أنا حرة

الحلقة ٢١

#أنا_حرة
_________
الحلقة ٢١

في شقة زياد
زياد : صدقتيني دلوقت؟
نانسي : يعني مفيش حاجه بينك و بينها بجد؟
زياد : لسه برضو بتشكي فيه؟
نانسي لنفسها : مستحيل اسيب مايسه تتهنى بيه زياد دا حب عمري أنا
هي أكيد كانت نزوة و فاق منها لما بابا شد عليه
أما انتي بقى مايسه حسابك معايا تقل قوي بقى ملقتيش غير جوزي
اخص على أخلاقك مكونتش متخيله إن يطلع منك كل دا.
زياد : ايه يا حبيبتي روحتي فين؟
نانسي بتبكي : بصراحه مش مصدقاك.
زياد : طب اعمل ايه بس علشان تصدقيني؟
نانسي : أنا اللي هعمل.
زياد : هتعملي ايه؟
نانسي : ملكش دعوة بقى انا هعمل ايه.
زياد يقرب منها : خلاص بقى حقك عليه.
نانسي : مفيش سفر تاني من غيري حتى لو كنت مسافر في شغل.
زياد : حاضر.
نانسي : تصبح على خير.
زياد : ايه دا انتي هتنامي؟
نانسي : ايوه عندك اعتراض؟
زياد : لأ يا حبيبتي براحتك.
تغطي نانسي نفسها علشان تنام.
زياد : مكانش قدامي غير كده علشان اخرج من الحوار المهبب ده يا ترى يا مايسه عامله ايه دلوقت
رشدي قفل و مبيتفاهمش تلاقيه ضربها بس لو اطوله هقتله هو ممكن يطلقها فعلا؟
اه لو عمل كده يبقى عملي انا مصلحة هفضل اشكره عليها العمر كله هههههههه
اه يا نانسي لو بتقري أفكاري كان زمانك طالبه الطلاق دلوقت
ههههههههههههه
لازم اثبتلها حسن نيتي
اعملها ايه اعملها ايه؟
اكتبلها الفيلا علشان تحل عني شويه
لا الفيلا غاليه قوي و انا لسه مسددتش اقساطها
اغيرلها العربية و لا اجيبلها طقم سولتير رقيق كده و شيك ما هو مش خسارة فيها برضو
علشان ابوها ميقفش عليه و دا لو قفش هيعملي مشاكل في الشغل.
_____________

تاني يوم في منزل الحاج غيث.
غادة : أول ما آدم قال لرامي و جه قالي على طول قولت لازم اجي اطمن عليكي.
حنين : متشكرة يا غادة بس آدم مين؟
غادة : آدم ابن عمي
حضرة الظابط.
حنين : ايوه افتكرت أصل مكونتش عارفه اسمه.
غادة : لأ قولتلك قبل كده.
حنين : معلش نسيت.
غادة : لا يا حبيبتي و لا يهمك المهم انتي عامله ايه دلوقت؟
حنين : تمام بس بقيت خايفه انام لوحدي.
غادة : دي فترة مؤقته متقلقيش هتعدي بس خلي ماما تنام معاكي لحد ما أعصابك تستريح.
حنين : ما هو دا اللي بيحصل فعلا.
غادة ببتسامة : ألف سلامة عليكي يا حنون.

تحت.
ثنيه : متشكره قوي يا جماعة على جيتكم ليه لحد هنا.
صديقه : يا اختي بتشكرينا على ايه دا أنا أول ما عرفت الخبر كنت عاوزه اجي بس قولت زمانكم تعبانين دلوقت و مش فايقين للزيارات و الكلام ده.
ثنيه : لا يا حبيبتي انتوا تيجوا في أي وقت اشربي يا أم رامي العصير بتاعك.
رباب : ألف سلامة على حنين هي عامله ايه دلوقت؟
ثنية بخير يا اختي تسلمي.
___________

