أنا حرة

الحلقة الثالثة

#أنا_حرة
#بوسي_مصطفى
_____________
الحلقة الثالثة.

قامت ثنيه و الحاج غيث على صوت صراخ حنين.
بتلبس ثنيه بسرعه و تخرج تلاقي رشدي طالع جري على السلم.
رشدي : هو في ايه يا مرات خالي صوت حنين ده؟
ثنيه بقلق و خوف على بنتها : ايوه.
غيث : أدخلي الأول شوفي بنتك وبعدين افتحيلي الباب أدخل.
ثنيه : حاضر.
تدخل بسرعه عند حنين.
ثنيه : مالك يا ضنايا فيكي ايه؟
حنين و هي ايدها على دماغها بعد ما فاقت من الكابوس اللي شافته : كابوس يا ماما.
ثنيه : يا حبيبتي يا بنتي كنتي خايفه؟
حنين و هي بتبكي و تهز رأسها : ايوه.
ثنيه : ادخل يا حاج دا كان كابوس.
و تاخد بنتها في حضنها.
غيث يدخل : ايه يا بنتي قلقتيني عليكي.
حنين : كابوس يا بابا كابوس وحش قوي.
غيث : هاتيلها كوباية مياه يا حاجه.
تمد ثنيه ايدها و تملأ كوب مياه.
ثنيه : اشربي يا حنين و متخافيش يا بنتي احنا جنبك.
غيث : خليكي نايمه جنبها الليلة يا حاجه.
ثنيه : حاضر.. ها عامله ايه دلوقت؟
حنين : تمام.
ثنيه : هو رشدي كان بيعمل ايه تحت؟
غيث : بيقول مكانش جيله نوم نزل اتمشى شويه في الجنينه قبل ما يسمع صوت حنين.
حنين بدهشه : بيتمشي في الجنينه تحت!
غيث : ايوه يا بنتي ليه في حاجه؟
ثنيه : اكمن الجو برد يعني الليلة دا الواحد بيكسل يقوم الصبح بس قومت دلوقت محستش بنفسي من الخضه مع إن قومتي تقيله حبتين.
حنين : حضرتك متأكد يا بابا إن رشدي كان بتمشى تحت في الجنينه في الوقت دا؟!
غيث : ايوه مستغربه ليه؟
حنين : أصل أنا شوفته في الحلم برضو و هو بيتمشى في الجنينه بس شوفت بعد كده حاجه مخيفه قوي دخلت من الشباك ده.
غيث : غطي بنتك كويس و خليكي جنبها تصبحو على خير.
و خرج غيث من الغرفة.
حنين : هو بابا ليه مش مصدق إن في الحلم حقيقي شوفت رشدي بتمشى تحت في الجنينه؟
ثنيه : عادي يا بنتي بتحصلي كتير احلم بحاجه و تتحق بعدها على طول انسي بس الكابوس دا و حاولي تنامي.
____________
في الصباح في شقة فوزي (والد مايسه).
كريمة : ايه كل دا هتاخدي كل الهدوم دي معاكي؟
مايسه : امال هسيبهم هنا لمين؟
كريمة : سبيهم يمكن تحتاجيهم في ليلة تباتي فيها هنا خلي اللي عندك هناك كله جديد في جديد.
مايسه : في حاجات جديدة هنا لسه ملبستهاش.
كريمة : يا خايبه خليه يشتري اوعي تاخدي حاجه معاكي حتى لو جديدة هيفكرها قديمة و هتعوديه على كده يقولك ألبسي من اللي عندك لازم كل شهر لما يقبض يشتريلك جديد عايزاكي دايماً كده منوره شغلي دماغك دي شويه بقى.
فوزي : أنا خايف تشغل دماغها بطريقتك دي كله يتطربق فوق دماغها علشان تستريحي يا كريمة
بتقولك اللبس جديد هي مصاريف و خلاص خفي عليه شويه يا بنتي هو صارف و مكلف كتير في الجوازة دي.
كريمة : و ماله يا حبيبي لما تلبس و تتشيك و كله يبقى جديد في جديد ما هو ليه في الاخر الناس لما تشوفها هتقول دا مهنيها و مستتها و مش مخليها عايزة حاجه و دا بيبان في اللبس.
فوزي : الجواز مش كله فسح و خروجات و لبس يا كريمة الجواز مسؤلية اتنين بيشيلوا بيت واحد لازم قلبهم يبقى على قلب بعض علميها ازاي تتعامل مع جوزها لو جه في يوم تعبان عرفيها تعمل أكلة حلوة  لجوزها تفرحه بيها
