#أنا_حرة
___________
الحلقة ١٤
بيجري اتنين من أهل البلد يحاولوا يخرجوا اللي جوه العربية.
الرجل الأول : دا اللوا رياض.
الرجل الثاني : طب بينا على مستشفى البلد.
الرجل : و احنا هنلاقي حد هناك دلوقت؟
الرجل الأول : خلاص نتصل بالاسعاف.
الرجل الثاني : انا هروح بسرعه انادي الاستاذ عادل و هو يتصرف.
في فيلا اللواء رياض.
رجاء : اهدا بقى يا عادل زمانه جاي هيروح فين يعني.
عادل : انا اللي هيجنني ايه اللي يخرجه اصلا في وقت زي ده؟!
تامر ينظر من بعيد : في حد جاي بيجري هناك اهو.
عادل : شوفوه يا ابني عايز ايه.
البواب : رايح فين يا صابر؟
صابر : جاي للأستاذ عادل.
تامر : خير في حاجه؟
صابر : جدك وقع في الترعة بالعربية.
تامر : ايه بتقول ايه؟!
صابر : تعالوا شوفوا بنفسكم.
يجري عادل و تامر مع الرجل و معاهم البواب و رجاء واقفه مش عارفه تعمل ايه.
في التليفون 📞
رجاء : كنت جايه يا منير بس حصلت ظروف.
منير(ابن خالتها) : حاجة ايه؟
رجاء : حمايا بيقولوا وقع في الترعة بالعربية.
منير : معقول حصل امتى ده؟
رجاء : لسه من شويه جاي واحد يبلغهم الخبر و عادل و تامر راحوا على هناك.
منير : طيب روحي انتي كمان واجب توقفي جنبهم في ظرف زي دا.
رجاء : معرفش دماغي وقفت بس اقولك هو راجل كبير برضو مش صغير.
منير : يعني ايه مش فاهم؟
رجاء : يعني خطتنا ماشيه كما يجب أن تكون.
منير : رجاء اوعي تكوني...
رجاء : ليه يد في الموضوع يعني؟
لا اطمن انا كنت لسه بفكر في خطه تانية اقولك خلينا نشوف ايه اللي هيحصل هروح بقى اطمن.
منير : طب لما تطمني ابقي طمنينا.
رجاء ببتسامة : حاضر.
_____________
في منزل الحاج غيث.
ثنيه : خير يا حاج ايه اللي حصل في البلد؟
غيث بيلبس الجلبيه : بيقولوا اللوا رياض وقع بعربيته في الترعة و الإسعاف جات خدته.
ثنيه : يا خبر و دا امتى ده؟
غيث : لسه حاصل من شويه بس وسعي علشان انزل.
ثنيه : انت عارف هو في انهي مستشفى؟
غيث : ايوه مستشفى المركز.
ثنيه : طب خلي بالك من نفسك.
غيث : حاضر اقفلي الباب بس كويس.
______________
حنين خارجه من الغرفة بصوت ناعس : ماما هو النهار طلع؟
ثنيه : لا يا حنين الساعة لسه اتنين يا بنتي.
حنين : اتنين الضهر و لا بالليل؟
ثنيه : جرالك ايه بس يا بنتي شكلك لسه نايمه.
حنين : أصل سامعه بابا بيكلمك و قفل الباب صح و لا بيتهيألي؟
ثنيه : ايوه خرج.
حنين : دلوقت!
مش قولتي الساعة اتنين؟
ثنيه : ايوه البلد مقلوبه في حادثة على الطريق.
حنين : حد جراله حاجه؟
ثنيه : اللوا رياض بيقولوا كان راكب عربيته و وقع بيها في الترعة.
حنين : يا خبر و حصله حاجه؟
ثنيه : ايوه طبعا امال يعني عايزة واحد يوقع في الترعة و ميحصلوش حاجه دا كان راكب العربية بقولك دا لو ماشي بس لوحده ووقع مش هيخرج منها سليم.
حنين : معاكي حق يا ماما خصوصا إنه كبير في السن مش شباب يعني هيقدر يخرج و كمان الدنيا ليل بس بابا رايح يعمل ايه؟
ثنيه : اهو راح المستشفى يوقف معاهم يا بنتي انتي عارفه ابوكي صاحب واجب و متفتوش حاجه زي دي.
حنين : طبعا يا ماما طيب أنا هطلع اقعد في اوضتي عقبال ما بابا يرجع.
ثنيه : لا نامي يمكن يتأخر.
حنين : هحاول تصبحي على خير.
ثنيه : و انتي من أهل الخير.
________
أنت تقرأ
أنا حرة
ChickLitفتاة متمرده باعت الغالي بالرخيص و اخرى لم تختر زوجها حتى يوقعها في مشاكل كثيرة مايسه و حنين هنشوف مين اللي هتربح في النهاية. ........ الأم : و لا تزعلي نفسك بكره يجيلك احسن منه. مايسه : بس ابني صعبان عليا قوي يا ماما متعلق بيه. الأم : ليه عجبه قوي...
