أنا حرة

الحلقة ٢٠

#أنا_حرة
___________
الحلقة ٢٠

في منزل الحاج غيث.
نزل غيث و معاه ثنيه و جلال.
ثنيه اول ما شافت الملثم و هو ممسك بحنين صرخت.
الملثم : لو حد قرب و لا سمعت صوتكم هخلص عليها.
ثنيه بتبكي بتشاور لغيث.
غيث : طب سيبها و قولي انت عاوز ايه؟
الملثم : عاوز اخرج من هنا.
جلال : طب سيبها الأول و احنا هنعمل كل اللي انت عاوزه.
الملثم : مش قبل ما البوابة تتفتح و اخرج.
جلال : و انت دخلت هنا ازاي اصلا؟
غيث : و دا وقته يا جلال؟
ثنيه ايدها على بؤها و بتبكي من غير صوت.
جلال : هفتحلك البوابة بس عارف لو مستها بس هيبقى اخر يوم في عمرك.
الملثم : افتح البوابة و مترغيش كتير.
يشاور لغيث و ثنيه : اخرج معاه و انتي كمان.
يخرجوا كلهم و الملثم و معاه حنين يمشي وراهم
و بيلتفت يمين و يسار.
مسعد يصرخ بعلو صوته : حرامااااي.
الملثم يخبطه يوقعه في الأرض.
و حنين بترتعش من الخوف.
يفتح جلال البوابة يقرب الملثم و معاه حنين و هو ماشي للخلف و موجه حنين قصادهم.
الملثم : هخرج بيها و هسيبها قدام شويه.
ثنيه : لأ أنا عاوزه بنتي.
الملثم : ما هو لو قربتي خطوة واحدة هتاخديها بس جثه.
غيث يمسك ايدها.
يخرج الملثم و أول ما يبعد خطوتين عن البوابة يحدف حنين في الأرض بكل قوته بحيث يتلهو فيها
و يعرف يهرب لكن جلال كان بيجري وراه.
غيث سند حنين و ثنيه اخدتها في حضنها و مسعد خرج يجري هو كمان ورا الملثم.
غيث : حنين انتي كويسه يا بنتي؟
حنين : عاوزه اشرب مياه.
ثنيه : يا ضنايا يا بنتي تعالي اما اعملك حاجه تشربيها علشان الخضه اللي اتخضتيها دي.
غيث عينه على أول طريق البلد.
ثنيه : سندها معايا يا حاج.
غيث : حاضر.
_______

في شقة رشدي.
كريمة : اخرس قطع لسانك بنتي اشرف منك و من عيلتك كلها.
رشدي : انتي بالذات متتكلميش.
فوزي : ميصحش كده يا رشدي يا ابني عيب انا واقف اعملي احترام.
كريمة : و دا يعرف الاحترام دا قليل الادب.
رشدي بغضب : بقولك ايه يا ست انتي انا مبتكلمش معاكي دلوقت و لا وجهتلك كلام اصلا.
كريمة : سامع جوز بنتك المحترم بيقول ايه؟!
رشدي : قصدك جوز بنتك المغفل مش كده؟
ما تلاقيكي عارفه كل حاجه و مداريه عليها.
تقرب كريمة و عاوزه تضرب رشدي يوقف فوزي ما بينهم.
رشدي : عاوزه تضربيني أنا دا بدل ما تربي بنتك.
كريمة : بنتي متربيه غصب عنك.
رشدي : لا واضح قوي و بعدين انا بتكلم معاكم ليه اصلا اتفضلي خديها و اخرجوا من هنا يلا.
كريمة : نخرج منين يا حبيبي دي شقة بنتي اللي مش عاجبه الباب يفوت جمل.
رشدي : مشوفتش بحاجه زي دي قبل كده.
كريمة : واد انت لم لسانك احسنلك.
رشدي : أدخلي للهانم بنتك خليها تلبس علشان تغور من هنا.
كريمة : لأ بقى انت لازم يترد على ابوك علشان اشوف رأيه ايه في قلة الأدب بتاعتك دي.
فريدة : دخلت كريمة لمايسه.
كريمة : هاتي تليفونك.
مايسه بصوت متعب : ليه؟
كريمة بغضب : بقولك هاتي تليفونك.
مايسه : مع رشدي.
كريمة : و كمان اخد التليفون منك؟
بس استنى عليه دوريلي هنا على رقم حماكي.
مايسه : ليه؟
كريمة بغضب : بقولك دوريلي على رقم حماكي.
اخدت مايسه تليفون كريمة و بتدور على رقم راضي.
مايسه : اهو يا ماما.
كريمة : اتصلي عليه.
مايسه : بلاش يا ماما مش عاوزين فضايح.
كريمة : فضايح ليه هو انتي كنتي عملتي حاجه غلط؟
ايه يعني لما سافرتي و كان جوز صاحبتك مسافر على نفس الطياره و نزل في نفس الاوتيل بتحصل يعني مفيهاش حاجه
و دا يعني معناه إن في حاجه بينكم زي ما بيقول قطع لسانه بس اصبر عليه يا رشدي إن ما بيعتك اللي وراك و اللي قدامك مبقاش انا كريمة.
مايسه : ناويه على ايه يا ماما؟
كريمة : انتي خلاص مبقاش ليكي عيش معاه
شقتك و هتقعدي فيها و هو يغور في داهية
هترفعي عليه قضية سب و قذف و هنلففه المحاكم كعب داير لحد ما يقول حقي برقبتي و ابنك هيفضل في حضنك و نفقتك هنجيبها من عينه و ابوه لو موافق على اللي بيقوله ابنه ده هنلبسه هو كمان قضية و نقلب الطربيزة عليهم و نقول دا
هو اللي كان بيتحرش بيكي و لما قولتي لـ ابنه معملش حاجه و ابوه اللي وز ابنه إنه يقول الكلام دا عليكي علشان تتنازلي عن كل حاجه.
مايسه : بجد يا ماما هنعمل كده؟
كريمة : عليه و على أعدائي هو مش عاوز يسوء سمعتك انا بقى هقلب خطتهم دي فوق دماغهم
و لا فاكره إنه جاب القصة العبيطه دي من دماغه تلاقيهم قاعدين مع بعض و مرتبين كل حاجه هو من الديون اللي عليه مش عارف يعمل حاجه و لما ملقاش منك ريق حلو ورفضتي تديه الدهب اتجنن بس ارجع و اقول انتي اللي سهلتي عليهم ان خطتهم تتنفذ لما سافرتي و كدبتي عليه و قولتي انك مسافرة تبع الشغل و مع زمايلك كمان.
مايسه : ما انا كنت مخنوقه و عاوزه افُك عن نفسي و عارفه إنك هترفضي أو هتقوليلي خُدي يحيى معاكي علشان اقعد بس صدقيني يا ماما انا مكونتش عارفه إن زياد مسافر على نفس الطياره و محصلش حاجه بينا بالعكس انا سيبت كل حاجه و نزلت.
كريمة : اهو دا دليل بقى على انك مكونتيش تعرفي فعلا جدعه إنك جيتي و مكملتيش الرحلة دي بس اخص على نانسي صاحبتك بقى تعمل فيكي كده و ليه يا بنتي؟
دا انتوا كنتوا اصحاب.
مايسه : نانسي حسابها معايا بعدين بس اما اخلص من رشدي و افوقلها.
كريمة : طب اسكتي علشان اكلم أبو البيه يجي يشوف ابنه و هشهده عليه علشان يبقى احنا كده عدانا العيب و يخرس لسان ابنه بقى.