أنا حرة

الحلقة ١١

#أنا_حرة
________
الحلقة ١١

مايسه : اشششش رشدي بيتصل.
في التليفون📞
مايسه : ايوه يا رشدي.
رشدي : انتي فين يا مايسه؟
مايسه : عند ماما ليه في حاجه؟
رشدي : رجعت البيت ملقتكيش قلقت.
مايسه : ليه خلصتوا الخطوبة بدري كده؟!
رشدي : لأ جاي اخدك معلش اتنرفزت عليكي بس انتي اللي نرفزتيني.
مايسه : مش هعرف اكلمك دلوقت لما ارجع بقى.
رشدي : هقف تحت البيت  ارن تنزلي.
مايسه : لا متتعبش نفسك أنا هروح لوحدي.
رشدي : لا نروح ايه هاخدك تحضري الخطوبة ما هو مينفعش احضرها لوحدي.
مايسة : مش نازله يا رشدي أرجع أنت بيتكم علشان ميتوغوشوش عليك المهم متزعلهمش منك.
زياد يكح..
رشدي : مين اللي جنبك؟
مايسه : مفيش حد جنبي.
رشدي : بس في صوت حد بيكح جامد.
مايسه : اه ما هو أنا مش بقولك عند بابا بيكح عادي فيها ايه دي؟
رشدي : فكرتك بتتكلمي و مفيش حد جنبك.
مايسه : طب سلام علشان ماما بتنادي مجهزة السفرة من بدري.
و قفلت مايسه.
زياد : انا آسف.
مايسه : لا محصلش حاجه
معلش هتوصلني عند بابا.
زياد : مفيش مشكلة العنوان ايه؟

مايسه : و لا اقولك وصلني البيت.
زياد : زي ما تحبي.
______________

بعد شويه.. في شقة والد رشدي.
راضي : انتي بتقولي ايه يا صدفه؟!
صدفه : و فيها ايه يعني أنا هعمل ايه بالارض اللي عندي في البلد اهو سترة البنت احسن مليون مرة من الأرض.
راضي : يعني مش كفاية بيعتي الجنينه و الدهب اللي عندك علشان نشتري الشقة اللي عايشين فيها دي كمان عايزة تبيعي باقي ميراثك لا مش موافق.
صدفه : و هنجهز البنت منين بس يا راضي ما هو أنا عارفه اللي فيها ولادك محدش منهم هيساعد اللي ظروفه على قده و اللي المسؤلية اللي عنده متسمحش إنه يساعد فخلينا نستر على البنت علشان نبقى قضينا رسالتنا ناحيتهم و اهي الأرض في الأول و الاخر كانت هتبقى ليهم.
راضي : مش موافق يا صدفه قولتلك و لو اخوكي طاوعك المرادي أنا هزعل منه.
صدفه : و تزعل منه ليه هو كان جبرني قبل كده علشان يغصب عليه دلوقت اهو غيث أولى من الغريب و كانت أرض ابويا في الأول و الاخر و مرحتش لحد بعيد.
راضي : يا ست انتي دماغك ناشفه ليه بقولك متبعيش حاجه و أنا هتصرف لسه بدري متقلقيش خطيب بنتك قدامه كتير لما يخلص الشقة و يشطبها و يفرشها و يحوش للفرح يوووه مواله لسه طويل قوي.
صدفه : معلش نكون احنا جاهزين برضو.
راضي : طيب بس متبعيش حاجه أنا هتصرف.
___________

في شقة رشدي.
رشدي : لا ماشيه بدماغك يا مايسه و مش عامله اعتبار لكيس الجوافة اللي حضرتك متجوزاه.
مايسه : كل دا ليه يعني علشان قولتلك إني في بيت بابا و رجعت لاقتني هنا؟!
رشدي : يا برودك بجد مشوفتش كده يعني ايه تخليني اروحلك على هناك و انتي ترجعي هنا على البيت ايه هو عند و خلاص و لا بتعلميني الأدب علشان متهفش في دماغي بعد كده و اصالحك؟!
مايسه : أنت مش سيبتني و نزلت رايحلي على بيت بابا ليه؟
رشدي : اولا أنا مسبتكيش و نزلت غير بعد كلامك البايخ اللي قولتيه و انتي اللي بعضمة لسانك قولتي اختك متخصنيش مش هحضر خطوبتها فسيبتك و نزلت تاني حاجه بقى و لازم تتحاسبي عليها يا مايسه انك تخرجي من البيت من غير ما تستأذني و كأنك مش متجوزه راجل له كلمة في بيته و له حكم عليكي.
مايسه : ايه شغل سي السيد ده هو أنا لما اكون مخنوقة من تصرفات حضرتك مفروض افضل قاعدة في البيت منتظرة لما تتعطف و تتكرم عليه و ترجع تصالحني لا يا رشدي فوق لنفسك مش مايسه اللي تعيش معاك بالطريقة دي أنا ليه كياني و شخصيتي و عمرك باللي بتعمله دا ما هتحاول تكسرني و لا تقلل من كرامتك كست و عمري ما هنتظرك إنك تكلمني لاني مبستناش حد.
رشدي : لا تعالي هنا كده عيدي اللي قولتيه دا مرة تانية علشان بس مكونتش واخد بالي بتقولي ايه حضرتك؟
مايسه : بقولك أنا حرة في تصرفاتي طالما مغلطتش.
مسك ايدها رشدي : لما تخرجي بدون اذني دا صح مش كده؟
مايسه : أنت عارف كويس قوي أنا كنت فين و بعدين ما أنت نزلت هيصت مع اخواتك من غيري و لا حلو ليك و لما أنا اعمل زيك تقلب عليه بالشكل ده.
رشدي : انتي واعيه بتقولي ايه و لا دماغك دي ضاربه حاجه اصل مستحيل تكوني طبيعية انتي بتخلطي الأمور كلها في بعضها ليه أنا انزل أنا حر لكن تنزلي انتي بدون اذني ليه هي دي التربية اللي تربيتها في بيتكم مامتك كانت بتعمل زيك كده و انتي بتقليديها مثلا و لا ايه؟
مايسه : لا بقولك ايه متجبش سيرة ماما خالص على لسانك امي ست محترمة و قاعدة في حالها متحاولش تستفزني بقى.
رشدي : شوفي يا بنت الناس لو فضلتي ماشيه بدماغك كده مش هننفع مع بعض صدقيني الحياة بالشكل دا مش هتمشي انتي عايزة تعملي اللي في دماغك من غير ما تاخدي حتى رأي الراجل اللي مفروض جوزك دا بقى في الأحلام يا مدام.
مايسه : انت رايح فين؟
رشدي : داخل انام.
مايسه : بس عاوزه انام لوحدي.
رشدي : نعم!
مايسه : خلاص نام جوه و أنا هشوفلي حته تانية أنام فيها.
رشدي : لا و على ايه اتفضلي نامي في اوضتك و أنا هنام هنا.
تركته مايسه و دخلت تنام جوه.
___________