أنا حرة

الحلقة ٢٦

#أنا_حرة
_________
الحلقة ٢٦

زياد : هنسافر بكرة.
مايسه : ليه؟!
زياد : عندي شغل.
مايسه : يعني ايه عندك شغل احنا مش مفروض جايين هنا نقضي عشر أيام ودا قليل على فكرة وقولت ماشي إنما نسافر بعد يومين ليه هي نانسي قالتلك ايه في التليفون؟
زياد : مايسه متحاولش تسألي على حاجه متخصكيش.
مايسه : انت تغيرت قوي يا زياد اسلوبك في الكلام معايا مش هو بتاع قبل الجواز ايه هو انت خلاص
ضمنت وجودي في حياتك علشان كده بتعاملني المعاملة دي؟!
زياد : مايسه لازم تفهمي إني رجل حر محبش ست تمشيني على مزاجها لما اقول هنسافر بكرة يبقى تقومي تجهزي شنطتك
اما بخصوص نانسي فمتحاوليش تعرفي اللي بينا قالتلي ايه قولتلها ايه دي حاجه خاصة زي حياتي أنا وانتي كده.
مايسه : كده.. طيب يا زياد.
زياد : اه هترجعي تاخدي حاجتك من شقة رشدي وتقعدي في شقتك معززه مكرمة اظن هو عرف دلوقت فجه الوقت تسيبي الشقة ليه.
مايسه : و يحيى؟
زياد : احنا اتفقنا على ايه قبل الجواز اظن اللي أوله شرط أخره نور انا مضحكتش عليكي وقولت كلام ورجعت فيه انا كنت واضح جدا معاكي
ابنك ممكن يبقى معاكي زي ما تحبي بس الليلة اللي اباتها عندك ابنك يبقى عند مامتك اظن انا كده مظلمتكيش وبعدين اقولك حاجه الولد اصلا مش فارق معاكي دا كارت ب تستخدميه بس علشان تضايقي رشدي شويه.. تقرفيه شويتين اهو لزوم العند و المكابره بقى
اه حاجه كمان مشاكل مع رشدي مش عاوز حاولي تمشي امورك.
مايسه : ايه الشروط دي كلها يا بشمهندس؟!
زياد : مايسه حبيبتي احنا فاهمين بعض كويس قوي أنا قولت اتجوز ست ذكيه بس متصدعش دماغي.
مايسه : أنا...
يقاطعها وهو بيحتضنها : عاوزين نعيش مع بعض
في هدوء اوك؟
مايسه : اوك يا زياد.
زياد بابتسامة : طب تعالي وابقي ظبطي الشنط بعدين.
____________

في منزل الحاج غيث.
تنزل حنين جري.
ثنية : ايه في ايه استني يا بنتي واخداني من ايدي ورايحه على فين سبيني اكمل اللي كنت بعمله.
حنين : هبقى انزل اساعدك يا ماما بس شوفي دا كده
الطرحة دي ماشيه مع الطقم؟
ثنية : اه ماشيه سبيني بقى.
حنين : ثواني بس. الشوز دا ماشي مع الطقم؟
ثنية : ايوه حلو.
حنين : طب البس السلسله دي ولا دي ولا ألبس العقد؟
ثنية : مش عارفه جربيهم كلهم.
حنين : استنى بس يا ماما رايحه فين؟
الغوايش دي ولا الاسورة احلى وألبس خاتم واحد ولا اتنين ولا اكتر؟
ثنية : يوووه يا حنين متلبسي اللي تلبسيه يابنتي.
حنين : أصل مامت آدم جايه بكرة وانا مش عاوزه تقول إن ذوقي مش حلو في اللبس و متلخبطه مش عارفه ألبس ده ولا ده ولا ده؟
ثنية : تصدقي انك حيرتيني معاكي.
حنين : مش عارفه خايفه من المقابله دي قوي اكتر من اللي كانت قبلها.
ثنية : متخافيش وخليكي واثقه من نفسك.
حنين : تفتكري ياماما هي موافقه ولا جايه وهي مش مقتنعه بعروسة ابنها؟
ثنية : ليه بقى انتي مستقله بنفسك ليه
وبعدين آدم طاير بيكي ملكيش دعوة بقى بمامته.
حنين : كان نفسي يكون ليه شقة لوحدي بعيد عن البيت بتاعهم ده.
ثنية : هو عنده شقة في مصر.
حنين : بس شغله هنا.
ثنية : لأ يعني اقصد من وقت للتاني ابقو قضوا الاجازة هناك.
حنين : مش عارفه بقى المهم انهي احلى علشان اعرف انام؟
ثنية : ألبسي الخاتم دا مع الاسورة والطقم دا حلو ومعاه الطرحة والجزمه.
حنين : ماشي كده كويس.
ثنية : انزل بقى اخلص تتبيلة اللحمه؟
حنين : هنزل اساعدك هدخل بس الهدوم دي في الدولاب واحصلك.
ثنية : لا خليكي روقي بس الأوضة اللي اتكركبت دي.
حنين : نص ساعة وترجع زي ما كانت.
ثنية : ماشي خلصي وانزلي علشان هعملك حاجه خفيفة تاكليها قبل ما تنامي.
حنين بابتسامة : تسلم ايدك يا ست الكل.
_____________
في الصباح في فيلا اللواء رياض.
باسم : تامر انت ياله أنا جيت قوم بقى.
تامر بصوت ناعس : مين؟
باسم : بقولك قوم أنا باسم.
يفتح تامر عيونه وبدهشه وفرحه : باسم!
باسم : ايوه قوم سلم عليه.
تامر يقوم يسلم وهو بيفكر.
باسم : ايه مالك مش فرحان إني جيت و لا ايه؟
تامر : لا طبعا فرحان اخبارك ايه ياباسم عامل ايه؟
باسم : تمام قولي انت اللي اخبارك ايه حد يسيب هناك ويجي هنا برضو؟!
تامر : مفيش احلى من هنا.
باسم : هههههههههههه طيب ياعم جيبتلي ايه معاك بقى من هناك؟
اوعى تكون نسيتني.
تامر : مقدرش انساك اديني عشر دقايق بس افوق كده واخد شاور واجي واديك الهدية بتاعتك.
باسم : ماشي اديني قاعد اهو مستني.