أنا حرة

الحلقة ٣٠

#أنا_حرة
_________
الحلقة ٣٠

في منزل الحاج غيث.
ثنية : امال آدم فين؟
حنين : خرج.
ثنية : مشي يعني ولا ايه؟
حنين : ايوه يا ماما مشي.
ثنية : ممسكتيش فيه ليه يتعشا معانا؟
حنين : يتعشا معانا ازاي يعني؟
ثنية : يا بنتي ما اخوكي جه وطلع لـ باباكي فوق كان عاوز يقعد مع آدم بس طلع فوق يطمن على بابا قبل ما ينام.
حنين : ما انا مكونتش أعرف.
ثنية : خلاص حصل خير.
جلال : ازيك يا حنين؟
حنين : تمام انت اخبارك ايه؟
جلال : أنا تمام بس الظروف اهو زي ما انتي شايفه.
___________
في منزل آدم.
جيهان : كنت فين يا آدم؟
التفت لوالدته بابتسامة : مساء الخير يا ماما.
جيهان : مساء النور.. كنت فين؟
آدم : كنت في بيت بابا حنين.
جيهان : ليه هو انت مكونتش عندهم امبارح وأول كنا معاهم وقبلها كنا في خطوبة اخوها ايه هو كل يوم عند حنين امال لما تتجوز بقى ايه مش هشوفك خالص؟!
آدم : يا حبيبتي باباها تعبان واخوها مكانش موجود فواحب أنا اللي اكون جنبه في ظروف زي دي.. دا أول حاجه
تاني حاجه إن دا اصلا جزء من شغلي لإن الراجل زي ما حضرتك عارفه خسر المحصول بتاعه بسبب حريق اللي حصل في الأرض ومفروض أنا بحقق في الموضوع ده
ياريت يا ماما حضرتك تتقبلي الأمر بشكل طبيعي
لإن حنين هتبقى مراتي.
جيهان : ليه بتقولي الكلام ده؟
آدم : علشان بصراحه حضرتك مش قادرة تتقبلي وجود حنين في حياتي اللي هو أمر طبيعي إني ارتبط بـ أي بنت سواء كانت حنين أو غيرها
يعني كنتي عايزانى ارتبط وأشوف حياتي دلوقت كل شيء اتغير.
جيهان : مين قال كده؟
انا مفيش بيني وبين حنين غير كل خير.
يُقبل يد والدته : ياريت يا ماما.
________
في شقة مايسه.
مايسه : ومسافر فين بقى؟
زياد : مسافر الغردقة هقضى كام يوم هناك.
مايسه : خلاص طالما مش مسافر في شغل خدني معاك.
زياد : معلش لما تقومي بالسلامة.
مايسه : وايه اللي يمنع إني اسافر الحمل كويس ومفيش أي مشكلة.
زياد : اللي يمنع إني مش هجازف واخدك معايا
وكمان نانسي جايه معايا.
مايسه : نعم!
يعني نانسي تسافر وأنا لأ؟!
زياد : الايام جايه كتير.
مايسه : زياد انت ليه بتعمل معايا كده؟
قاصد تضايقني صح؟!
زياد : هضايقك ليه انا مسافر مع مراتي ومفروض تتقبلي الأمر بهدوء ومن غير مناقشه.
مايسه : انت بتتكلم بجد يعني انا مفروض اوافق إنك تسافر معاها وتسبيني هنا لوحدي؟!
زياد : ما انا لسه مكملتش كلامي انتي مش هتقعدي لوحدك ماما هتيجي تقعد معاكي.
مايسه : نعم!
زياد : ايه مالك عندك اعتراض؟
مايسه : لا اذا كنت مصمم إن حد يقعد معايا يبقى ماما تجيني وانت مامتك واختك يقعدوا مع بعض.
زياد : ماما هتيجي تقعد معاكي وضحى جوزها جاي بكره هيقعدوا في شقة ماما عقبال ما يخلصوا شقتهم.
مايسه : نعم!
ايه الكلام اللي بتقوله ده
ومين هيوافقك اصلا على إن دا يحصل يعني مامتك تسيب الشقة لـ اختك تقعد فيها هي وجوزها وتيجي تقعد في شقتي؟!
زياد : شقتك!
ههههههههههههه
انتي ناسيه انها شقتي ولا ايه؟
مايسه : وانت كتبتها بـ اسمي.
زياد : تمام.. بس دا ميدكيش الحق إنك ترفضي قعاد ماما هنا
الشقة كتبتها بـ اردتي ولما اعوز ارجعها هرجعها.
مايسه : انت بتهددني هو انا اخدت ايه اصلا من الجوازه دي غير اني عايشه معاك في السر خايف من مراتك مكونتش اتجوزت.
زياد : خلاص يبقى كل واحد يروح لحاله طالما الوضع دا مش مناسب ليكي.
مايسه : انت جاي تقول الكلام دا دلوقت بعد ما حملت مقولتش ليه من الأول واحنا لسه على البر؟
زياد : اسمعي يا مايسه عند وجدل في كل كبيرة وصغيرة دا مش عندي هتعيشي بطريقتي وبـ اسلوبي اللي هحدده كان بها مش عاجبك اتفضلي من سكات ارجعي شقة مامتك لاني محتاج الشقة دي بصراحه علشان اجيب العروسة الجديدة.
مايسه : انت بتذلني علشان وافقت اتجوزك بشروطك معلش انا اللي غلطانه برضو.
زياد : ماما هتيجي تقعد معاكي لحد ما ارجع باب الشقة دا ميتفتحش لحد غريب الشباك دا ميتفتحش برضو غير وماما هنا تنزل تقفليه.
مايسه : انتي فاكرني ايه اشتريتني بفلوسك علشان تتحكم فيه بالشكل ده؟!
وبعدين ما أنت بتسيب نانسي هانم لوحدها وتسافر اشمعنه أنا؟
زياد : متأكدة إنك محتاجه إجابة على السؤال ده؟
مايسه : ايوه اشمعنه انا؟!
زياد : حاضر هقولك
أنا واثق في نانسي لو سيبتها حتى فين هرجع الاقيها في مكانها لكن أنا مضمنكيش لا أعرف هتقابلي مين ولا هتتكلمي مع مين.
رفعت مايسه يدها في محاولة إنها تصفع زياد على وجهه فمسك ايدها وحدفها على الكرسي المقابل ليه وقرب منها.
زياد : حسك عينك ايدك دي تترفع مرة تانية علشان هكسرهالك واسمعي حاجه كمان هتقعدي هنا زي الكرسي اللي انتي قاعدة عليه ماما هتيجي هتبقى هي ست البيت دا ولو سمعت إنك بس نطقتي معاها بكلمة هاجي أرميكي في الشارع.
مايسه : انت بتقول ايه؟!
زياد : اللي سمعتيه ومش عاوز كلمة زيادة.
قامت مايسه دخلت جوه وهي تعبانه و بتبكي.
__________