في شقة رشدي.
كريمة : لا يا عصام دا لازم يتربى.
عصام (شقيق كريمة) : معلش يا كريمة يا اختي متزعليش مني بس بنتك اللي حطت نفسها في موضع الشبهات لما كدبت عليكي و على زمايلها في الشغل و صاحبتها كان لازم تشك فيها لو مايسه في نفس وضعها هتشك في صاحبتها برضو و لا ايه يبقى احنا نبعد أي حاجه ممكن تجيب شبهه لينا.
مايسه : خالو أنا محطتش نفسي في موضع شبهات
و ليه هي افترضت سوء النيه مقالتش صدفه ليه مثلا؟
عصام : لو مكانها هتقولي نفس الكلام دا يا مايسه اعتقد لأ طبعا.
كريمة : نهايته احنا عايزين نخلص من الجوازة دي.
عصام : طيب لو جه اعتذر عن سوء التفاهم ده هتسامحي يا مايسه؟
كريمة : أنت بقى اللى تجاوب على السؤال ده لو بنتك مكان بنتي هتسامح و تنسى و تخليها تعيش معاه بعد ما شك في أخلاقها؟
رد يا عصام سكت ليه؟
عصام : أنا مسكتش انا سامعك يا كريمة يمكن انتي مش واخده بالك إنها مخلفه منه ولد لسه يدوب حتة لحمه منطقش حتى و لا يعرف ابوه.
كريمة : احسن احنا مش عاوزينه يعرفه من أساسه الأب اللي يتهم امه في أخلاقها بلاش يعرفه و لا يكون ليه صله بيه.
عصام : مش بمزاجك الدم بيحن لو سافرت بيه بلاد الهند حتى هيعرف ابوه و هيجيله يرتمي في حضنه بلاش تبقي سبب في خراب بيت بنتك يا كريمة.
كريمة : أنا!
مايسه : ماما ملهاش علاقة بالحوار دا اصلا يا خالو من قبل ما ماما تيجي و انا مقرره اني مش هكمل معاه دا غير الضرب اللي ضربهولي على ايه مش فاهمه للدرجادي يشك فيه؟!
عصام : طيب مش وضحتيله الحقيقة ليه؟
كريمة : قولنا كتير و دا عامل زي المجنون مش شايف قدامه مفيش في دماغه غير إن بنتي كانت مسافره و عارفه إن جوز صاحبتها ده كان مسافر معاها و مرتبين مع بعض.
عصام : طلباتك يا مايسه؟
مايسه : يطلقني.
كريمة : لا استني قبل ما يطلق الشقة تتكتب بـ اسمها.
عصام : صعب دا يحصل هو ممكن يسيبك عايشه فيها بس تفضل بـ اسمه.
مايسه : ليه بقى تفضل بـ اسمه؟
عصام : لإنها بتاعته.
كريمة : طب و العفش؟
عصام : هو لو عاوز يطلق هيسيب كل حاجه بس بقول ترجعيله حاجته و تاخدي انتي حاجتك.
كريمة : الشقة باللي فيها ملكها يا عصام مش هياخد قشايه.
عصام : تعالى احضرنا يا استاذ فوزي.
كان فوزي جاي من بره.
فوزية : اهلا يا استاذ عصام سايبين الباب مفتوح ليه؟
كريمة : هو انا مقفلتوش؟!
عصام : قولي اعمل ايه في دماغ كريمة و بنتك مش عاوزين حل يرضي جميع الأطراف.
فوزي : محدش هيرضى بحاجه و بعدين انا قولت مش هدخل في الحوار ده
علشان مايسه بتزعل من كلامي.
مايسه : مش حكاية زعل يا بابا بس حضرتك كده بتضيع حقي.
فوزي : كده يا بنتي طيب حقك عليه.
عصام : رايح فين بس يا استاذ فوزي؟
انزلي ورا باباكي رضيها بكلمتين مينفعش ردك دا عليه.
كريمة : اسكت يا اخويا دا فارسني بدل ما يوقف في صفنا لأ جاي علينا.
___________