أنا حرة

الحلقة ٢٥

#أنا_حرة
_________
الحلقة ٢٥

رباب : ليه كده بس يا جيهان ليه تكسري بخاطر ابنك هو جاي وفرحان تقومي تنكدي عليه؟!
جيهان : قلبي مش مطمن للجوازة دي يا رباب اعمل ايه؟
رباب : ياستي قلبك مش مطمن لـ ايه بس هي البنت عملت حاجه ولا لسه شوفتي منها حاجه وبعدين تعالي هنا قوليلي تفتكري لو فيها حاجه وحشه ألا اللي كان متجوزها دا كان حفي عليها علشان ترجعله وترفض كمان؟!
متقولي كلام يدخل العقل بقى ياجيهان.
جيهان : أنا مالي بيحفى عليها ولا بيجري وراها حتى انا ليه باللي حساه يااختي.
رباب : سيبي ابنك يفرح هو ممكن يروح يتجوز ويخلص كل حاجه وانتي عارفه الكلام دا كويس بس هو شاري خاطرك وعاوزك تباركي للجوازة قوليله مبروك وروحي معاه وافرحيله وخدي البنت في حضنك وحسسيها إنك هتعامليها زي بنتك صدقيني هتحبك وهتعاملك احسن معاملة ومتسيبيش الشيطان يلعب في دماغك ابنك مش صغير علشان اللي بتعمليه ده.
جيهان : مش عارفه خايفه يارباب.
رباب : ياستي انا لما رامي اتجوز في الأول كنت حاسه إن مراته خلاص أخدته مني بس لما رجعت بشريط حياتي لاقتني أنا كمان لما اتجوزت باباه كان لينا ذكريات مع بعض ليه استكتر على مراته إنها تحبه ويبقوا ليهم حياتهم
و لاقيتها نزلت تساعدني و ايدها بـ ايدي لا استكبرت ولا قالت خلي امك تاكل لوحدها كبرت في نظري وحبيتها اكتر وعاملتها زي مايكون عندي بنت بالظبط
ريحت ابني وفرحته وهو وهي بقوا عايزين يعملوا أي حاجه علشان يفرحوني لكن هفضل معكننه عليهم
لا هي هتحبني ولا ابني هيطيق يقعد في البيت هياخدها ويمشي يبقى انا كسبت ايه بقى
افرحي لـ ابنك علشان يبقى معاكي ميسبكيش وحيدة ملناش غيرهم ولا في راجل هنعيش معاه يبقى ونس لينا اديكي شايفه انا وانتي اهو اترملنا وملناش حد يقعد معانا غيرهم.
جيهان : دا تهديد دا ولا ايه؟!
رباب : ياستي تهديد ايه بس الحياة مش مستاهله كل دا اهم حاجه سعادتهم وطالما بيحبها وفرحان بيها سبيه يتجوزها.
جيهان : كل اما اقتنع واقول خلاص يتجوز اللي اختارها ارجع افكر تاني إن ممكن متكونش مناسبة ليه ويندم بعدين.
رباب : اتفاءلي خير ياجيهان وفرحي وابنك ووافقي بقى.
____________

