أنا حرة

الحلقة الخامسة

#أنا_حرة
#بوسي_مصطفى
______________

الحلقة ٥

حنين للضابط :  ازاي يعني نخرج بره والدي له حق و لازم ياخده و لو حضرتك مش قادر تجيب حقه قول و الرجاله دي كفيله تقوم بالواجب.
آدم واقف و معرفش يرد لإنها بنت.
غيث : معلش يا حضرة الظابط بنتي بس مضايقه و فاهمه الموقف غلط.
حنين : حضرته عايز يخرجنا من القسم بيطردنا من المكان اللي مفروض الناس بتلجأ ليه علشان تاخد حقها!
آدم : أنا قصدت اللمه اللي حاصله دي جوه القسم حضرتك نشوف شغلنا ازاي في الدوشه دي اما بخصوص حق والدك فهو متنازل عنه و احنا شغلنا شايفينه كويس قوي مش حضرتك اللي هتيجي تعرفهولنا.
غيث : حقك عليا معلش هي بس  خايفه
عليا أنا كويس يا بنتي و اتعورت بالغلط مكانش يقصدني و أنا مسامحه خلاص يلا بينا بعد اذنك.
و اخد حنين و زوجته و خرجوا و أهل البلد اللي كانوا موجودين داخل القسم خرجوا هما كمان .
آدم يدخل المكتب و هو مضايق.
العسكري : أدخل المتهم اللي بره يا باشا؟
آدم بتنهيده : لأ شويه كده.
________

في العربية.
حنين : ازاي يا بابا حضرتك تتنازل عن حقك اللي اسمه جاسر دا لازم يتحاسب.
مسعد : اسمه ياسر.
حنين : مش مهم المهم إنه يتحاسب حتى لو مكانش يقصد حضرتك.

في المنزل
غيث : انتي مش فاهمه الموضوع يا بنتي و بعدين الجرح سطحي ملحقش اصلا يدوب المنجل عدى من فوق ايدي و أنا ببعد الحاج إبراهيم علشان متجيش فيه.
حنين : و كمان الظابط دا رخم قوي و اسلوبه وحش
ياريت ينقلوا من هنا.
غيث : الراجل معلمش حاجه لكل دا يا حنين هو بيحافظ على  شغله يا بنتي الدوشه اللي حاصلت جوه القسم دي تضره و هتبقى المسؤلية عليه شغلهم كده يا بنتي و محدش يقدر يلومه و مكانش يصح إنك وسط الرجاله كده تعلي صوتك و دا ظابط يعني معندوش هزار.
حنين : ايه يعني ظابط هو هيخوفنا؟!
ثنيه : كُل يا حاج تلاقيك نزفت كتير عوض بقى بالأكل.
غيث : نزفت ايه بس يا حاجه بقولكوا الجرح سطحي انتو قلبكو خفيف كده ليه؟
عديله تخبط : الحاج إبراهيم قاعد تحت و عايز يطلع يطمن عليك يا حاج.
غيث : خليه يطلع يا عديله.
حنين : طيب أنا داخله اوضتي هجيلك يا بابا بعد شويه.
غيث : طيب يا بنتي.
ثنيه : استني يا حنين خديني معاكي.
الحاج إبراهيم يدخل : سلامتك يا حاج غيث  ألف سلامة عليك يا اخويا أنا مش عارف اقولك ايه أنا السبب.
غيث : محصلش حاجه يا حاج إبراهيم متقلقش أنا كويس.
__________

باسم : أصلك غشيم عايز تلعب بديلك يبقى بره البيت مش تجيبها البيت و مراتك كمان تطب عليك.
تامر : بقولك الست دي معرفهاش دي كانت معرفة الزفت لؤي.
لؤي جاي عليهم : ليه بقى الغلط دا يعني دا رد الجميل كنت عاوز ابسطك  و افرفشك خصوصا إن مراتك كان بقالها اسبوع عند أهلها.
تامر : بقولك ايه متجبش سيرتها خالص و احنا قاعدين مع بعض علشان مطيرش رقبتك.
باسم : اهدا بس اهدا ايه مالك تطير رقبته ايه هو زباله صحيح بس متوصلش للدرجادي.
لؤي : و ليه الغلط دا بس يا عم باسم أنا أعرف ارد عليك برضو بس هسكت المرادي.
باسم : يعني يا غبي مش فاهم أنا بشتمك ليه دي عمله تعملها فيه برضو؟!
لؤي : كنت أعرف منين إن مراته هتيجي؟!
تامر : تاني برضو أنا مش قولتلك لو جيبت سيرتها هطير رقبتك!
باسم : خلاص مش هيعمل كده تاني اهدا يا تامر علشان تعرف تفكر.
تامر : افكر في ايه الاستاذ خرب بيتي و له عين يتكلم كمان.
لؤي : بقولك ايه كله كان بمزاجك يا حبيبي لما شربت و خدتها معاك البيت مكونتش ضاربك على ايدك كله بمزاجك ماشي.
باسم : ماشي بس لاحظ إنها أول مرة يعني كنت رتبت الحوار دا في حته تانية مش في البيت.
لؤي : يا عم بقولك مكونتش أعرف هو قالي إنها مش جايه دلوقت خالص و كمان لو جايه هتتصل بيه هي بقى كانت عملاله مفاجأة و مكانتش تعرف بـ المفاجأة اللي مستنياها.
تامر : ياله غور من هنا مش طايقك.
باسم : اسمع بس يا تامر في حل لو وافقت عليه يبقى قشطه ماشي.
تامر : حل ايه ده؟
باسم : الوله لؤي يروح لحد هناك و يقولهم الكلام اللي هقولهولكو دا.
تامر : يروح هناك لأ أنا مش ناقص الموضوع يتعقد اكتر من كده.
باسم : اسمعني بس يا تامر و أنت كمان يا لؤي
تسمع الكلام علشان تنفذه بالحرف الواحد.
___________