أنا حرة

الحلقة ٢٣

#أنا_حرة
__________
الحلقة ٢٣

آدم ينزل من العربية و يقرب من حنين اللي كانت سرحانه في جمال الطبيعة فجأة تلتفت للخلف أول
ما تسمع صوت آدم.
آدم : سلام عليكم.
حنين : وعليكم السلام.
آدم : اخبارك ايه يا بشمهندسه دلوقت؟
حنين : تمام.
آدم : أنا كنت معدي من هنا قولت انزل اطمن عليكي.
حنين : متشكره جدا لـ اهتمام حضرتك.
آدم : لا شكر على واجب متعرفيش الحاج غيث أنا بحترمه وبقدره قد ايه.
حنين : متشكره جدا.
آدم : يعني مش محتاجه أي حاجه؟
حنين : متشكره بس هو حضرتك بتهتم بكل الناس كده؟
آدم : ازاي يعني مش فاهم؟
حنين : يعني أي حد يبقى واقع في مشكلة أو أتعرض للسرقه مثلا و لجأ لحضرتك بحكم مهنتك يعني بتهتم بيه؟
آدم : أكيد بهتم بالناس كلها بعد اذنك.
و ركب آدم عربيته و ترك المكان.
حنين : ايه يا حنين قلة الذوق بتاعتك دي؟
مش عارفه بقى ليه كل اما اشوفه لازم ابقى مدب كده مع إن أنا مش كده خالص.
___________