ما هو اللبس مهم و كل حاجه بس في حاجات تانية كتير جنبه تخلي للحياة طعم.
كريمة : عايزها خدامه صح؟!
فوزي : أنا مش هتكلم تاني اسمعي كلام مامتك يا بنتي اللي تقول عليه تنفذيه بالحرف الواحد بس متجيش تكلميني في حاجه بعد كده.
كريمة : أنت اصلا بتتدخل ليه في الحاجات دي اما عجيبه!
فوزية : يا ستي قولتلك أنا مش هتكلم خالص و هقعد بره ساكت مش هفتح بؤي.
و خرج فوزي من الغرفة.
كريمة بضيق : شوفتي باباكي أنا مش عارفه اعمل معاه ايه من يوم ما طلع على المعاش و هو مزهقني كده.
مايسه : معلش يا ماما
هو فين الدريس النبيتي؟
كريمة : انتي عقلتيه في شماعته في الدولاب خارجه و لا ايه؟
مايسه : لأ بس هلبسه بالليل احتمال رشدي يجي بعد ما يرجع من عند خاله.
كريمة : مش خاله دا اللي عنده اراضي و مزارع كتيره؟
مايسه : ايوه ما هو ملوش غير خاله ده و خال تاني بس توفى و مكانش عنده ولاد.
كريمة : و هو رايح في الوقت دا ليه؟
مايسه : راح يعزمه.
كريمة : و هو مكانش ينفع في التليفون مش له بنت برضو و لا أنا بيتهيألي؟
مايسه : ايوه كانت جات في الخطوبة.
كريمة : مبتنزلش من زور مش عارفه ليه؟!
مايسه : و لا أنا كمان يا ماما مبتطقهاش.
___________
في البلد..
رشدي : أنا عمري ما دوقت بلح بالطعم ده.
حنين : مش فاهمك يعني عاجبك و لا؟
رشدي : أكيد عجبني دا مسكر قوي غير اللي بنشتريه عندنا.
ابتسمت حنين : عم فتحي هات كل البلح اللي عندك.
رشدي : لمين كل دا؟
حنين : دي تعليمات الحاج غيث عايزة يزعل مننا و لا ايه؟
رشدي : لا طبعا مقدرش على زعل خالي بس دا كده كتير قوي غير البط و الوز و الحمام اللي بيتنضفوا هناك عندكو.
حنين : دي كلها حاجات بسيطه بألف هنا و شفا.
رشدي : متشكر على فكرة انتي خضتيني امبارح حتة خضه.
حنين : علشان يعني الكابوس اللي شوفته؟
رشدي : هو كان وحش للدرجادي؟
حنين : قوي و مش عايزة افتكره.
رشدي : لا بلاش تفتكريه
على فكرة يا حنين انتي طيبه قوي انتي و مامتك و كمان خالي دا بقى الحنان كله.
حنين : بابا بيحب عمتو قوي فتلاقيه بيحب ولادها و بيعتبرك انتي و حسين زي جلال اخويا بالظبط.
رشدي : و هو كمان في معزة ابويا.
حنين : ايه ده؟
كانت عربية الشرطة معديه و الأرض فيها مياه من مطرة امبارح.
فتحي : لمواخذة ي معلش السواق غشيم حبتين.
رشدي : يلا نرجع البيت علشان تغيري هدومك.
فتحي : أصل دا الظابط الجديد اللي انتقل للقسم هنا بدل ممدوح باشا.
واحد من الفلاحين : ما نشوف دا هيظبط البلد و لا هيسيبها للبلطجيه و العيال اللي بيشربوا طول الليل في القهوة.
فتحي : ما هو الظاهر رايح عند القهوة.
رشدي : طب بينا احنا بقى يا حنين.
حنين : اتفضل.
تركب حنين العربية علشان تسوق و معاها بنت عديله و فتحي اللي بيدخل البلح في شنطة العربية.
حنين ' خلاص يا عم فتحي؟
فتحي : ايوه خلاص.
حنين : طب اركب بقى علشان بابا عايزك.
فتحي : ماشي بس خدي بالك علشان الأرض كلها غرقانه مياه.
رشدي : معرفش بقى هيكون عندنا مطره زي دي و لا خفيفه؟
حنين : متقلقش عقبال ما تيجي تروح هتكون المياه اللي على الطريق نشفت.