عندي بيبي عاوز ينزل ههههههههه
حنين : ايه دا انتي قربتي ولا ايه؟
لمياء : قدامي لـ أخر الاسبوع الجاي الدكتورة قالتلي كده.
حنين : تقومي بالسلامة أهم حاجه وبعدين نفرح بالبيبي.
لمياء : خايفه قوي.
حنين : انتي هتخوفيني ليه؟
لمياء : هههههههههههه هو انتي اللي هتولدي؟!
حنين : عاوزه اقولك إن خايفه من الجواز بسبب الموضوع ده.
لمياء : هههههههههههه
لا متخافيش هو يبقى يعملها بدالك.
تخبطها حنين في كتفها.
لمياء : طب اسيبك بقى علشان خطيبك جه سلام.
حنين : مع السلامة.