أنا حرة

الحلقة ٧

#أنا_حرة
___________

الحلقة ٧
رشدي يقوم من النوم و هو متعصب يفتح باب الشقة : ما بالراحة الباب هيتكسر هو مش كفاية رن الجرس؟!
كريمة : أنت نايم جوه على ودانك و لا ايه مبتفتحش الباب ليه؟
رشدي : اظن الباب اتفتح اهوه.

مايسه : مغير كالون الشقة ليه يا رشدي؟!
رشدي : طب هنوقف نتكلم كده على الباب؟
كريمة تخبط رشدي و هي داخله.
و تقعد في الريسبشن رجل على رجل : تعالي يا مايسه اقعدي يا بنتي دي شقتك و اللي مش عاجبه يتفضل.
رشدي : محدش كان خرجها من شقتها اسمعي كلام أمك و اقعدي يا مايسه.
نظرت مايسه لوالدتها.
كريمة : انتي خايفه تقعدي و لا ايه؟!
مايسه : حاضر يا ماما هقعد.
رشدي : هقولك بقى كلمتين علشان يبقى عملت اللي عليه بس اقفل الباب الأول.
يقرب رشدي يقفل باب الشقة كان فوزي والد مايسه طالع على السلم.
فوزي : الاسانسير عطلان طلعت كل دا على رجلي.
رشدي : معلش يا عمي بيعملوا صيانه اتفضل حضرتك ادخل استريح.
فوزي : أنا جاي اخد مامت مايسه و ماشي على طول.
رشدي : طب بس اتفضل علشان حضرتك لازم تحضرنا في الكلمتين اللي هقولهم دول.
فوزي : حاضر يا ابني هدخل.
و دخل فوزي و قعد جنبهم و رشدي قاعد قصادهم.
رشدي : شوف يا عمي علشان نحط النقط على الحروف و بنتك تركز في الكلام اللي هقوله ده إذا كانت ناويه تعيش مش ناويه يبقى بلاش اتعب نفسي و اتكلم.
كريمة : و اللي عملته دا معناه إنك باقي عليها فاكر بنات الناس لعبه و لا ايه تمد ايدك عليها ليه بقى؟!
رشدي : شوفي أنا كلامي مع حمايا لإنه راجل زيي زيه و بوجه كلامي برضو لبنتك علشان هي صاحبة الشأن فلو حضرتك يا عمي عاوزني اكمل كلامي ياريت مدام حضرتك ملهاش أي علاقة بالحوار ده.
كريمة : نعم يا حبيبي هو ايه اللي مليش علاقة بالحوار ده امال مين اللي له؟!
فوزي : اسكتي يا كريمة.
كريمة : اسكت ليه يا حبيبي مش دي بنتي زي ما هي بنتك؟
رشدي : هتسكتي مامتك و لا اعتبر كل اللي بينا انتهى؟
كريمة : ما تنهي يا اخويا حد ماسكك؟!
مايسه : طب نسمع الأول يا ماما و بعدين لو معجبناش الكلام يبقى نتكلم.
رشدي : تمام أول حاجه لو عايزة نكمل مع بعض اللي اقوله هو اللي يتنفذ مفاتيح الشقة معايا
لا تقولي في بيت بابا و لا معرفش نسيتهم فين لا مؤاخذة يا عمي.
فوزي : حقك يا ابني.
كريمة قاعدة بتحاول تتكلم فوزي يشاورلها متتكلمش.
رشدي : تاني حاجه أي مشكلة بيني و بينك ياريت محدش من أهلي و لا أهلك يعرفوا عنها حاجه.
فوزي : و دي حاجه متزعلش حد ابدا يا ابني
لو هتحلوا مشاكلكم ما بينكم يبقى كويس.
رشدي : اللي حصل امبارح دا ياريت ميتكررش و لو في حد غلط في التاني فهنتحاسب بينا و بين بعض.
فوزي يقوم : طب يلا يا كريمة.
كريمة : يلا فين أنت هتسيب بنتك معاه لوحدها؟!
فوزي : امال هنبات معاهم يا كريمة يلا قومي.
كريمة تهمس لـ مايسه : خدي بالك دا ملوش أمان.
مايسه : متخافيش عليه يا ماما.
فوزي ياخد زوجته من ايدها : تصبحو على خير يا ابني.
رشدي : و حضرتك من أهله يا عمي.
ينزل فوزي و كريمة تحت و تدخل مايسه علشان تغير هدومها.
رشدي : استني يا مايسه.
مايسه : لسه في حاجه تانية عايز تقولها؟
رشدي : اللي قولته قدام مامتك و باباكي دا حاجه و اللي هقوله ما بينا دا حاجه تانية خالص اولا انتي غلطتي في حقي تمام.
مايسه : و انت لما تشك فيه و كمان تمد ايدك عليه دا مش غلط؟!
رشدي : غلط طبعا بس لكل فعل رد فعل شوفي أنا عملت دا ليه؟
مايسه : علشان أنا عبيطه رايحه أجري اعزم و أقف في الطبخ أعمل أكل يشرفك و كمان علشان تطلع من الزيارة دي بمصلحة تقوم تتهمني اتهام زي ده!
رشدي : متهمتكيش أنا قولت ميصحش إنك تقعدي مع راجل غريب لوحدكم مراته كانت نايمه بتتمشى في الشقة اياكان فين مينفعش يا بنت الناس تفضلي قاعدة كنتي قومتي عملتي نفسك بتشوفي الأكل في المطبخ عقبال ما صاحبتك تيجي تقعد مع جوزها تخرجي تقعدي معاهم لكن لما ادخل بيتي و الاقي المشهد دا لازم اضايق و بعدين هما ليه اصلا جم بدري مش مفروض مدينا ميعاد بعدها بساعة؟
مايسه : كانوا قريبين مننا قالوا لسه هنرجع تاني بخلص الأكل لاقيت الجرس بيرن بفتح لاقيتهم في وشي اقولهم بقى ارجعوا تاني علشان دا مش الميعاد اللي متفقين عليه؟!
رشدي : خلاص اللي حصل حصل و اهو درس ليه و ليكي مفروض امسك اعصابي و انتي مفروض تمسكي لسانك شويه.
مايسه : اعمل ايه ما هو لما احس من كلامك إنك بتشك في أخلاقي لازم اتجنن.
رشدي : خلاص ننسى بقى.
مايسه : و القلم اللي أخدته؟!
رشدي : سامحي و أنا مسامح في الكلام اللي قولتيه علشان نقدر نعيش مع بعض.
مايسه : مش عارفه إذا كنت هقدر انسى و اعدي و لا لأ.
رشدي : عدي بقى علشان أنا كمان اعدي اللي حصل احنا الاتنين غلطنا في بعض فأنا بنتأسفلك.
مايسه : خلاص يا رشدي ياريت نفتح صفحة جديدة.
رشدي : مامتك متدخلش في حياتنا يا مايسه سمعاني؟
مايسه : و لا مامتك.
رشدي : و لا مامتي مع إن ماما في حالها بس ماشي.
مايسه ببتسامة : هدخل بقى اغير هدومي.
____________