في شقة راضي.
صدفه : واتأخرتي ليه كده؟
يا خلاثي يا ناس على القمر بتاعتنا شبه رشدي قوي و هو في السن ده.
لمياء : حضرتها وقفتني حوالي ساعة قدام الباب علشان بس تأكل يحيى و تغيرله.
صدفه : ساعة!
ليه هي كانت بتطبخله خروف جوه و لا ايه و بعدين هو دا ياكل ايه مش فاهمه؟!
لمياء : قصدي يشرب اللبن ما هو اتفطم.
صدفه : يا حبيبي يا ابني
فطمته ليه؟
لمياء : بتقول تعبت وعاوزه ترتاح.
صدفه : تعبت من ايه؟!
دي الرضاعة الطبيعية مفيدة للطفل أمهات اخر زمن.
لمياء : أنا مش هروح هناك تاني أول و آخر مرة.
صدفه : امال مين اللي هيروح؟
لمياء : أي حد يا ماما بس انا لأ.
صدفه : خلاص حسين و لا مراته يبقوا يروحوا.
لمياء : ماما حضرتك كنتي تفتحي موضوع كده
وعاوزه اتأكد منه.
صدفه : ايوه عارفه و ايوه دا اللي لسه هكلم خالك فيه.
لمياء : بلاش يا ماما.
صدفه : ليه بلاش يا بنتي؟
اخوكي متنفعوش غير واحدة زي بنت خالك.
لمياء : تمام أي واحدة بس حنين لأ علشان خاطري.
صدفه : ليه هو انتي مبتحبيش الخير لـ اخوكي؟!
لمياء : طبعا احبله الخير و علشان كده بقول بلاش حنين وبلاش اصلا ارتباط دلوقت رشدي لسه خارج من تجربة قاسيه اكيد تعبان نفسيا و أي قرار هياخده دلوقت مش هيكون عن اقتناع بلاش يظلم حنين معاه هي كمان مش ناقصه وهو هيبقى بيظلم نفسه.
صدفه : بيظلم نفسه ليه دي حنين أدب و احترام و جمال و بنت خاله يعني لا هنسأل ولا ندور و خالك هنعرف نتفاهم معاه شوفتي العيله اللي اخوكي ناسيبهم عاملين ازاي مش لاقيين راجل نكلمه و أمها الكل في الكل محدش عارف يسد قصادها.
لمياء : كل دا كويس و خالي ممكن يوافق مفيش مشكلة بس رشدي مبيحبش حنين و إلا كان اتقدملها من زمان.
صدفه : ما هي كانت الهانم واكله عقله و مكانش شايف غيرها.
لمياء : ومازال بيحبها يا ماما رغم اللي عملته.
صدفه : انتي بتقولي ايه اخوكي بيحبها دا لا يمكن ابدا.
لمياء : ممكن يكون كرهها زي ما حضرتك فاهمه بس من جواه شايف انها كانت أول حب في حياته و يمكن تكون اخر حب كمان.
صدفه : ليه يعني خلاص
مفيش على الكوكب دا غير مايسه؟!
لمياء : تخيلي واحد بالنفسيه دي تيجي تقوليله تعالى اما اخطبلك
فلانه أي إن كانت يعني رد فعله هيكون ايه هيرفض و لو وافق يبقى هيكون علشان ينسى بيها اللي شافه من الأولى ماما بلاش علشان خاطري لو بتحبي خالي بلاش توجعيه مرة تانية كفاية اللي حصل لحنين من الجوازة الأولى.
صدفه : حنين لا هي شبه مايسه و لا اخوكي شبه اللي كانت متجوزاه.
لمياء : انا قولت لحضرتك اللي في ضميري و هو حر بقى.
___________
في المساء.
رامي : هههههههههههه
آدم : يا سلام على خفة الدم اللي انت فيها بقولك مكتئب و مضايق و انت بتضحك!!
رامي : بصراحه يا ابن خالتي و متزعلش مني انت غشيم شويه.
آدم : نعم ! هنغلط بقى.
رامي : من غير غلط و لا حاجه الواحد كده لما يدخل على واحدة و يبقى عاوز يفتح معاها حوار يعني  ميكونش كده
اه صحيح انت هتتعلم دا منين اصلا و انت كل اللي تعرفهم في حياتك مامتك و خالتك و المجرمين اللي بتتعامل معاهم.
آدم : على أساس إنك مقطع السمكة و ديله يعني
يا اخي اتنيل.
رامي : ايه اتنيل دي شتيمه صح؟
آدم : كنت هقولها ايه يعني ما أنا اتكلمت معاها في حدود المسموح تفتكر ظابط شرطة كان بيحقق في واقعة اقتحام لبيتهم هيقولها ايه بحبك و عاوز اتجوزك؟!
ما طبيعي هقولها اخبارك ايه بعد اللي حصل يعني في الليلة اياها دي بس انا اتفاجئت بردها ده.
رامي : هههههههههههه
هي لـ اما ارتبكت من اهتمامك و معرفتش تعبر صح أو هي اصلا مبتحبش حد يتكلم معاها في كلتا الحالتين دا مؤشر كويس.
آدم : ازاي يا فصيح؟!
رامي : لو تبطل تريقه بس و تحاول تقدر الموهبه العبقرية الفزه اللي واقفه قصادك كنت استفدت كتير.
آدم : يا اخي انا مش عارف انت جايب الثقة دي منين؟! اتنيل.
رامي : تاني! بتعيدها تاني برضو.
آدم : قولي اعمل ايه انا عمري ما كنت كده مش عارف اجمع كلمتين على بعض دا انا بمسك المتهم من دول بغربله لحد ما يقر و يعترف بكل حاجه مش عارف اتكلم معاها خالص.
رامي : حلو قولتلي بقى بتمسك المتهم من دول تغربله لحد ما يعترف تمام انت بقى تاخد معاك المرة الجايه صاعق كهربائي كده و تهدددها بيه لحد ما تعترف إنها بتحبك و تقبل تتجوزك.
آدم : هزر براحتك انا غلطان اني اتكلمت معاك اصلا قوم يا حبيبي اتفضل علشان عاوز انام.
رامي : على فكرة خالتي قالتلي روح اقعد مع آدم جوه لحد ما اخلص البسبوسه و انا بقى مش هتعتع من هنا قبل ما اكل البسبوسه.
آدم : اتفضل يا حبيبي كُلها بره عاوز تلم علينا النمل هنا و لا ايه؟!
رامي : هههههههههههه
تخبط جيهان و تدخل : أنا جيت بالبسبوسه يلا مين عاوز يدوق؟
آدم : ايه دا يا ماما؟
رامي : هههههههههههه
بسبوسه و هنلم عليك النمل برضو متخافش تسلم ايدك يا خالتو.
و ياخد قطعة بسبوسه.
آدم : ماما انا مش هعرف انام الليلة.
جيهان : متخافش انت و رامي هتنفضوا الأوضة مع بعض قبل ما يمشي.
رامي : نعم !
آدم : هههههههههههه
رامي : هو دا كرم الضيافة بتاعكوا يعني يجيلكم ضيف تخلوه ينضف البيت؟!
جيهان : الضيف يا حبيبي بيجي كل فين و فين انت حاسب نفسك ضيف و لا ايه البيت بيتك هات المقشه و المساحة يلا.
رامي لـ آدم : مامتك بتتكلم بجد.
آدم : هههههههههههه
جيهان : طبعا امال بهزر يلا بلاش كسل عاوزه الأوضة دي تبرق يلا يا آدم يا ابني همتك معاه.
رامي : خالتي اتفضلي البسبوسه بتاعتك مش عاوز أكل.
جيهان وآدم :ههههههههههه
______________
في شقة راضي.
راضي : بنتك بتتكلم صح مينفعش ابنك يبقى خارج من تجربة زي دي تروحي مدبساه في واحدة تانية.
صدفه : مدبساه!!
اخص عليك هي بنت اخويا تدبيسه برضو؟
راضي : اسمعي يا ام حسين انتي عارفه قصدي كويس حنين مفيهاش عيب بالعكس انا كنت اتمنى انه كان اختارها من الأول بس دلوقت صعب
لا هي مؤهلة للخطوة دي و لا ابنك كمان بلاش علشان متخسريش اخوكي انتي عارفه بيخاف عليها من النسمه لو تعبت مع ابنك هو مش هيسكت.
صدفه : و هتتعب مع رشدي ليه دا يتحط على الجرح يطيب.
راضي : مش دا اللي اقصده ابنك لسه مفاقش
من اللي حصله ازاي عاوزاه يرتبط دلوقت هيظلم اللي هيتجوزها دي
بلاش يا ام حسين لا بنت اخوكي و لا غيرها شويه كده لما يفوق لنفسه و يسدد ديونه و يوقف على رجله من تاني ساعتها نبقى نشوف الحوار ده.
صدفه : حنين بيجري عليها ناس كتير من البلد انت عارف اخويا معروف هناك و الناس بتحبه و تتمنى تناسبه.
راضي بحده : ام حسين خلاص بقى قفلي على الموضوع ده.
_______