في شقة كريمة.
كريمة : معرفش.
فوزي : يعني متعرفيش بنتك هتقعد كام يوم في شرم دي؟
كريمة : قولتلك معرفش وبعدين انت بتسأل ليه؟!
فوزي : ايه كمان مسألش
على بنتي؟!
كريمة : غريبة يعني انت مش مفروض مخاصمها ومش عاوز تعرف أي حاجه عنها.
فوزي : رشدي اتصل بيسألني هترجع امتى.
كريمة : اوعى تكون قولتله حاجه.
فوزي : هو انا اعرف علشان اقوله امال بسألك ليه؟!
كريمة : لا انا قصدي على جواز مايسه.
فوزي : طب ما هو ميسره يعرف.
كريمة : طب هو بيسأل عنها ليه يكونش لسه بيحبها وبيشاور عقله!
فوزي : بيسأل علشان مايسه سايبه الولد معاه ومكانش يعرف اصلا إنها مسافره.
كريمة : خليه يقعد بيه مش ابنه.
فوزي : ويشوف شغله ازاي مش لازم يشتغل علشان يجيب لبنتك فلوس تاخدها تصرف منها على ابنه.
كريمة : أمه تقعد بيه مش حفيدها؟!
فوزي : الست كبيرة وتعبانه ومش حمل رعاية طفل.
كريمة : امال أنا اللي حمل رعايته يعني؟!
فوزي : ما انتي بتاخدي من بنتك مبلغ كل شهر ولا فاكرة اني معرفش على العموم انتو أحرار مع بعض بس بنتك لازم تتحمل مسؤلية ابنها مش معنى إنها اتجوزت تسيبه وتنساه كده لو مرعتش الولد وانتي رفضتي تاخديه هو من حقه وقتها يرفع قضية ويضم الولد لحضانته خصوصا بعد ما بنتك كمان اتجوزت.
كريمة : يبقى احسن.
فوزي : تصدقي ياكريمة انك معندكيش قلب.
كريمة : لا وانت قلبك رهيف قوي بنتك مش عاوزه تدفع تمن رعايتي لـ ابنها هي تروح تتجوز وتتهنى مع جوزها وتسيب الواد خلفته انا ونسيته؟!
فوزي : انتي غيرانه من بنتك كمان بس اقولك عندك حق هي أولى بـ ابنها.
كريمة : غيرانه منها علشان كان نفسي اتجوز واحد يقدرني ويهتم بيه
عملتلي ايه من ساعة ما اتجوزتك؟ ولا حاجه.
فوزي : عملت كتير يا كريمة بس انتي بتنسي عايشه في بيتك معززه مكرمه مرتبي بتاخديه اول بـ اول بتشتري اللي نفسك فيه عمري ما سألتك الفلوس دي راحت فين ولا صرفتيها في ايه
يمكن اتساهلت معاكي اكتر من اللازم وكنت فاكر إن كده بـ اديكي حريتك علشان متحسيش إني بخنقك كنت بحترم أي قرار تاخديه في البيت
وفاهم ان دا الصح بس طلعت غلطان كان في أمور لازم كنت ابقى حازم وجاد فيها زي تربيتك لـ بنتك ربتيها على الأنانية وازاي متحبش غير نفسها لدرجة إنها بقيت تعاملنا كأننا موظفين عندها بالأجرة ولسه ياما تشوفي علشان انا خلاص شيلت ايدي خالص من ناحيتها بقيت في رقبة راجل يعيشوا مع بعض زي ما هما عايزين.
كريمة : بقولك ايه تعرف تسكت خالص انت عمرك ما كان لك دور اصلا في حياتنا انا الست والراجل هنا في البيت.
صفعها على وجهها صرخت في وجهه: انت اتجننت ازاي تمد ايدك عليه؟!
فوزي : كلمة زيادة هطلقك وارميلك ورقتك وروحي بقى مكان ما انتي عايزة.
كريمة : لا وانت فاكر لما تطلقني همشي من الشقة لا ياحبيبي الشقة دي بتاعتي دا انا اوديك في داهية.
فوزي : انتي ست سليطة اللسان محدش يستحملك خربتي بيت بنتك وبكرة تخربي بيتها دا كمان بأفكارك المسمومه انتي اللي زيك مينفعش يعيش متكرم ومتنعم بالشكل دا
كان لازم اطلقك من أول مرة عليتي فيها صوتك عليه وعملتي فيها راجل البيت.
كريمة : ومطلقتش ليه حد كان حايشك؟
فوزي : بنتي اللي منعتني بنتي اللي للأسف ربتيها غلط وهيفضل قلبي غضبان عليها طول ماهي بتعاملني بالشكل ده.
كريمة : انزل يافوزي اقعد على القهوة مع اصحابك اما القلم بقى اللى اخدته منك من شويه هنتحاسب عليه ولازم تعرف إن ليه رجاله يوقفوك عند حقك.
فوزي : يارتني كنت قعدت مع رجالتك دي من زمان وخلصنا وكل واحد راح لحاله.
كريمة : بقى كده طيب مستني ايه ماتفضها وكل واحد يروح لحاله.
فوزي : تصدقي مش هاين عليه العشرة مع إنك معندكيش اصل وتستاهلي.
كريمة : طيب يافوزي انا هكلم اخواتي وولاد عمي يجوا يشوفوا انت عاوز ايه خليني اخلص و اشوف نفسي بقى.
فوزي يضحك بسخريه : لسه عاوزه تشوفي نفسك ياكريمة؟!
كريمة : بكرة تشوف يافوزي.
فوزي : الظاهر عجبتك اللعبة وعاوزه تعملي نفس اللي بنتك عملته ما طباخ السم بيدوقه برضو انا نازل وابقي هاتي اللي انتي عاوزاه ولما تخلصي حوارك معاهم اتصلي اجي
نشوف الحوار دا هيخلص على ايه سلام.
_______