أنا حرة

الحلقة ٣٩

#أنا_حرة
_________
الحلقة ٣٩

في قاعة الفرح.
نهى : مجبتش يحيى معاك ليه؟
رشدي بابتسامة : يحيى شقي مش هيخليني اعرف أقعد سيبته مع ماما وأختي في البيت.
نهى : كان هيلعب ويتبسط ويتنطط وفيها ايه كل الأطفال اشقيه مش قادر تستحمله شويه امال مامته بقى تعمل إيه؟
رشدي : أنا منفصل ومامته متجوزه وعايشه بعيد عنه.
نهى : أنا آسفة فعلاً حسيت بحاجه زي دي بس
..... وسكتت بحرج.
رشدي : مفيش حاجه الموضوع دا بقاله فترة وأنا اتعودت على الوضع دا خلاص.
نهى : تمام بعد اذنك.
رشدي : اتفضلي.
فادي يقعد بتنهيدة.
رشدي : إيه مالك؟
فادي : مش عارف الظاهر أخدت برد في معدتي كانت بتقولك إيه؟
رشدي : هي مين؟
فادي : نهى.
رشدي : كانت بتسألني عن يحيى.
فادي : ابنك؟!
رشدي : ايوه.
فادي : آه ماله بقى؟
رشدي : يعني بتسألني مجبتهوش ليه؟
فادي : آه وبعدين؟
رشدي : فيه إيه يا فادي مالك عامل زي ظباط البوليس كده قاعد تحقق معايا زي اللي عامل جريمة.
فادي : لا ابدا أنا بس شايف إن الاهتمام تخطى مرحلة الزمالة ووصل لحته تانية خالص.
رشدي : مش فاهم ياريت توضح.
فادي : يعني حاسس ان بقى فيه إعجاب وممكن يتطور الموضوع لحب وارتباط كمان.
رشدي : مين أنا؟!
فادي : امال أنا؟!
رشدي : حب إيه وارتباط إيه بس يا فادي؟!
فادي : يا عم وهي جات عليك يعني ليه متحبش وترتبط زي كل الناس أنا لو لاقيت اللي تحبني مش هتردد لحظه.
رشدي : وليه متحبش أنت كمان؟
فادي : علشان مش كل اللي بنحبه بيحبنا القلب وما يريد.
رشدي سكت وفهم فادي عاوز يقول إيه.
________

في فيلا تامر.
باسم يقلق من النوم يلاقي تامر لسه صاحي.
باسم : تامر أنت لسه منمتش؟
يقفل تامر التليفون : هنام اهوه.
باسم : هتمسح الصور دي امتى؟
تامر : صور إيه؟
باسم : أنت أدرى بقى.
ويغطي نفسه علشان ينام.
تامر يفتح التليفون مرة تانية وينظر في أخر صورة كان بيشاهدها وبحزن يكلم نفسه : همسحهم يوم الخميس.

باسم بيفكر مع نفسه : عاوزني أوافق يرتبط بـ أختي وهو لسه بيحبها طب ازاي أنا أظلم أختي واسلمها لواحد قلبه مع واحدة تانية؟!
__________
في الصباح.
مايسه قايمه من النوم بتتثائب.
فريال : صحي النوم كل دا نوم يا مايسه؟
مايسه : حد له حاجه عندي ما أنام واصحى وقت ما أحب.
فريال : ياريت ردك يكون كويس زي ما أنا بكلمك كده.
مايسه : أنا ردي كده بقى فين ابنك؟
فريال : بتسألي عليه ليه؟
مايسه : هو عيب اسأل عن جوزي؟
فريال : محدش قال إنه عيب ولا حاجه بس أنتي مش متخانقه معاه عاوزه منه إيه بقى؟!
مايسه : متخانقه معاه!
هو أنا أقدر استغنى عنه برضه.
فريال : أسمع كلامك أصدقك أشوف أمورك أستعجب.
مايسه : متستعجبيش يا حماتي إلا صحيح مش ناويه تديني الموبايل بقى؟
فريال : لما أعرف إنك عقلتي كده ونسيتي الحوار
إياه ده.
مايسه : هههههههههههه
ما هو من غير ما انسى ولا حاجه نانسي هتعرف هتعرف.
فريال : زياد يبقى يقولها ولا هو حر.
مايسه : يعني بلاش أنا أقولها هههههههه طيب.
فريال : ناويه على إيه يا مايسه؟
مايسه : كل خير يا حماتي العزيزة.
فريال : مش مستريحه ليكي.
مايسه : ليه بس دا أنتي حبيبتي يا فراولة.
فريال : أنا نازله.
مايسه : اتفضلي.
فريال : هقفل الباب دي أوامر زياد.
مايسه : تمام اقفلي الباب براحتك.
_______